O Aiā Tatau a Tagata ma a Latou Mea Sese i Aso Nei

TALU ai nei lava na ausia ai se laasaga iloga e i latou e talisapaia aiā tatau a tagata. Muamua, sa latou faamaopoopoina le sili atu i le 1,000 faalapotopotoga mai atunuu e 60 ma fai aʻe ai se faalapotopotoga e taʻua o le Tauiviga Faava-o-Malo e Faasāina Maina Tatao (International Campaign to Ban Landmines), (ICBL). Ona sosoo lea, ma lo latou faamalosia e ala atu i se feagaiga faava-o-malo ina ia taofia nei auupega. Ina ua mavae lena, sa maua ai e le ICBL ma lo latou taʻitaʻi lē faavaivai, le tamaitai Amerika o Jody Williams, le faailoga o le Nobel Peace Prize mo le 1997.

Ae ui i lea, o nei taunuuga lelei, e ō mai faatasi ma se faamatalaga faaopoopo e faateʻia ai. E pei ona matauina i le Human Rights Watch World Report 1998 e faapea, o le avea o aiā tatau a tagata o se mataupu a le lalolagi aoao o loo “tumau pea ona finauina.” Ma o le a lē tuuaia ai na o malo tautalatasi lē taualoa. Ua faaauau le lipoti i le faapea mai, “o malo malolosi, ua aliaʻi mai ai se faanaunauga e lē amanaiaina aiā tatau a tagata pe a faamaonia le lē fetaui ma manaoga tau tamaoaiga ma i taimi o taua—o se vaivaiga e taatele i Europa ma le Iunaite Setete.”

Mo le faitau miliona o tagata i le lalolagi, e lē mafai ona faaleamanaiaina le faaleagaina o aiā tatau a le tagata. O lo latou tulaga i aso taitasi o loo afaina pea i le faailogatagata, le matitiva, le matelaina, le sauaina, le tosoteine, le faileagaina o tamaiti, le faapologaina, ma le maliu ona o le sauā. O i latou o loo aafia ai i nei faigata, a fua atu i tulaga saoloto o loo taʻu mai i le anoano o feagaiga mo aiā tatau a tagata, e matuā va i sini ma le tulaga moni o latou iai. O le mea moni lava ia, mo le toatele o tagata, e oo lava i aiā tatau autū o loo lisi mai i mataupu e 30 o le Faalauiloaga Faalauaitele o Aiā Tatau a Tagata o loo avea pea ma folafolaga e lē faataunuuina. Ina ia faataitai, iloilo puupuu po o faapefea i nisi o aiā tatau taualoa o loo i le Faalauiloaga ona faatinoina i aso taitasi.

E Tutusa Tagata Uma?

O tagata soifua uma na soifua mai e saoloto ma e tutusa uma i le mamalu ma aiā tatau.—Mataupu 1.

O le uluai tusiaina o le Faalauiloaga Faalauaitele Mataupu 1 sa taʻua ai e faapea: “E tutusa tagata . . . uma lava.” Ae ui i lea, ina ia faamautinoa o lenei faasilasilaga o le a lē uiga faapea e lē o aofia ai fafine, sa finau maumauai ai sui tamaitai o le komisi na tusia ina ia suia le gagana. Sa mālō la latou finau, ma na suia le “tutusa tagata . . . uma lava” i le “O tagata soifua uma . . . e tutusa uma.” (O upu faasisipa o ā matou ia.) Ae pe na avea ea le suia o le gagana o lenei feagaiga ma auala e suia ai le tulaga o fafine?

Ia Tesema 10, 1997, le Aso o Aiā Tatau a Tagata, na taʻu atu ai e le Masiofo o le Iunaite Setete o Hillary Clinton i Malo Aufaatasi e faapea, o loo faaauau pea ona “manatu maulalo le lalolagi i fafine.” Sa ia aumai ni nai faaaoaoga: O le 70 pasene o ē matitiva i le lalolagi o fafine. O le lua vae tolu o le 130 miliona o tamaiti o le lalolagi ua lē mafai ona aʻoʻoga o teine. O le lua vae tolu o le 96 miliona o le lalolagi e lē iloa faitau ma tusitusi o fafine. O loo matuā mafatia lava foi fafine i sauaga i aiga ma faiga faaleituaiga, ia o loo tumau pea, e pei ona faaopoopo mai le Afioga a le faletua o Clinton, ona “avea ma faiga o loo lautele ona faaleagaina ai aiā tatau a tagata i le lalolagi ae e tau lē lipotia mai foi.”

