Ua Afio Atu le Tupu i Ierusalema i Luga o se Tamaʻi Asini

Ua oo nei i le Aso Sa, Nisani 9, ma ua tuua e Iesu ma ona soo Petania ae agaʻi atu i Ierusalema. A o latou latalata atu i Petefake lea o loo tū i le mauga o Olive, ua ia faapea atu i isi o ona soo e toʻalua:

“Ia oulua ō i le nuu lea o loo oulua vāai atu i ai, e lua te maua ai se asini o loo nonoa ma lana tama, ia tatala ma aumai iā te aʻu. Afai e fai mai e se tasi se upu iā te oulua, ia oulua fai atu i ai, ʻE manaʻo i ai le Alii.’ Ona ia tuuina mai loa lea.”—Mataio 21:2, 3.

E lē o malamalama le ʻausoo e iai le fesootaʻiga o faatonuga nei a Iesu ma valoaga o le Tusi Paia. Ae na faatoʻā malamalama mulimuli ane i latou, i le uiga o le faataunuuga o le valoaga a Sakaria. Sa valoia e Sakaria o le a afio atu le Tupu folafolaina a le Atua i Ierusalema, “e lotomaulalo o ia, ma o loo tiʻetiʻe i le asini, i luga o se manu ua matua, o le tama foʻi a le asini fafine.”—Sakaria 9:9.

Ua ō atu nei soo e toʻalua i Petefake ma ua la ave le tamaʻi asini ma lona tinā. Ua fesili ane nisi o loo tutū ai i inā: “Aiseā ua oulua tatala ai le tamaʻi asini?” (Mareko 11:5) Ae ina ua latou iloa o loo manaʻo i ai le Alii, ona latou tuu atu lea o soo e ō ma ave nei manu iā Iesu. Ua fofola e soo o Iesu o latou ofu tele i luga o le asini fafine ma lana tama, peitaʻi, ua tiʻetiʻe Iesu i luga o le tamaʻi asini.

A o tiʻetiʻe atu Iesu i Ierusalema, ua faatoʻateleina le motu o tagata o loo iai i inā. Ua fofola e le toʻatele o latou ofu i luga o le ala, ae ua tā mai e isi “lālā o laau mai le vao” ma folasia ai. Ua latou alalaga atu: “Matou te tatalo, ia faaola iā te ia! E manuia lē e maliu mai i le suafa o Ieova! E manuia le malo o loo fotuaʻi mai o lo matou tamā o Tavita!” (Mareko 11:8-10) Ua feita le ʻau Faresaio o loo i le motu o tagata i nei faamatalaga, ma ua latou fai atu iā Iesu: “Le Aʻoaʻo e, ia aʻoaʻi atu i ou soo.” Ae ua tali mai Iesu: “Ou te fai atu iā te outou, afai e lē alalaga mai nei tagata, e alalaga mai lava maa.”—Luka 19:39, 40.

A o vaavaai atu Iesu i Ierusalema, ua amata ona tagi o ia ma faapea atu: “Maʻimau pe ana e iloa i lenei aso mea e maua ai le filemu, a o lenei ua natia i lau vaai.” E faasalaina lava Ierusalema ona o le lē usiusitaʻi ma le loto i ai, e pei ona valoia e Iesu: ʻE fau e ou fili se pā e maamaʻai ona tumutumu, e siʻo ai iā te oe, ma faapuapuaga iā te oe mai i itu uma, ma latou te olopalaina oe ma lau fanau i le eleele, latou te lē tuua se maa i luga o se isi maa.’ (Luka 19:42-44) Na taunuu moni lava upu a Iesu ina ua faaumatia Ierusalema i le 70 T.A.

A o ulu atu Iesu i totonu o Ierusalema, “ua vevesi le aai atoa ma faapea ane: ʻO ai ea lenei tagata?’” Ua fai atu pea le motu o tagata: “O Iesu lenei, le perofeta mai Nasareta i Kalilaia!” (Mataio 21:10, 11) Ua faamatala atu e i latou sa vāai iā Iesu o faatūina Lasalo mai i le oti lenei vavega i isi tagata. Ua lē fiafia le ʻau Faresaio ona ua leai se mea e latou te mafaia. Ua faapea ane le tasi i le isi: “Ua mulimuli atu le lalolagi ia te ia.”—Ioane 12:18, 19.

E pei lava o lana masani pe a asiasi atu i Ierusalema, ua alu atu nei Iesu i le malumalu e aʻoaʻo ai, ma faamālōlō ai ē tauaso ma ē pipili. Ua feita le ʻaufaitaulaga sili ma le ʻautusiupu ina ua vāai i mea ua faia e Iesu, ma faalogo atu i tama o loo alalaga i le malumalu e faapea, “Matou te tatalo ia faaolaina le Alo o Tavita!” Ua fesili atu taʻitaʻi lotu iā Iesu: “Po o e faalogo atu ea i a latou upu?” Ua tali mai o ia: “Pe e tou te leʻi faitau ea e faapea, ʻUa e saunia le viiga e ala mai i gutu o tamaiti ma pepe’?”—Mataio 21:15, 16.

Ua silasila solo Iesu i mea o loo i le malumalu. Ua leva le aso, ma ua ō ese loa o ia ma ona aposetolo. A o leʻi oo iā Nisani 10, ua toe foʻi o ia i Petania ma mālōlō ai i inā i le pō o le Aso Sa.