O Ai Maria le Makatala?
Tali a le Tusi Paia
O Maria le Makatala o se soo faamaoni o Iesu Keriso. O lona igoa o Makatala atonu e faasino atu i le aai o Makala (pe atonu o Makatala), lea e latalata i le Sami o Kalilaia. Atonu na iai se taimi na nofo ai Maria i inā.
O Maria le Makatala o se tasi o fafine na faimalaga faatasi ma Iesu ma ona soo, ma lagolagoina i latou i a latou meafaitino. (Luka 8:1-3) Na ia molimauina le fasiotia o Iesu, ma o se tasi na vaai muamua iā Iesu ina ua toetū mai.—Mareko 15:40; Ioane 20:11-18.
Pe na avea Maria le Makatala o se fafine talitane?
E lē o taʻua i le Tusi Paia o Maria le Makatala o se fafine talitane. E pau le faamatalaga o loo iai e faatatau i lona talaaga, na tutuliese e Iesu temoni e toʻafitu mai iā te ia.—Luka 8:2.
Ae aiseā ua manatu ai nisi o ia o se fafine talitane? Ina ua mavae le tele o tausaga talu ona maliu Maria, na talitonu nisi tagata o ia o le fafine lea e lē o taʻua le igoa (e foliga mai o se fafine talitane) o lē na faasusūina vae o Iesu i ona loimata ma solo i lona lauulu. (Luka 7:36-38) Peitaʻi, e leai se faamaoniga i le Tusi Paia o lenā manatu.
Po o Maria le Makatala o se “aposetolo o aposetolo uma”?
E leai. E faalagilagi e le Lotu Katoliko Maria o le “Sagata Maria le Makatala” ma o “le aposetolo o aposetolo uma,” auā o ia o se tasi na muamua faailoa atu i aposetolo le tala e faatatau i le toetū mai o Iesu. (Ioane 20:18) Peitaʻi, e lē faapea ai o ia o se aposetolo, ma e leai se faamaoniga i le Tusi Paia na taʻua ai o ia o se aposetolo.—Luka 6:12-16.
Na māeʻa le tusiaina o le Tusi Paia i le faaiʻuga o le uluaʻi senituri T.A. Ae e oo ane i le senituri lona ono, ua matuā faamamaluina e taʻitaʻi lotu le tulaga o Maria le Makatala. O loo faamatala i nisi o tusitusiga mai le senituri lona lua ma le lona tolu, na lotovale nisi o aposetolo o Iesu iā Maria. Peitaʻi, o nei tusitusiga ua na o ni talafatu, e lē o se vaega o Tusitusiga Paia.
Pe na avea Maria le Makatala ma avā a Iesu Keriso?
E leai. E manino mai i le Tusi Paia sa nofofua Iesu i lona olaga atoa.a
a Tagaʻi i le mataupu “Pe na Faaipoipo Iesu? Pe na Iai ni Uso ma ni Tuafāfine o Iesu?”