O nisi teine ua aafia lava i faiga sauā a o lei fananau mai. Ae maise lava i nisi atunuu i Asia, o nisi tinā ua faapaʻū a latou tama teine e lei fananau mai ona e latou te mananao i tama tama na i lo tama teine. I nisi nofoaga ona o le faanaunauga mo ni tama tama, ua avea ai le filifilia o sela fanautama ma pisinisi ua alumia tele. O se tasi o nofoaga sa faasalalau le latou galuega e ala i le fautua mai faapea e sili atu le faaalu i le taimi nei o le 38 tālā Amerika e faauma ai le ola o se pepe teine e lei fanau mai na i lo le faaalu mulimuli ane o le 3,800 tālā Amerika e totogi atu i lana tane pe a faaipoipo. O faasalalauga faapena e matuā taulia lava. I se suesuega sa faia i se tasi o falemaʻi tele i Asia na maua ai e faapea o le 95.5 pasene o pepe sa iloa na faapaʻū o pepe teine. O le faanaunauga mo ni atalii ua taatele foi i isi vaega o le lalolagi. Sa fesiligia se tasi sa avea muamua ma siamupini o le fusu i le Iunaite Setete pe toafia sana fanau ua iai, fai mai lana tali: “E tasi le tama ma mea sese e fitu po o teine e fitu.” Na matauina e le lomiga a Malo Aufaatasi o le Women and Violence e faapea o le “suia o uiga faaalia o tagata ma manatu agaʻi i fafine e umi lava se taimi e faia ai—atonu po o se tupulaga, o le talitonuga lena o le toatele, pe o le sili atu foi.”

O Tamaiti e Lei Ola Aʻe i le Olaga Faatamaiti

E leai se tasi e tatau ona faapologaina pe fai ma se auauna e aunoa ma ni saolotoga; o le faapologaina ma fefaatauaiga o pologa e tatau ona faasāina i so o se auala lava.—Mataupu 4.

E tusa ai i faamaumauga ma tusitusiga, ua lē o toe iai ni pologa. Ua sainia e atunuu le tele o feagaiga e taʻu mai ai o le faia o ni pologa e lē faaletulafonoina. Peitai, e tusa ai ma le Sosaiete e Tetee i Faiga Faapologa i Peretania, e lauiloa o le faalapotopotoga pito i leva lea o aiā tatau a le tagata i le lalolagi, “e sili atu le toatele o pologa i aso nei na i lo se isi lava taimi.” O faiga faapologa i aso nei e aofia ai auala eseese o loo faaleagaina ai aiā tatau a tagata. O le faamalosia o tamaiti i galuega ua taʻua o se tasi lea o faiga o loo faapologa ai i aso nei.

O se tasi o faaaoaoga faanoanoa, o Derivan, o se tamaitiiti i Amerika i Saute. ‘Ua mafoʻefoʻe nai ona lima laiti i le uuina o lau talatala o le sisalana, o se laau e faaaogā e fai ai faamalū. O lana galuega o le laʻu o lau laau mai le fale o loo teu ai ona ave lea i le mea o loo iai le masini e faia le galuega pe tusa o le 300 futu [90 mita] lona mamao ese atu. E oo ane i le iuga o le 12 itula e faigaluega ai i le aso, tusa ua tone le mamafa o lau laau ua ia laʻuina. Na amata ona galue mai Derivan ina ua lima ona tausaga. I le taimi nei ua 11 tausaga lona matua.’—World Press Review.

