O Mala Muamua e Tolu

Na faamalosia tagata Isaraelu e galulue mamafa o ni pologa. Na auina atu e Ieova Mose ma Arona e taʻu atu le feʻau lenei: ʻIa tuu mai loʻu nuu e ō, ina ia mafai ona latou tapuaʻi mai iā te aʻu i le toafa.’ Ae na faamaualuga Farao ma tali mai: ʻOu te lē popole i le mea ua fai mai ai Ieova, ou te lē tuuina atu tagata Isaraelu e ō.’ Ona atili ai lava lea ona faapologa e Farao tagata Isaraelu. O lea na faia ai e Ieova se mea ina ia aʻoaʻoina ai e Farao se lesona. Pe e te iloa po o le ā lenā mea? Na faaoo e Ieova Mala e Sefulu i Aikupito. Na faapea atu Ieova iā Mose: ʻE lē o faalogo mai Farao iā te aʻu. I le taeao, o le a iai o ia i le vaitafe o le Naila. Ia e alu ma taʻu atu i ai talu ai ua ia lē tuuina mai oʻu tagata e ō, o le a liu toto le vai atoa o le Naila.’ Na usitaʻi Mose i lenā faatonuga ma alu atu iā Farao. Na vaavaai atu Farao a o tā e Arona le vaitafe o le Naila i lona tootoo, ma liu toto ai le vaitafe. Na amata ona manogi leaga le vaitafe, pepē iʻa, ma ua lē toe maua se vai mamā e feinu ai tagata. Ae e leʻi manaʻo lava Farao e faasaʻoloto tagata Isaraelu.

I le fitu aso na sosoo ai, na toe auina atu e Ieova Mose iā Farao e taʻu atu i ai le feʻau lenei: ʻPe a e lē tuuina mai loʻu nuu e ō, o le a tumu Aikupito i rane.’ Na faaloaloa i luga e Arona lona tootoo, ma amata ai ona tele rane i Aikupito. Na iai rane i so o se mea, o totonu o fale, luga o moega ma totonu o a latou ipu meaʻai. O lea na fai atu ai Farao iā Mose ina ia talosaga atu iā Ieova e taofi lenei mala. Na ia folafola atu o le a ia tuu atu tagata Isaraelu e ō. O lea na taofi ai loa e Ieova le mala. Na faaputu e tagata Aikupito rane na pepē, ma na amata ona manogi leaga ai le nuu. Ae e leʻi faatagaina lava e Farao tagata Isaraelu e ō.

Ona faapea atu lea o Ieova iā Mose: ʻE tatau iā Arona ona tā le eleele i lona tootoo, ona avea ai lea o le efuefu o le laueleele ma namu po o manu ninii e taufeū.’ E leʻi umi ae iai namu i so o se mea. E oo lava i isi tagata Aikupito na latou faapea atu iā Farao: ʻO lenei mala e mai i le Atua.’ Ae e leʻi faatagaina lava e Farao tagata Isaraelu e ō.