Māfuaaga e Faatuatuaina ai le Tusi Paia

4. Saʻo Aʻiaʻi Faasaienisi

E mataʻutia le alualu i luma o le faasaienisi i aso nei. O le iʻuga la, ua suia malamalamaga tuai i mea fou. O ni mea na muaʻi talitonu i ai o mea moni, ua avea nei ma mea e lē moni. O tusi faasaienisi e fai ma toe teuteu.

E LĒ o se tusi faasaienisi le Tusi Paia. E ui i lea, a oo i mataupu faasaienisi, e maufaatuatuaina le Tusi Paia i mea o loo tusia ai, faapea foʻi ma mea e lē o taʻua ai.

E faavae i mea moni manatu faasaienisi o loo iai. E tele talitonuga lē saʻo na talia e tagata i aso anamua. O talitonuga e faapea e mafolafola le lalolagi, ma o loo iai ni mea o loo tautau ai i luga le lalolagi. A o leʻi taitai iloa e le faasaienisi le auala e pipisi ma puipuia ai faamaʻi, sa faaaogā e fomaʻi ni auala e lē aogā ma atonu i nisi taimi e mataʻutia. E leai ma se taimi i mataupu e 1,100 o le Tusi Paia o loo taʻua ai ni mataupu faasaienisi e lē o faavaeina i mea moni, po o ni gaoioiga e lamatia ai.

Faamatalaga e saʻo atoatoa faasaienisi. I le pe a ma le 3,500 tausaga ua mavae, na faapea mai ai le Tusi Paia o loo “tautauina le lalolagi, a e leai se tautaulaga.” (Iopu 26:7) I le senituri lona valu T.L.M., na faasino atu ai ma le manino e Isaia faapea e “faataaliʻoliʻo [pe lapotopoto] . . . le lalolagi.” (Isaia 40:22) O le lalolagi e lapotopoto ma e leai sona tautaulaga e vaaia—pe e fou ea lenā faamatalaga?

Na tusia i le pe ā ma le 1500 T.L.M., Tulafono a Mose (o loo maua i uluaʻi tusi e lima o le Tusi Paia) ni tulafono talafeagai e tusa ai ma le faleesea o ē mamaʻi, le auala e taulima ai tagata oti, ma le tiaʻiina o otaota vale.—Levitiko 13:1-5; Numera 19:1-13; Teuteronome 23:13, 14.

Ona o le fai ma faaaogā o mea vāai malolosi e matamata ai i le vateatea, na faapea mai ai nisi saienitisi na faafuaseʻi ona “iai” le vateatea. E lē ioe uma saienitisi i le faamalamalamaga o lenei manatu. Na faapea mai se polofesa: “O se vateatea e iai se amataga e tatau ona iai sē na māfua ai; auā po o ai e mafaufau i le iai o se vateatea ae e leai se tasi na faia?” A o leʻi taitai iai ni mea vāai mamao malolosi, na faapea mai le fuaiupu muamua o le Tusi Paia: “Na faia e le Atua le lagi ma le lalolagi i le amataga.”—Kenese 1:1.

E ui o le Tusi Paia o se tusi mai anamua ma e tele mataupu o loo iai, ae e saʻo mea faasaienisi o loo iai. Pe lē tatau ea la ona tatou uaʻi ma naunau atu i lenā tusi?a

[Faaopoopoga i lalo]

[Faamatalaga faaopoopo i le itulau 26]

A o leʻi taitai ona iai nei malamalamaga, na manino ma saʻo le faamatalaga a le Tusi Paia e lapotopoto ma e leai se “tautaulaga” o le lalolagi

[Ē Ana le Ata]

U.S. Fish & Wildlife Service, Washington, D.C./NASA