Le Matapeapea—O Faapefea Ona Aafia ai i Tatou?
UA FAALEAGAINA e le matapeapea ola o le faitau miliona o tagata. Ua faaleagaina ai uiga faaletagata ma aumaia ai le tiga ma le faanoanoa i ē ua aafia ai. I lou olaga, atonu o loo e lagonaina ai foi āuga o le matapeapea. E oo lava i le gaoia e tagata o oloa i faleoloa ua siitaʻi ai le tau o oloa o loo e faatauina mai. Afai ua laitiiti lou totogi ma ua lē gafatia ai le tau o mea o loo manaomia mo aso taitasi, atonu ua avea oe ma sē ua afaina i le matapeapea o se tasi.
O Ē Fia Aai ma Ē e Mautinoa o le a Maliliu
O le matapeapea faavaomalo i le manatu faapito ua fai ma toatuga i taumafaiga a pulega faalemalo e fesoasoani ma le taulau ai i tagata matitiva. I tuā i le 1952, o le saienitisi ma lē e poto faapitoa i meaʻai aogā o le Susuga John Boyd Orr na faapea mai: “Ua sauni malo e faatasia tagata ma tamaoaiga mo se taua a le lalolagi ae o Malo Malolosi ua lē o nofosauni e aufaatasi e tafiesea le fia ʻai ma le mativa mai le lalolagi.”—Food Poverty & Power, a Anne Buchanan.
O le mea moni ua matauliaina le saunia o nisi fesoasoani. Peitai, o le ā le tulaga moni o le olaga mo ē matitiva, le toatele o le faitau aofai o le lalolagi o loo tuulafoaiina? Ua faapea mai se lipoti lata mai nei, e ui lava i le faateleina o le saunia mai o meaʻai i nisi o nofoaga, ae “o loo iai pea le fia ʻai ma le maʻi ona o le lē lelei o meataumafa i le toatele o tagata matitiva i le lalolagi . . . O le tasi vaelima [silia ma le tasi le piliona] o tagata o le lalolagi o loo molemanava i aso taitasi.” Ua faapea atili mai le lipoti: “E faaopoopo atu i ai, e 2 piliona tagata ua mafatia mai le ‘lē lava o meaʻai tatau’ ona o le . . . lē lelei [o mea e masani ona ʻai] o meaʻai e mafai ona oo atu ai i ni faaletonu matuia i le soifua maloloina.” (Developed to Death—Rethinking Third World Development) E mautinoa lava le tatau ona fai ma ulutala ia nei fuainumera!
Ē o Loo Faapologaina
O faalapotopotoga solitulafono ua latou faatamaoaigaina i latou i le faaleagaina o tagata o afaina i a latou faiga ma tagata lautele i se tulaga taatele. O vailaau faasaina, o faiga sauā, o pisinisi o faiga faatalitane, ma le faataumaoia o tulaga tau tupe ua faapologaina ai le faitau miliona. Ua faapea mai foi Gordon Thomas i lana tusi Enslaved: “E tusa ai ma le faalapotopotoga o le Sosaiete e Tetee i Faiga Pologa (Anti-Slavery Society), ua mataulia ai pe ā ma le 200 miliona pologa o loo iai i le lalolagi. O le faitau 100 miliona o nisi o i latou na o tamaiti.” O le ā le mafuaaga autū? Ua faamatala mai e le lipoti e faapea: “O le faanaunau e fai ni pologa ua avea pea lea ma natura faalemanuia o le tagata . . . [O le fai o pologa o le] fua lea o le tuinanau, matapeapea ma le manao i le pule.”
O ē malolosi ua latou faamativaina ē vaivai ma ē ua faigofie ona osofai, ma fasiotia ai le toatele. “E mai le lua miliona o Initia na nonofo i Pasili ina ua faatoʻā tuvae atu tagata papae, atonu e na o le lua afe o i latou ia o loo mafai ona faasaoina mai.” (The Naked Savage) Aisea? O le pogai autū o le matapeapea.
Le Faatuputupulaia o le Eseesega i le Va o Ē Mauoa ma Ē Matitiva
Na lipotia mai e le New York Times se faamatalaga a James Gustave Speth, o se faatonu i le Polokalame Tau Atinae a Malo Aufaatasi e faapea, “o se vaega o tagata i tulaga maualuluga i le lalolagi aoao ua tulai mai . . . lea o loo faatupulaia le tele o le tamaoaiga ma le pule, ae e silia ma le ʻafa o le aofai atoa o tagata o iai nei ua matuā matitiva lava.” O lenei eseesega matautia i le va o ē ua tamaoaiga ma ē matitiva ua matuā manino lelei mai i ana upu nei: “O loo ia i tatou le silia ma le ʻafa o tagata o loo iai i le paneta o o latou totogi e itiiti ifo i le 2 tālā Amerika i le aso—e silia lea ma le 3 piliona tagata.” Na ia faaopoopo mai faapea: “O tagata matitiva o loo iai i lenei lalolagi ua faia aʻe i vasega e lua, ua avea lea ma mea e fofoa mai ai le leai o se faamoemoe, o le ita, ma le lē mautonu.”
O le leai o se faamoemoe ua faateleina ona o le mea moni e faapea o le toatele o le au maumea e aliali mai ua leai se loto fuatia ifo po o se alofa i mafatiaga o le toatele ua pagatia i le mativa ma le fia ʻai.
O ē ua afaina ona o le matapeapea ua iai i so o se mea. Mo se faataitaiga, tagai atu i foliga lē mautonu o iloa atu i mata o tagata sulufai o loo utia i le va o tauiviga mo le pule i Bosnia, Rwanda, ma Liperia. Tagai atu i foliga o le lē toe fia ola o aliali mai i mata o ē o loo matelaina i se lalolagi o loo tele ai pea le tamaoaiga. O le ā o loo i tua o nei mea uma? Ua iai le matapeapea—i so o se vala!
E mafai faapefea ona faasaoina oe a o siosiomia e tagata matapeapea i se siomaga lē pulea? O le a talanoaina e isi mataupu e lua o loo sosoo mai lenei fesili.