Au Taumafa Masani—Pe e Ono Faapuupuuina ai Lou Soifua?

“Ua matuā poloka lava ou alātoto (coronary artery), pe tusa ma le 95% le telē o le poloka . . . O le tulaga lea e iai e ono oo le fatu pē ia te oe i se taimi lata mai i le lumanai.”

SA MATUĀ faigata tele ia Sio e tolusefulu ma le lua tausaga le matua ona talitonuina upu nei a le fomai fatu o lē na suesueina le mafuaaga o le tiga o lona fatafata. Toetoe lava o le ʻafa o i latou o ē o le a maliliu i le maʻi fatu latou te lē o silafiaina ua aafia i latou.

Ae o le ā le mafuaaga o le tulaga e pei ona oo ia Sio? Na fai mai ma le faanoanoa Sio, ‘Ua tolusefulu ma le lua nei tausaga o oʻu ʻai i meaʻai masani a Amerika lea e tele i “aano o manufasi ma le suāsusu.” O le mea moni sa ou lē manatu mamafa i taumafa a Amerika e faapea e afaina ai loʻu ola maloloina.’

Au Taumafa Masani ma le Maʻi Fatu

O le ā le mea sa sese i taumafa masani a Sio? O le pogai autū lava, o loo iai le tele o gaʻo ia e toʻa i alātoto (cholesterol) ma gaʻo (fat), ae maise lava le gaʻo e pei ona maua mai i le pata, sisi, ma aano o manufasi (saturated fat). Mai lava i lona talavou, na tuu atu ai e Sio o ia i se tulaga lamatia i le ono aafia i le maʻi fatu toetoe lava i sipuni meaʻai uma na te faaaogaina. O le mea moni, o taumafa e tele ai le gaʻo, e fesootai atu i le lima mai le sefulu o mafuaaga autū o le maliu i le Iunaite Setete. E laualuga i le lisi le faamaʻi o le poloka o alātoto.

O le fesootaiga i le va o taumafa masani ma le maʻi fatu ua iloa mai i se suesuega sa faia i atunuu e fitu i ni tamaloloa e 12,000 mai le 40 i le 49 tausaga le matutua. E telē se eseesega sa faapitoa ona faaalia ai. Sa faaalia i le suesuega e faapea o tamaloloa Finilani—e taumafaina le 20 pasene o a latou calories mai i gaʻo e pei ona maua mai i pata, sisi, ma aano o manufasi—ae maualuga le fua faatatau o le gaʻoa o alātoto, ae o tamaloloa Iapani—e taumafaina e na o le 5 pasene o a latou calories mai i gaʻo e pei ona maua mai i pata, sisi, ma aano o manufasi—e maulalo le fua faatatau o le gaʻoa o o latou alātoto (blood-cholesterol levels). Ma e faaono e sili ai le fuainumera o le fatu pē i tamaloloa Finilani nai lo tamaloloa Iapani!

Peitai ane, o le gasegase o le poloka o alātoto, ua lē o toe avea nei ma gasegase e seāseā ona iai i Iapani. I nai tausaga ua tuanai atu, a o agaʻi ina tele iina ituaiga taumafa mai i atunuu i Sisifo ia e vave ona saunia, ua iloa ai o le taumafaina o gaʻo e maua mai i aano o manufasi ua oo atu i le 800 pasene. I le taimi nei, ua maualuga atu le gaʻo i alātoto o tamaiti Iapani nai lo tamaiti Amerika e tutusa o latou tausaga! E manino lava, o taumafa e gaʻoa ma iai le cholesterol e māfua ai tulaga lamatia o le soifua, ae maise lava le maʻi fatu.

Le Vaega o Loo Faatino e le Cholesterol

O le cholesterol o se suavai paʻepaʻe, e totoo ma e maseesee e pei o le peepee, ma e manaomia mo le ola. E maua i sela o tagata uma atoa ma manu. E saunia e o tatou ate ia cholesterol, ma e maua foi i ni aofaiga eseese mai i taumafa o loo tatou faaaogaina. E avatu e le toto cholesterol agaʻi i sela i ni vaega ninii lava e taʻua o lipoproteins, ia e fai aʻe i cholesterol, le gaʻo, ma polōtini. O ituaiga lipoproteins e lua lea la te tauaveina le tele o le blood cholesterol o le low-density lipoproteins (LDL) ma le high-density lipoproteins (HDL).