E fuafuaina e le Ofisa Faava-o-Malo o Leipa e faapea o le kuata o le piliona o tamaiti i le va o le 5 ma 14, o tamaiti ia o loo faia galuega mamafa i aso nei—o se vaega o le aufaigaluega laiti e toeitiiti lava tutusa le toatele ma le tuufaatasiga o le faitau aofai o tagatanuu o Pasili ma Mekisikō! O le toatele o nei tamaiti ua aunoa ma le ola aʻe i le olaga faatamaitiiti o loo faigaluega i lalo o le eleele, o loo tatosoina pusa o loo iai koale; o loo galulue i eleele faataufusi i le aoina o fua o faatoaga; po o le punonou i masini lalaga i le lalagaina o fala fola fale. E oo lava i tamaiti laiti—e tolu, fa ma le lima tausaga le matutua—e tuufaatasi i ni vaega mo le suaina, le totoina, ma le aoina o fua o faatoaga mai lava i le taeao seʻi oo i le po. Fai mai se tasi faifaatoaga i se atunuu i Asia, “e sili ona taugofie ‘⁠tamaiti’ na i lo masini ma e atamamai na i lo povi.”

Le Filifilia ma le Suia o le Tapuaiga a se Tasi

E i tagata uma le aiā tatau i le saolotoga o manatu, le loto fuatiaifo ma tapuaiga; e aofia ai i lenei aiā tatau le saolotoga e sui ai lana lotu.—Mataupu 18.

Ia Oketopa 16, 1997, na maua ai e le Fono Maualuga a Malo Aufaatasi se “lipoti e faatatau i le aveeseina o so o se mea e afaina ai saolotoga faalotu.” O le lipoti, sa saunia e le Fai Lipoti Faapitoa a le Komisi o Aiā Tatau a Tagata, e suafa ia Abdelfattah Amor, sa lipotia ai le faaauau ona solia o le Mataupu 18. I le tautala e faatatau i le tele o atunuu, sa taʻua i le lipoti le anoano o mea tutupu e pei o ‘faiga faasoesa, taufaamataʻu, faiga lē alofa, puʻe faapagota, loka i potu taofia, o tagata e teʻi lava ua lē iloa po o fea o iai, ma le fasiotia.’

E faapena foi, le 1997 Human Rights Reports, na saunia e le Matagaluega Faatemokalasi, Aiā Tatau a Tagata, ma Galuega i le Iunaite Setete, na taʻua ai e faapea e oo lava i atunuu ua lauiloa i faiga faatemokalasi ae o lea “ua saili atu e faatapulaa le saolotoga o faatuatuaga laiti e lē toatele nisi e iai, ua faavasegaina i latou o ‘lotu mavae.’” O nei faiga e ao ona manatu mamafa i ai. Na taʻua e Willy Fautré, le peresitene o le faalapotopotoga o le Human Rights Without Frontiers i Brussels e faapea: “O le saolotoga faalotu o se tasi o faailoaga sili ona lelei o le tulaga masani o saolotoga a le tagata i so o se sosaiete.”

Tigaina Galuega ae Leai ni Tupe

So o se tasi lava e faigaluega e iai le aiā tatau mo se totogi talafeagai ina ia mafai ai e ia ma lona aiga ona soifua e tusa o le mamalu faaletagata.—Mataupu 23.

O i latou e salaina le tolo i le atu Karipiane latou te ono maua le tolu tālā Amerika i le aso, ae o le tau o mea o loo latou nonofo ai atoa ma mea faigaluega ua faapogaia ai i latou e nofo aitalafu i ē e ona faatoaga. E faaopoopo atu i lena, e lē totogia i latou i ni tupe ae o fasi pepa e taʻu mai ai le aofai o le tupe e faaaogā. Ma talu ai na pau lava le faleoloa e mafai ona ō i ai le aufaigaluega e na o le faleoloa o le kamupanī e ona faatoaga, ua faamalosia i latou e faatau mai ai iina a latou gaʻo faimeaai, araisa, ma pi. Peitai ina ia totogi le auaunaga mo le talia o pepa faatau a le aufaigaluega, e taofi e le faleoloa le 10 i le 20 pasene o le aofai o le tupe o loo tusia i le pepa faatau. Na taʻua e Bill O’Neill, o le faatonu o le Komiti a Loia mo Aiā Tatau a Tagata i se faasalalauga i le leitio a Malo Aufaatasi e faapea: “E oo ane i le iuga o le seleselega, e aunoa ma sa latou tupe o iai mo le tele o vaiaso, ma masina o galuega tigaina ma le fita. E aunoa ma sa latou sene o teuina, ma toetoe lava a lē feautaʻi le tausiga o i latou i lena vaitaimi.”

