Saolotoga—Maeu se Faanaunauga!

“AUMAI ia te au le saolotoga po o le aumai ia te au o le oti!” sa alaga ai Patrick Henry lotonuu o Amerika ua silia nei ma le 200 tausaga ua mavae. Sa sili ona taua ia te ia le saolotoga i loo le ola lava ia. I le faagasologa mai o senituri, e faitau miliona tagata ua i ai faalogona e tali faapena lava.

A e peitai, i le afa senituri ua mavae, ua sasao ai le faanaunauga mo le saolotoga i se tulaga fou. Na aveese pulega faakolone mai le faitau miliona o tagatanuu ina ua latou sailia, ma faatuina malo tutoatasi faapolotiki. O gaoioiga faavafealoaloai, faiga tau tamaoaiga, e oo lava i taualumaga faalotu ua faatuina ina ia sailia ai le saolotoga mai sauaga ma le faailoga tagata, e tusa lava pe moni pe na o ni nai maufaufauga. Sa lei faapea muamua ona toatele tane ua mananao i le saolotoga mai pulega a o latou pule ma malo, e faapena foi le toatele o fafine mai le tulaga ulu a o latou tane ma tamā, e faapena foi tamaiti mai pulega a o latou matua ma faiaʻoga. A e peitai o taumafaiga mo le saolotoga e le o se mea fou. O le mea moni, ua toeitiiti lava tutusa ma tausaga o le fanau a tagata lava ia. Ua taʻu mai e le tusi ua sili ona leva o talafaasolopito, le Tusi Paia, le tele o faamatalaga. O le aano o le tala, e pei ona maua i le Kenese 3:1-7, e faapenei:

E lei umi lava se taimi talu ona faia o le tane ma le fafine, a e faalatalata atu loa i ai se mea faiola faaagelu i le fafine. O ana gaoioiga sa atagia mai ai le faanaunauga ia saoloto mai le pule a Le Na Faia o ia. O lea e le o se mea e ofo ai ona sa faafia poto atu faapea o le mea la te manaomia ma lana tane o le saolotoga. E le moni ea, sa ia finau atu ai, ua tuu e le Atua i o la luga ni taofiofiga? A e ai se a, na ia fesili atu ai, e le tatau ai ona la ʻaai i “le fua o le laau o i totonu o le faatoaga”? A e le gata i lea, o le laau e “matagofie” i le vaai, e le moni ea lea? Ioe, o lea lava!

O ese loa, sa ia nanati atu ai, ona “pupula ai [lea] o oulua mata; ona avea ai lea o oulua e pei ni Atua o loo iloa le lelei ma le leaga.” Maeu se faanaunauga! Ioe, saoloto mai le pulega “saua” a le Atua sa faia ia foliga mai e sili ona tautele e pei o le ola lava ia.

“Aumai ia te au le saolotoga po o le aumai ia te au o le oti!” Na maua e Atamu ma Eva mea uma e lua—i lo la faanoanoaga ma i tatou foi! E faapefea?