E sili ona tele cholesterol o loo i le LDL. A o faataamilo i alātoto, e ui atu i LDL receptors (o sela latou te taliaina faamatalaga e faapogaia ai ona gaoioi le tagata e fai se mea), agaʻi atu ai i mea e taʻu o aupa o sela ona taape ai loa lea i vaega mo le faaaogaina e sela. O le tele lava o sela i le tino e iai receptors faapena, ma latou te faaaogaina foi ni nai LDL. Ae ua fuafuaina le ate ina ia mafai e le 70 pasene o LDL ia o loo aveesea mai e receptors o le LDL mai i alātoto ona tutupu ai iina.

I le isi itu, o HDL o ni vaega ninii e fiafia tele i cholesterol. A o fegasoloai i alātoto, latou te aoina so o se cholesterol e lei faaaogaina ma ave agaʻi i le ate. E faataape e le ate cholesterol ma aveesea mai le tino. E ofoofogia le fausaga ua fausia ai le tino ina ia faaaogā cholesterol e manaomia ae aveese atu le isi vaega o totoe.

E iai le faafitauli e tulai mai pe a tele naʻuā LDL i le toto. O le a faateleina ai le ono tupu mai o ni suiga e afaina ai alātoto. A oo ina tutupu mai faafitauli ia, o le a laitiiti le avanoa i alātoto ma faaitiitia ai le okesene e avatu e le toto. E taʻua lenei tulaga o le atherosclerossis. E faasolosolo mālie lava lenei faiga e aunoa ma le aliaʻi mai, e faitau sefulu tausaga faatoʻā aliaʻi mai ona āuga. O se tasi o āuga o le tau puni o le mānava, po o le tiga o le fatafata, e pei ona sa tupu ia Sio.

Pe a oo loa ina poloka atoa le alātoto, e masani lava ona o se alualutoto, ona lē toe ola loa lea o le vaega o le fatu lea na te mauaina le toto mai le alātoto lena. O ona āuga e faafuasei lava, e masani lava e ono aafia ai le soifua—lea ua lauiloa o le fatu pē. E tusa foi pe poloka na o se vaega o le alātoto e mafai ona pepē ai tisu o le fatu, lea atonu e lē faigofie ona iloa atu ni ona āuga i foliga vaaia mai i fafo. A poloka ia alātoto i isi vaega o le tino e mafai ona oo ai i le pē o le tino, po o le pē o le vae ua lē toe alu i ai se toto, e oo lava i le lē toe galulue o fatu gaʻo.

E lē o se mea la e ofo ai, e taʻua ia le LDL o cholesterol leaga, a o le HDL o cholesterol lelei. Afai e maualuga ia le LDL i le toto ia po o le maulalo foi o le HDL, ua telē le tulaga o le ono aafia i le maʻi fatu.a O le suʻeina o lou toto o le a faaalia mai ai ni faigata e ono tulai mai a o lei tāitai aliali mai i se tagata ni āuga iloga, e pei o le tau puni o le mānava. E tāua tele la ona fai ma siaki le maualuga o le cholesterol o i ou alātoto. Seʻi tatou tagai atu nei i le auala e aafia ai lea tulaga i au taumafa masani.

Taumafa Masani ma Cholesterol o i le Toto

O le cholesterol o se vaega masani o taumafa e maua mai i manu. O aano o manufasi, fuamoa, iʻa, moa, ma isi taumafa e fai mai i le suāsusu e maua uma ai le cholesterol. I le isi itu, o taumafa e maua mai i laau totō, e lē maua ai se cholesterol.

E saunia e le tino lava ia cholesterol e manaomia, o cholesterol la ia e maua mai i taumafa e tusa o se vaega ua faaopoopo atu i ai. O le tele o cholesterol e maua mai i a tatou taumafa e iu atu i le ate. O le tulaga masani, a o ulu atu cholesterol o a tatou taumafa i le ate, ona faia lea o le faagasologa a le ate ma faaitiitia le gaosia o ana lava cholesterol. O le faiga lea o loo faagasolo ai le faagaoioia o cholesterol o i le toto.

