O Ai Uō a le Atua?

O Iesu Keriso o le Alo o Ieova ma o lana uō sili ona vāvālalata ma faapelepeleina. A o leʻi soifua o ia o se tagata i le lalolagi, na soifua Iesu i le lagi o se peresona agaga e sili ona malosi. (Ioane 17:5) Ona afio mai lea o ia i le lalolagi ina ia aʻoaʻo tagata i le upu moni e faatatau i le Atua. (Ioane 18:37) Na ia foaʻiina atu foʻi lona soifua faaletagata ina ia laveaʻiina tagata usiusitai mai le agasala ma le oti. (Roma 6:23) Ua avea nei Iesu ma Tupu o le Malo o le Atua, o se pulega faalelagi lea o le a faaooina mai le Parataiso i lenei lalolagi.​—Faaaliga 19:16.

O agelu o uō foʻi a le Atua. Sa leʻi amataina e agelu o latou olaga o ni tagata i le lalolagi. Na foafoaina i latou i le lagi a o leʻi faia e le Atua le lalolagi. (Iopu 38:4-7) E faitau miliona agelu o loo iai. (Tanielu 7:10) E mananaʻo nei uō faalelagi a le Atua ina ia aʻoaʻoina e tagata le upu moni e faatatau ia Ieova.—Faaaliga 14:6, 7.

E iai foʻi uō a le Atua i le lalolagi; na te taʻua i latou o ana molimau. O le molimau i se faamasinoga e na te faamatalaina atu mea na te iloa e faatatau i se tasi po o se mea. E faamatala atu e Molimau a Ieova i isi ia mea latou te iloaina e faatatau ia Ieova ma lana fuafuaga. (Isaia 43:10) I le pei o agelu, e mananaʻo Molimau e fesoasoani atu ia te oe ina ia aʻoaʻoina le upu moni e faatatau ia Ieova. Latou te mananaʻo ia avea foʻi oe ma uō a le Atua.