Le Faamaʻi o le Fatu—O se Faamataʻu i le Soifua

I TAUSAGA taitasi e faitau miliona tane ma fafine i le lalolagi aoao ua maua i le pē faafuasei o le fatu. E toatele ua laveaiina mai faatasi ma ni aafiaga mulimuli ane. O isi ua lē mafai ona toe laveaiina. Ae mo isi, ua matuā faaleagaina le fatu, “ua faailoga fesili ai pe mafai ona latou toe faia ni gaoioiga aogā,” o le faamatalaga lea a Peter Cohn, o se tagata suesue i tulaga o maʻi fatu, ona ia toe faapea mai lea: “O lea la, o se mea tatau ona togafitia vave ni āuga e aliaʻi mai o le pē faafuasei o le fatu, i so o se taimi lava e mafai ai.”

O le fatu o se musele lea e pamuina atu le toto i vaega eseese o le tino. Pe a pē faafuasei le fatu, (myocardial infarction), e pē se vaega o le musele o le fatu ona ua leai se toto. Ina ia maloloina pea le soifua, e manaomia e le fatu le okesene ma isi mea manaomia na o loo feaveaia e le toto. E maua nei mea manaomia e ala mai i ālatoto, lea e taʻaiʻai ai le pito i fafo o le fatu.

E mafai e faamaʻi ona aafia ai so o se vaega o le fatu. Peitai, o le faamaʻi e sili ona taatele o le faamaʻi sili ona matautia lea e aafia ai ālatoto, ua taʻua o le atherosclerosis. Pe a tupu lenei mea, e toʻa gaʻo (plaque), po o vaega gaʻoa, i autafa o ālatoto. I le faagasologa o taimi, e mafai ona faateleina nei vaega gaʻoa, e faamalō ma vaiti ai ālatoto, ma taofia ai le tafe atu o le toto i le fatu. O lenei faamaʻi lilo o ālatoto (CAD) e taitaia atu ai i le tele o le pē faafuasei o le fatu.

O le faaputuputu aʻe o nei mea i se ālatoto e tasi pe sili atu foi e vave lava ona iu ai i le pē faafuasei o le fatu pe a lē lava le okesene lea o loo manaomia e le fatu. E oo lava i ālatoto e lē o matuā puni tele, e mafai e ni potopotoi gaʻo ona taape ma amata ona fau aʻe ai se potopotoi toto (thrombus). O ālatoto ua pisia i ni faamaʻi o le a vave ona oo atu i se faalogona tuutaseʻi. E mafai ona tupu aʻe se potopotoi toto i le mea lea e iai se ālatoto ua iai lea tulaga, ma alu ese mai ai se sua lea e atili vaiti ai le ālatoto, ma faatupuina ai loa le pē faafuasei o le fatu.

Pe a umi se taimi e lē o sao atu le okesene i musele o le fatu, e mafai ona faaleagaina ai tisu (tissue) o loo i autafa ane. I le lē pei o isi tisu, o le musele o le fatu e lē mafai ona toe faafouina. O le umi lava e pē ai, o le tele foi lena o le faaleagaina o le fatu ma e telē foi se avanoa e ono oo ai i le oti. Pe a faaleagaina le faiga o neura lea e faaosofia ai le gaoioi o le fatu, e mafai ona fenumiai le tātā masani o le fatu ma amata ona matuā soona tātā vale (fibrillate). I lena fesuiaiga i le tātā o le fatu, e lē taulau ai ona sologa lelei le pamuina atu e le fatu o le toto i le faiʻai. E sefulu minute e faasolo ai lenei gaoioiga ae pē loa le faiaʻi ma oti ai.

O lea, e matuā tāua ai le maua o se fesoasoani mai se fomai atamai. E mafai ona faasaoina ai le fatu mai se faaleagaina o le a faaauau pea, e taofia pe togafitia ai le suiga i le tātā o le fatu, ma oo foi ina laveaia ai le ola o se tagata.