O le ā e tupu pe a faapea, ua tele naʻuā cholesterol i taumafa ma o le a lē vave ona faagaoioia e le ate? E foliga mai o le a tele loa cholesterol e ulu saʻo atu i sela o le alātoto. A tupu le mea lena, ona aliaʻi mai loa lea o le gaoioiga e taʻu o le atherosclerosis. E faapitoa le matautia o lenei tulaga pe a faaauau pea lava ona gaosi e le tino le aofaiga o cholesterol e masani ai e ui lava ina tele foi cholesterol o loo maua mai i taumafa masani. I le Iunaite Setete, e tasi mai i le 5 tagata o loo iai lenei faafitauli.

O le faaitiitia la o lou faaaogaina o cholesterol ia e maua mai i taumafa, o se faiga atamai. Peitai o le isi vaega o a tatou taumafa masani e iai sona aafiaga tele i gaʻo e toʻa i alātoto—o gaʻo e maua mai i taumafa e pei o le pata, susu, ma aano o manufasi.

O Gaʻo ma Cholesterol

E lua ituaiga ua vaevaeina i ai le gaʻo: o le gaʻo e toʻa ma le gaʻo e lē toʻa. O le gaʻo e lē toʻa e mafai ona taʻua o le monounsaturated po o le polyunsaturated. O gaʻo e lē toʻa e sili atu lena mo oe nai lo gaʻo e toʻa, ona o le taumafaina o gaʻo toʻa e faateleina ai cholesterol i le toto. E lua auala e fai ai lenei mea e gaʻo e toʻa: Latou te fesoasoani e gaosia le tele o cholesterol i le ate, latou te faaitiitia foi sela o le LDL i sela o le ate, ma faagesegese ai le aveesea o LDL mai le toto.

O gaʻo e toʻa e faapitoa lava ona maua i taumafa e saunia mai i aano o manu, e pei o le pata, lega o fuamoa, gaʻo, suāsusu, aisakulimi, aano o manufasi, ma moa. E maua tele foi i sukalati, le popo ma lona suauu, gaʻo faamanogi meaʻai, ma le palm oil. O lea ituaiga gaʻo e malō i le tele o taimi.

I le isi itu, o le gaʻo lē toʻa, e suāvaia i le tele o taimi. Atonu e fesoasoani ia taumafa e maua ai gaʻo monounsaturated ma gaʻo polyunsaturated e faaitiitia cholesterol i lou toto pe a e taumafa ai e suia ai taumafa o loo iai gaʻo e toʻa.b A o faaitiitia e gaʻo polyunsaturated, ia e taatele i suauu e maua mai i saga ma suauu e maua mai i fatu o sunflower, ia cholesterol lelei ma cholesterol leaga, o gaʻo monounsaturated, ia e tele i suauu olive ma suauu canola, latou te faaitiitia na o cholesterol leaga e aunoa ma le aafia ai o cholesterol lelei.

O le mea moni o gaʻo o se vaega tāua o a tatou taumafa. A aunoa ma le gaʻo, mo se faataitaiga, o le a lē maua ia vaitamini A, D, E, ma le K. Peitai e itiiti lava se gaʻo e manaomia e le tino. E masani lava ona faigofie ona maua e ala mai i fualaau faisua, o pi, o saito, ma fualaau taumafamata. O lona uiga la e tusa pe laitiiti gaʻo toʻa tatou te faaaogaina o le a lē faapea ai ua faamativaina ai le tino mai le mauaina o niuturiane (nutrients) o loo manaomia.

Le Pogai e Faaitiitia ai Gaʻo ma Cholesterol

Pe e faateleina ai ea cholesterol o le toto i le tausami i taumafa e tele ai cholesterol ma le gaʻo? E lē o le tulaga moni lena. O Tomasi, lea sa taʻua i le mataupu amata, sa filifili e suʻe lona toto ina ua uma le faatalatalanoaga o ia e le Ala Mai! Sa maua mai le iuga ma faaalia ai o loo paleni le fua o lona cholesterol. E aliali mai sa mafai e lona ate ona pulea le maualuga o le cholesterol.