Le Tausiga Faafomai mo Tagata Uma?

E i tagata uma lava le avanoa i tulaga lelei o le soifuaga lea e manaomia mo le soifua lelei ma le sologa lelei o ia ma lona aiga, e aofia ai taumafa, o laei, o fale ma le tausiga faafomai.—Mataupu 25.

‘O Ricardo ma Justina o ni faifaatoaga matitiva mai Amerika Latina e nonofo pe tusa ma le 50 maila [80 kilomita] mai le aai pito latalata ane. Ina ua maʻi Ema le la pepe teine, sa la aveina atu o ia i se falemaʻi faapisinisi sa latalata ane, peitai na teena i laua e le aufaigaluega a le falemaʻi ona ua mautinoa e lē mafai e Ricardo ona totogi le pili. I le aso na sosoo ai, na nonō mai ai e Justina se tupe mai i o la tuaoi ina ia totogi ai le pasese ma faia loa le malaga umi agaʻi i le aai. Ina ua taunuu Justina ma le pepe i se falemaʻi laitiiti o le mālō, na taʻu atu ia Justina e faapea e leai se moega o avanoa ae seʻi toe foi mai i le isi taeao e sosoo ai. Ona e leai sona tauaiga i le aai ma e leai se tupe e totogi ai se potu totogi, sa ia faatali ai i le po atoa i luga o se laulau i le maketi faitele. Sa opoopo mai e Justina le pepe ia te ia ina ia faamafanafana ma maua se puipuiga, peitai na lē taulau. Na maliu ai lava si pepe o Ema i lena po.’—Human Rights and Social Work.

I le lalolagi, e 1 mai le toʻa 4 tagata o loo tau faasoa le tālā Amerika e tasi e ola ai i le aso. O loo latou faafesagaia le tulaga pagatia lava e tasi e pei ona oo ia Ricardo ma Justina: O le tausiga faafomai mai falemaʻi faapisinisi o loo avanoa ae e lē gafatia ona totogi, ae o falemaʻi mo le lautele e gafatia ona totogi ae e lē avanoa. Ma le faanoanoa lava, e ui lava o loo maua e le sili atu i le piliona o tagata matitiva le ‘aiā tatau i tausiga faafomai,’ latou te lē o maua lava aogā mai le tausiga faafomai.

O le lisi e faamataʻuina ai e faatatau i le faaaogāseseina o aiā tatau a tagata o loo alu pea. O tulaga o mea tutupu e pei ona taʻua i luga e mafai ona faateleina e oo atu i le faitau selau miliona. E ui lava i taumafaiga iloga a faalapotopotoga o aiā tatau a le tagata, atoa ma le tuutoina atu o le faitau afe o tagata o loo galulue ai o ē o loo lamatia moni ai o latou soifua ona o taumafaiga e faaleleia le tulaga o tamaloloa, fafine, ma tamaiti i le lalolagi atoa, ae o loo tumau pea ona avea aiā tatau a tagata mo tagata uma ua na o se miti. Pe iai ea se taimi o le a avea ai ma mea moni? O le a iai moni lava, ae e iai suiga e manaomia ona fai muamua. O le a talanoaina i le mataupu o loo sosoo mai le lua o nei suiga.

[Ē Ana le Ata i le itulau 8]

Courtesy MgM Stiftung Menschen gegen Minen (www.mgm.org)

[Ē Ana le Ata i le itulau 9]

UN PHOTO 148051/J. P. Laffont—SYGMA

WHO photo/PAHO by J. Vizcarra