Uunaia i Latou ia Avea ma Ona Soo
1 I le 1 Korinito 3:6, na tusi ai Paulo e faapea: “Na ou totōina, na faasūsūina e Apolo; a e peitai o le Atua ua faatupuina.” Sa faaaogā e Paulo lenei faauigaga e fesoasoani ai i ona uso ia iloa le manaomia ona galulue autasi i lalo o le tulaga ulu o Keriso. O le auala foi lenei na ia fesoasoani ai i a i latou e talisapaia le vaega tāua na latou faia i le galuega tāua o le totōina ma le faasūsūina.
2 O lena galuega faasaoola, e tatau ona faaiuina i nei lava aso. I le avea o ni Kerisiano tuuina atu, ua faia ai so tatou sao i le tiute tauave tāua o le fesoasoani atu lea i isi ina ia avea ma soo o Iesu. (Galu. 13:48) O le a faapefea ona e tuliloa tagata loto naunau na mafai ona e faagaeeina e ala i le faaaogaina o le tusi o Laʻu Tusi o Tala o Le Tusi Paia?
3 Afai e te toe foi atu e asiasi i se tagata na talia le tusi, e mafai ona e faapea atu:
◼ “I le ta talanoaga talu ai, sa ta talanoa ai i mea na faia e Iesu a o iai i le lalolagi, e faaalia ai e manatu moni mai lava o ia i a i tatou. O le ā sou manatu, o le ā se mea o le a ia muai faia e aumaia ai le mapusaga i a i latou o matuā puapuagatia?” Faatali mo se tali. Suʻe i le Tala e 115, ma autalu faamatalaga i le palakalafa e tolu. Tataʻi le manatu i le ata i le itulau lava lena, ma faamatala po o le a faapeī tulaga o mea pe a faia le finagalo o le Atua i le lalolagi e pei ona faia i le lagi. Faasino i ai aogā e maua pe afai e aʻoaʻo atili.
4 Afai e lē tele se naunau na faaalia e mafai ai ona ofoina le tusi i le uluai asiasiga, atonu e mafai ona e amata se talanoaga i le auala lenei:
◼ “Ou te manatu, ta te ioe uma e toatele tagata i aso nei e lē o manatunatu i mea o loo faia nei e Iesu. Ae, pe e te iloa ua nofo sauni nei Iesu e faaumatia mea leaga uma mai lenei lalolagi? [Suʻe le Tala e 114 i le tusi, Tala o le Tusi Paia, ma faatepa i le mea ua toeitiiti ona faia lea e Iesu i le lumanai e lē o toe mamao.] Ua matuā faamanatuina mai e lenei mea i a i taʻua e uiga i le mea o fai mai ai le Tusi Paia i le Faaaliga 16:16. Seʻi o ta faitau faatasi i ai.” Afai e foliga mai ua faaalia nei se naunau tele, ona ofo lea o le tusi po o le polosiua, Po o Silasila Alofa mai ea le Atua ia i Tatou?
5 Pe e te manao foi e faataitai lenei faamatalaga tuusaʻo:
◼ “I le taimi talu ai na ou iai i inei, na ta talanoa ai i le tāua o le mauaina o le poto e uiga i a Iesu. Ua faapea mai le Ioane 17:3, ‘o le ola e faavavau foi lenei’ ia ave i fale lena poto. E mafai faapefea ona tatou faia o lena mea?” Faatali mo se tali. Ona faaauau lea i le faamatala atu i ai o la tatou fuafuaga mo le faia o suesuega faale-Tusi Paia ma pe faapefea ona aogā mo i latou.
6 Fai mai Paulo, o le tagata galue i le seleselega o le a “taitasi ma lona lava taui e maua, e tusa ma lana lava galuega.” (1 Kori. 3:8) Afai tatou te faamalolosi ma maelega e fesoasoani i isi ina ia avea ma soo o Iesu, e mautinoa lava o le a matuā tele so tatou taui.