Peitai, e lē o le uiga o lea mea e faapea ua aunoa Tomasi ma ni aafiaga e lamatia ai. I suesuega lata mai nei sa faaalia ai e faapea o cholesterol ia e maua mai i taumafa e ono aafia ma lamatia ai i le maʻi fatu e ese mai i le aafia ai i cholesterol o le toto. “O taumafa e tele ai cholesterol e māfua ai le maʻi fatu e tusa lava po o tagata e maulalo le cholesterol i le toto,” o le faamatalaga lena a Dr Jeremiah Stamler, mai le Northwestern University i le Iunaite Setete o Amerika. “O le mafuaaga lena e ao ai i tagata uma ona faaitiitia le taumafaina o cholesterol, tusa lava po o le ā le maualuga o cholesterol o o latou toto.”

O le isi vaega e faatatau lea i gaʻo o iai i au taumafa. O le tele o gaʻo i le toto, po o ni gaʻo e toʻa po o ni gaʻo e lē toʻa e maua mai i taumafa, e faapogaia ai le fepiitai faatasi o sela mūmū. O nei toto mafiafia e lē mafai ona ui atu i alātoto vaiti, ma lē maua ai e tisu ia niuturiane manaomia. O le fegasoloai o sela ua fepiitai i alātoto e faalavelavea ai foi le tufaina atu o le okesene e ui atu i alātoto, faaleagaina ai le pito i lalo, lea e māfua ai āuga leaga. Ae e iai foi le isi matautia o le tele o le gaʻo e taumafaina.

Kanesa ma Taumafa Masani

“O gaʻo uma lava—po o gaʻo e toʻa po o le lē toʻa—e aofia uma i le tupu aʻe o ni ituaiga sela o le kanesa,” o le faamatalaga lena a Dr John A. McDougall. I se tasi o suesuega sa faia faava-o-malo e faatatau i le kanesa o le māliuga (tulou) ma le kanesa o susu sa faaalia ai se eseesega tele i le va o atunuu i Sisifo, lea e tele ai gaʻo i mea taumafa, ma atunuu tauatiaʻe. Mo se faataitaiga, i le Iunaite Setete, o le kanesa o le māliuga o le kanesa lona lua lea le taatele i le tuufaatasiga o tamaloloa ma fafine, a o le kanesa o susu e aupito sili ona taatele i fafine.

E tusa ai o le faamatalaga a le American Cancer Society, o vaega o tagata e ō atu toe nonofo i se atunuu o loo maualuga le aafia ai i le kanesa e iu lava ina aafia ai i le kanesa o lena atunuu, e faalagolago i le umi o le taimi latou te faamasani ai i le ituaiga soifuaga iina atoa ma taumafa. Sa matauina e le tusi kuka a le sosaiete o le kanesa e faapea: “O tagata Iapani e malaga atu ma nonofo i Hawaii, ua latou ati ae āuga o le kanesa i atunuu i Sisifo: e maualuga le aafia ai i le kanesa o le māliuga ma susu (tulou), e maulalo le aafia ai i le kanesa o le manava—e tuufaafeagai ma le tulaga masani i tagata Iapani.” E manino mai, e fesootai le kanesa ma taumafa.

Afai o au taumafa masani e tele ai le gaʻo, o gaʻo toʻa, o cholesterol, ma calories, e manaomia ona e faia ni suiga. O taumafa masani pe afai ae lelei, e mafai ona maua ai le soifua maloloina ma aveesea ai āuga faamaʻia ona o le lē lelei o taumafa masani. Pe a mafaufau atu i le faia o se filifiliga e pei o le faia o se taotoga tiga o le fatu, lea e masani ona oo atu lona tau i le 40,000 tālā Amerika po o le sili atu foi, e manaomia tele la le filifilia o taumafa lelei.

E ala i le filifilia ma le atamai o au taumafa, e mafai ona paʻū ai lou mamafa, faaleleia ai ou faalogona, ma fesoasoani ia te oe e alofia po o le toe faaleleia o nisi gasegase. O fautuaga e faatatau i nei manatu o loo talanoaina i le isi mataupu.

[Faaopoopoga i lalo]

[Siata i le itulau 8]

O se vaaiga i alātoto: (1) o loo avanoa lelei, (2) ua amata ona tau poloka, (3) toetoe lava a poloka atoa