Tauivi ma Faalogona Tuua Toʻatasi e Ala i le Fesoasoani i Isi—Le Manatu o le Tusi Paia

E toʻatele tagata i le lalolagi ua lagona le tuua toʻatasi ma ua latou faaesea ai i latou lava mai i isi. E talitonu nisi tagata atamamai o le soifua mālōlōina, o le fesoasoani i isi o se tasi lea o auala e tuuitiitia ai faalogona tuua toʻatasi.

• “O le fesoasoani atu iā i latou o loo manaʻomia le fesoasoani, o le a maua ai se fuafuaga o o tatou olaga ma fesoasoani e tauivi ai ma faalogona tuua toʻatasi.”—Faalapotopotoga o le Soifua Mālōlōina i Amerika.

Ua aumaia i le Tusi Paia fautuaga aogā i le auala e mafai ai ona tatou fesoasoani atu i isi. O le faatatauina o na fautuaga, o le a fesoasoani iā i tatou e tauivi ai ma faalogona tuua toʻatasi.

Mea e mafai ona e faia

Ia limafoaʻi. Ia saʻili avanoa e faifaimea faatasi ai ma isi. Ia lotomalie e faasoa atu mea ua e maua. Pe a e faia faapea, o le a latou lagona ai le lotofaafetai ma o le a faigofie ai ona atiaʻe ni faauōga.

• Mataupu silisili o le Tusi Paia: “Ia outou foaʻi atu pea, ona foaʻi mai lea o tagata iā te outou.”—Luka 6:38.

Fesoasoani atu i isi. Ia saʻili auala e fesoasoani atu ai iā i latou o loo feagai ma taimi faigatā. E ono aofia ai le faalogologo lelei atu iā i latou, po o le ofo atu foʻi e faia ni galuega patino mo i latou.

• Mataupu silisili o le Tusi Paia: “O se uō, e fesoasoani atu i taimi uma.”—Faataoto 17:17, Contemporary English Version.

Mo nisi faamatalaga e faatatau i le auala e faatumauina ai ni faiā lelei ma isi, ia faitau i le mataupu “Aiga ma Faauōga.”