O le Soifuaga o Iesu ma Lana Faiva

Le Afio Manumalo atu o Keriso i Ierusalema

I LE taeao e sosoo ai, le Aso Sa, Nisani 9, ua tuua ai e Iesu faatasi ma ona soʻo Petania ma aga atu i le Mauga o Olive agaʻi i Ierusalema. I sina taimi puupuu lava, ae latou latalata atu loa i Petefake, o loo taatia mai le Mauga o Olive. Ua faatonu atu e Iesu le toalua o ona soʻo:

“Ina o ia oulua i le aai o loo i o oulua luma atu, ma o le a lua maua ai le asini o nonoa, ma le tamai asini faatasi ma ia; ia oulua tatala ma aumai i laua i a te aʻu. Ma afai e fai ane e se tasi se upu ia te oulua, ia oulua fai atu, ‘E manao i ai le Alii.’ I lea o le a ia vave tuuina mai i laua.”

E ui lava i le taimi muamua e leʻi taulau ona iloa loa e soʻo faapea o nei faatonuga e iai se mea e fesootai atu ma le faataunuuga o le valoaga a le Tusi Paia, ae mulimuli ane ua latou iloa ua faapea. Na valoia e le perofeta o Sakaria e faapea o le Tupu folafolaina a le Atua o le a tietie atu i Ierusalema i se asini, ioe, “o le tamai asini matua foi o le tama a le asini fafine.” Na faapena foi i le Tupu o Solomona ona tietie i le tamai asini i le aso o lona faauuga.

Ina ua ulu atu soʻo i Petefake ma aumai le tamai asini ma lona tinā, na faapea ane nisi o ē na tutū latalata ane: “O le ā le mea ua oulua faia?” Peitai ina ua taʻu atu o manu e mo le Alii, ona tuu lea e tagata i soʻo e ave i laua ia Iesu. Ona fofola lea e soʻo o la ofu i le tua o le asini fafine ma lana tama, ae ua tietie Iesu i le tamai asini.

A o tietie agaʻi atu Iesu i Ierusalema, ua faatoateleina le motu o tagata. O le toatele o tagata ua fofola o latou ofu i luga o le auala, a o isi ua latou faʻi mai la laau ma fofola i o latou luma. “Ia manuia Lē maliu mai o le Tupu i le suafa o Ieova!” ua latou alalaga ai. “Ia i ai le manuia i le lagi, ma le mamalu i mea aupito maualuluga!”

Ua feita nisi o le au Faresaio sa iai i le motu o tagata ona o nei alalaga ma na faitio atu ia Iesu: “Le aʻoaʻo e, ia e aʻoaʻi atu i ou soʻo.” Ae ua tali atu Iesu: “Ou te fai atu ia te outou, Afai e lē tautala mai nei tagata, o le a mafai lava e maa ona alalaga mai.”

A o tau lalata atu Iesu i Ierusalema, na ia silasila atu i le aai ma amata ona tagi ua fetalai atu: “A o outou, afai tou te iloa ai i le aso nei mea e tusa ai ma le manuia—ae ua natia nei ia mea ia te outou.” Ona o lona lē usiusitai ma le loto i ai, ua tatau ai ona totogia e Ierusalema le tau, e pei ona valoia e Iesu:

“O outou fili [tagata Roma i lalo o le Taʻitaʻi ʻau o Tito] o le a na fauina se olo faatasi ma ni tui maamaai ma o le a na siomia outou ma faapuapuagatia ia te outou mai itu uma, ma o le a ia faaumatia outou ma a outou fanau o i totonu ia te outou, ma latou te lē tuua se maa i luga o le tasi maa.” O lenei faaumatiaga o Ierusalema na valoia e Iesu na tupu moni lava i le 37 tausaga mulimuli ane, i le 70 T.A.

I ni nai vaiaso muamua atu, e toatele i latou i le motu o tagata na latou vaai i le toe faatuina e Iesu o Lasalo. O lea ua taʻu atu ai pea e i latou nei i isi e uiga i lena vavega. O lea ina ua ulu atu Iesu i Ierusalema, a ua vevesi le aai atoa. “O ai ea lenei?” ua fia iloa ai e tagata. Ona talanoa ai pea lea o le motu o tagata: “O Iesu lenei le perofeta mai Nasareta o Kalilaia!” I le vaai atu i le mea ua tupu, ua auē ai le au Faresaio faapea ua leai se mea latou te mafaia, auā, e pei ona latou fai mai: “Ua mulimuli atu le lalolagi ia te ia.”

E tusa ai o lana masani i ana asiasiga i Ierusalema, ua maliu atu ai Iesu i le malumalu e aʻoaʻo. O i inā ua ō atu ai ia te ia ē tauaso ma ē pipili, ma ua ia faamaloloina i latou! Ina ua vaaia e le au ositaulaga sili ma le au tusiupu mea ofoofogia ua faia e Iesu ma ina ua latou faalogo i tama i le malumalu o alalaga atu, “Osana i le Alo o Tavita!” ona latou feita ai lea. “Ua e lagona ea a latou upu?” ua latou tetee atu ai.

“Ioe,” ua tali atu ai Iesu. “Tou te leʻi faitaulia lava ea, ‘Ua e saunia le viiga mai gutu o tama meamea ma tama fesusui’?”

Ua faaauau le aʻoaʻoga a Iesu, ma ua ia silasila solo i mea i le malumalu. Toe o se aga ua tuai. O lea ua ia maliu ese loa, faatasi ma le toʻa 12, ma toe foi atu pe a ma le lua maila [3 kilomita] i Petania. I inā, ua ia faaaluina ai le po o le Aso Sa, atonu i le fale o lana uo o Lasalo. Mataio 21:1-11, 14-17, NW; Mareko 11:1-11, NW; Luka 19:29-44, NW; Ioane 12:12-19, NW; Sakaria 9:9, NW.

◆ O anafea ma i le ā le uiga ua ulu atu ai Iesu i Ierusalema e avea o se Tupu?

◆ O le ā le matuā tāua ua vivii atu ai le motu o tagata ia Iesu?

◆ O le ā le lagona ua iai ia Iesu ina ua silasila atu i Ierusalema, ma o le ā le valoaga ua ia fetalai atu ai?

◆ O le ā ua tupu ina ua afio atu Iesu i le malumalu?