Le Luʻi: Tele Mea e Fai

O LEA e mananaʻo lau fanau e te uaʻi atu. E faapena foʻi lau pule o le galuega. E iai se mea o loo manaʻo lou toʻalua e te faia. Ae o loo e taumafai foʻi e tausia lou tuaa ua maʻi. E lē o le ituaiga olaga lea na e manaʻo i ai, peitaʻi o mea ia e tatau ona e faia i aso uma. Ua e taumānatu, “O le ā se mea e mafai ona ou faia? O loo manaʻomia aʻu e tagata.” O le faia o mea uma o loo latou mananaʻo ai atonu e lē aogā iā te oe po o i latou. E mafai faapefea ona e toe pulea lou olaga?

FAAAʻOAʻOGA FAALE-TUSI PAIA: MOSE

I le avea ai na o ia ma faamasino i Isaraelu i taimi o le Tusi Paia, sa ono manatu Mose o loo ia faia mea sa manaʻomia ona fai. Peitaʻi na faapea atu i ai le tamā o lana avā: ʻE lē lelei le auala o loo e taulimaina ai ia mataupu. E mautinoa e te lēlavā ai.’ Sa ia fautuaina Mose ia tofia ni tane agavaa e faamasinoina tagata, ae ia tuu atu iā Mose na o mataupu tetele e na te taulimaina. I le iʻuga, sa faamautinoa atu e le tamā o le avā a Mose iā te ia e faapea: “E mautinoa e te gafatia le galuega, ma e ō atu foʻi tagata i le mea e nonofo ai ma le filemu.”​—Esoto 18:17-23.

MEA UA FAIA E DELINA

E pei ona taʻua i le mataupu amata, o Delina e maua i le maʻi e faalētonu maso o le tino. E na te tausia foʻi nai ona tei e toʻatolu e lē atoatoa le malosi o le tino. Ua faapea mai Delina: “Ua ou iloa o le ʻalofia o le faimeatuu ma le popole e faatatau i le isi aso, e fesoasoani e faaitiitia ai le popole. O le talanoa atu i isi e faatatau i loʻu tulaga ua ou maua ai le fesoasoani mai i isi, e aofia ai laʻu tane. Ou te faaalu foʻi sina taimi i taeao uma e fai ai laʻu togālaau, o se mea ou te fiafia tele e fai.”

MEA E MAFAI ONA E FAIA

Pe afai ua pulea lou olaga i le tele o mea e fai, ia taumafai e fai mea nei:

• Saʻili se tasi e fesoasoani iā te oe. O se faaaʻoaʻoga, po o iai sau fanau i le fale po o ni ou tauaiga ma uō e nonofo latalata ane, e mafai ona fesoasoani iā te oe?

• Faailoa atu i isi mea o loo e manaʻomia. O se faaaʻoaʻoga, talanoa i lou pule i le galuega pe afai e te lē gafatia ona fai mea o loo manaʻo e fai. E lē faapea e te taumafai e faamataʻu lou pule o le a e lē toe faigaluega. Ae ia faailoa i ai tulaga faigatā o loo feagai ma oe, ma atonu o le a lotomalie ai o ia e faaitiitia au galuega.

• Tusi i lalo po o le ā le tele o au mea e fai i le vaiaso. Pe e mafai ona tuu atu nisi o na mea i isi e latou te faia?

• Ia faautauta i le taliaina o valaaulia mo tafaoga ma evaevaga. Pe afai e lē mafai ona e auai ona e lē lava lou taimi po o le malosi, ia fai atu ma le agalelei i le tagata e leai.

Manatu Autū: Pe afai e te taumafai e fai mea uma, o le iʻuga e ono lē mafai ona e faia se mea.