Ō Mose ma Arona e Vaai Farao

INA ua toe foi atu Mose i Aikupito, sa ia taʻu atu i lona uso o Arona ia vavega uma. Ma ina ua faaali e Mose ma Arona i tagata Isaraelu ia vavega uma, na talitonu uma tagata o loo i ai Ieova ma i latou.

Ona o atu lea o Mose ma Arona e vaai Farao. Sa la faapea atu: ‘Ua tulei mai Ieova le Atua o Isaraelu, “Tuu mai oʻu tagata e o mo aso e tolu ina ia tapuai mai i a te aʻu i le vao.”’ Ae na tali mai Farao: ‘Ou te le talitonu i a Ieova. Ma ou te le tuuina atu Isaraelu e ō.’

Sa ita Farao, auā ua mananao tagata e malolo mai galuega ae tapuai i a Ieova. O lea la sa atili ai ona faafaigaluega tigaina i latou. Sa tuuaia e Isaraelu Mose i mea leaga ua oo i a i latou, ona faanoanoa lea o Mose. Ae sa fai atu Ieova e aua le popole. ‘O le a ou faia se mea ina ia faataga mai ai e Farao oʻu tagata e ō.’

Ona toe o atu lea o Mose ma Arona i a Farao. Ma sa la faia ai se vavega. Sa togi i lalo e Arona lona tootoo ma liu gata ai. Peitai sa o mai foi le au popoto a Farao ma togi i lalo a latou tootoo ma liu gata foi. Ae sei vaai! Ua ai e le gata a Arona gata uma a le au popoto. Ae sa lei faatagaina pea e Farao tagata Isaraelu e ō.

Ua tatau nei ona aʻoaʻoina e Ieova Farao i se lesona. Pe e te iloaina na faapefea? E ala i le aumaia o ni mala e 10, po o puapuaga e tele, i Aikupito.

Ina ua uma le tele o mala, sa aami atu loa e Farao Mose, ma fai atu: ‘Ia taofi le mala, ona ou faataga ai lea o Isaraelu e ō.’ Ae afai e uma le mala, e sui foi le manatu o Farao. E lē tuuina atu loa Isaraelu e ō.

Po e te iloaina ia mala uma e 10? Sue le itulau ma o le a tatou aʻoaʻoina i latou.