Lou Lumanai O Ai E Mafai Ona Valoia?
O LE TAUMAFAI e valoia le lumanai e faigofie. A e o le sao o le folafolaga e leai. Ua avea ma taumafaiga iuvale pe a le taulau le valovaloga, e pei ona faaalia manino e faaaʻoaʻoga ua faaalia.
Talu mai lava taimi anamua, ua taumafai pea tagata e fia iloa po o le a o taofia e le lumanai. E oo lava i aso nei, o le toatele o i tatou o loo faanaunau e fia iloa le tulaga o a taeao. O lenei sailiga o le poto e uiga i mea tutupu o le a oo mai ua taʻitaʻiina ai tagata latou te taumafaia le anoanoai o auala eseese. Mo se faaaʻoaʻoga, sa suesueina le tino faaletagata mo ni faamaoniga o uiga tumau i foliga, le taotoga o le atigi ulu ma tosi i le alofilima o le lima. Sa suesueina e tagata e uiga i manu—i gaoioiga a isumu ma gata, le feleleiga o manu lele, e oo lava i le auala e togitogi ai e le moa fatu sana mai le eleele. Sa faaaogaina e nisi mea e pei o polo tioata, pele, taisi, lau o le ti, po o penu o le kofe. O faiga e eseese lava e pei ona eseese o tagata, aganuu, ma vaitaimi a e peitai o iuga e tutusa uma lava: e le taulau.
Ui i lea, e i ai Se mafai ona valoia ma le moni le lumanai. O ai? O Ieova le Atua. O Ieova e tutasi aua o ia “o loo faaali talu mai le amataga o mea e mulimuli.” E ui ina e lei atoatoa le faataunuuga o mea, a e mafai e le Atua ona muai taʻua le taualuga o mea. Ioe, e mafai e Ieova ona folasia le lumanai i luma o mata o tagata e le mo ni nai aso o i luma a e mo le faitau senituri i le lumanai!—Isaia 46:10.
O lea, o tauiviga ina ia iloa le lumanai e le faapea e tatau a ona iuvale. Ua faataatia e le Afioga a le Atua, le Tusi Paia, itu taua uma mo i tatou. O le a tonu lava ua faaalia e ono faatalitalia e le fanau a tagata?
[Ata i le itulau 3]
“Ona e mamafa-na-i-lo-o-le-ea e le mafai ai ona gaosia masini e felelei.”—Lord Kelvin, British mathematician, physicist, and President of the British Royal Society, c. 1895.a
[Faaopoopoga i lalo]
a O nei faamatalaga e mai le tusi The Experts Speak, tusia e Christopher Cerf ma Victor Navasky.
“Afai a e amata ona tatou taumafai ia malamalama i le olaga o le a i ai i le 1960, e tatau ona tatou amata i le iloaina o le totogi mo mea ʻai, lavalava ma fale o le a itiiti lona tau e pei o le ea.”—John Langdon-Davies, o le tusitala Peretania ma se Alii o le Royal Anthropological Institute, 1936.
“O le mea e sili ona valea ua tatou faia . . . E le mafai on pa le pomu, ma ou te tautala ona o aʻu o se tagata ua i ai le poto masani i mea e papa.”—Admiral William Leahy, tagata faufautua i le Peresitene Amerika o Harry Truman i le faiga o pomu atomika a Amerika, 1945.
[Ē Ana le Ata i le itulau 3]
U.S. National Archives