E Lua Āuga o se Mala

Tusia e le sui o le Ala Mai! i Mekisikō

O GODOFREDO ma Kisela, o se ulugalii Molimau a Ieova ma le la fanau laiti, sa i totonu o lo latou fale na faia i ni laupapa simā malolosi ina ua taia le talafatai o Oaxaca, i Mekisikō e le afā o Pauline. Sa saei ese taitasi e le afā laupapa simā. Na iu ina totoe na o se vaega o le tino o le fale, na tuua ai le aiga e matuā aunoa ma se mea e malu ai.

Sa sapai e Kisela le pepe e valu masina i ona lima ma isi tamaiti e toatolu o loo fepiiti atu ia te i laua ma Godofredo, sa latou tauivi ai ma matagi malolosi mo le sili atu i le lua itula. I nisi taimi, ona o le malosi o le afā, na pauū ai i latou i lalo ma faataavavale solo i latou i luga o le fola. I le iuga, na faasaoina i latou uma.

I Acapulco, ina ua vaai atu se tasi Molimau a Ieova e igoa ia Neli ua sau le vai i totonu o le fale, ona ia fafaguina ai loa lea o lona aiga. Sa matuā vave lava ona loloto le tulaga o le vai, ma o le aave o le vai na taenai atu ai ma Neli i lalo, ae na toso ese mai o ia e lana tama teine. Sa latou fepiiti i faavaa o faamalama ma vaavaai atu ma le matuā leai o se faamoemoe a o siisii aʻe le loloto o le vai e oo i o latou ua. Ae na latou faalogoina loa le leo o se tamaloa o valaau mai ia i latou. O lo latou tuaoi lea sa fesoasoani e aveese i latou mai le vai ma ave i latou i lona fale. Mai iina, sa latou matauina ai ma le gatete a o faatamaia atoatoa e se taavale le fale lea na latou ō ese mai ai i na o ni nai minute lava ua mavae.

I le aoauli o le Aso Lulu, ia Oketopa 8, 1997, na taia ai e le afā o Pauline le talafatai o le setete o Oaxaca i matagi malolosi e sili atu i le 100 maila [200 kilomita] i le itula. Ona oo lea i le Aso Tofi, ia Oketopa 9, i le taeaopo lava, na pepesi atu ai le afā i le setete o Guerrero, ae maise lava le aai o Acapulco, na fafati ai e matagi galu e tusa ma le 30 futu [10 mita] le maualuluga ma faapogaia ai ni lologa ia na tafiesea ai fale, taavale, manu, ma tagata. I le taimi ina ua alu ese le afā, sa iai ni lua tetele e sili atu i le 30 futu [10 mita] le loloto i mea sa iai auala. E tusa ai ma tala i le nusipepa, The News, na faia ai e le Koluse Mūmū i Mekisikō se faatatauga tuufaatasi e faapea, a itiiti mai e 400 tagata na maliliu ma le 20,000 i le 25,000 ua leai ni fale e nonofo ai i ia setete e lua. Ae peitai, i le lotolotoi o lenei mala, na faia ai ni gaoioiga faagaeeloto e faaalia ai le alofa faa-Kerisiano.

Le Tali Atu a Tagata o Ieova

Ina ua logotala e uiga i le afā o Pauline, na amata ai ona telefoni atu Molimau mai isi vaega o le atunuu atoa i le ofisa o le lālā o Molimau a Ieova i Mekisikō, o ē mananao e fia iloa po o le ā se mea e mafai ona latou faia e fesoasoani ai. Sa ofoina mai foi fesoasoani mai isi atunuu. Sa lei pine ae faamaopoopoina loa se komiti mo le tufatufaina atu o fesoasoani mo mala, ma sa tufatufaina atu loa le anoanoai o tone o meaʻai, lavalava, ma isi mea.

Sa faatauina foi mea faufale, ma na amataina loa ni galuega mo le toe faaleleia o fale e 360 ma nisi o Maota o le Malo na faaleagaina pe na faatamaia foi. E faitauafe uso ma tuafāfine sa pisi i le foaiina atu o meaalofa tauofo, faavasega, fafao i pusa, felauai, ma tiliva atu fesoasoani mo mala po o le toe faaleleia o mea ua faaleagaina.

Sa matuā faafiafiaina lava nisi faatauoloa i gaoioiga a Molimau na faapea ai foi ona latou foaiina mai ma le agalelei meaʻai, mea faufale, ma isi mea. Na faatau atu e isi faatauoloa ia i latou ia mea i ni tau paʻū. Na matuā faagaeetia lava Molimau ia na aafia i le alofa na faaalia atu ia i latou, ae maise lava ina ua latou faitau i tusi faalaeiau na aumai faatasi ma ia sauniuniga.

O le mea e faanoanoa ai, ona o José Faustino—o se Molimau e 18 tausaga—ma ni tagata se toatolu sa suesue ma Molimau, na maliliu ai i le afā. Sa matuā talisapaia e o latou aiga, ae maise lava mātua o José tatalo na faia mo i latou faapea ma faalaeiauga na tuuina atu e le faapotopotoga ia i latou.

Nisi o Iuga Mautinoa

Ina ua mavae atu le afā o Pauline, e toatele tagata na talosaga atu mo ni suesuega faale-Tusi Paia, e aofia ai ma aiga lē talitonu o Molimau, ma e toatele foi tuaoi sa sili ona naunau e faalogologo i le feau o le faamoemoe a Molimau. E lē gata i lea, sa auai foi Molimau i le tufatufaina atu o meaʻai o fesoasoani mo mala i le lautele. I se tasi o mea na tupu, ina ua fesiligia e se Molimau se tamaloa pe aisea na ia filifilia ai Molimau a Ieova e tufatufaina atu meaʻai na foai faameaalofa mai e lana kamupani, na tali mai le tamaloa: “Auā ua ou iloa e ese le maopoopo o outou ma e faamaoni. E lē gata i lena, ae ua outou iloa lelei lava po o ai e sili ona manaomia lenei fesoasoani, auā e tou te iloa tagata i la outou oganuu.”

A o lalata mai lava le iuga ma o loo tele pea mala i le lalolagi aoao, e avea pea o se faalaeiau le vaai atu o faatinoina mataupu silisili o le Tusi Paia, e ui lava ina fesagai ma tulaga faigata.

[Ata i le itulau 30]

O talavou o loo fesoasoani i faugafale

[Ata i le itulau 31]

Molimau o loo fausia se Maota fou o le Malo i Oaxaca ina ua mavae le afā o Pauline