E Faapea Ona Lagona Kerisiano Agai i le Saolotoga
E TETEE Kerisiano i le “saolotoga” e faapea e fulitua i aiaiga sao tau le pule. Ai se a? Auā o le mea moni na te le faasaolotoiona—a e faapologaina. Atonu e lelei ona faia se faaaʻoaʻoga faigofie e faataʻitaʻi ai lenei mea.
O le talavou atonu e faatava i le pule a ona matua, o e ua faasaina o ia mai le ulaula ma le inu o le ʻava malosi. I lona le talisapaia la faapea o le faatinoina o le pulega a matua e mo lona lava lelei e ua ia faananau ai mo le saolotoga. Ina ua matua ma tuua le aiga, mulimuli ane ua ia maua le saolotoga na ia manao i ai. A e i tausaga mulimuli ane, ina ua avea o se tagata ulaula faalausosoo, ma le faatuaoia le inu, ua taʻua atu i ai e lana fomaʻi faapea ona o lona soifua maloloina e tatau ai ona lafoa i le ulaula mea le inu ʻava. Ua faigata tele ona ia faia lea. O lona saolotoga la ua taʻitaʻiina atu ai i le saisaitia po o le faapologaina.
Saolotoga Mai le Pulega e Le Faatuaoia
O le pulega a le Atua e le faatuaoia ma e faavae i luga o ia o Le Na Foafoaina Mea. Ua i a te ia foi la le aiā tatau e filifili ai po o a amio ua saʻo ma tonu, o a foi mea mamā ma mea e le mamā. Na faavaeina nei tulafono ona e mo le lelei o le fanau a tagata, ua faataatia ai ma le manino i le Tusi Paia. “Aua neʻi faaseseina outou,” ua ia fetalai mai ai. “O e faitaaga, ma e ifo i tupua, ma e mulilulua, ma e tauatane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.”—1 Korinito 6:9, 10.
A e maise lava i lenei 20 senituri e uiga fia tagata ma le poto faalelalolagi, ua taumafai ai le tagata e faasaolotoina o ia mai na taʻiala mamā tau amio. O lea, e tusa lava po o a ituaiga o saolotoga na te le mafaia lava ona faasaolotoina o ia mai i auga o le fai o mea ua taʻu mai e le Atua o le agasala. Na i lo o le saoloto, ua avea na tagata ma pologa i o latou tuinanauga, manaoga, ma le lotoa, e pei ona faaalia manino e Iesu ina o ia fetalai mai: “O sē faia le agasala, o le pologa lea o le agasala.”—Ioane 8:34; tagai foi i le Roma 6:16.
Saolotoga Mai Le Pule Faatatau
Ua i ai i tagata maualuluga o le malo le aiā e faatino ai le pulega i totonu o le atunuu, matua i totonu o aiga, faiaʻoga i faiga tau aʻoaʻoga, ma toeaina Kerisiano i totonu o le faapotopotoga. O le mea moni, o le pule lea e fai faatatau. Mo se faaʻoaʻoga, o le pule e le faatuoia a Ieova, ua ia poloai ai ia faitau e ana auauna lava Afioga ma ia auaufaatasi ma uso a Kerisiano, e muamua ona faia i le pule faatatau a le tane i totonu o le aiga o le atonu ua faasa ona faatino e lana avā ona faia o na mea.—Galuega 5:29.
Peitai, i le faatinoina o le pulega faatatau i totonu o le atunuu, e le mafai ai la ona auai Kerisiano i gaoioiga mo le saolotoga ina ia faatoilaloina na ituaiga o pulega. Latou te le auai i faiga le usiusitai a tagatanuu ona faapea latou te le malilie i faiga a le malo, latou te le uunaia foi le totogiina o lafoga e avea o se auala e tetee atu ai i nisi o taualumaga. “O le na te tetee i le pule, ua tetee e ia i le sauniga a le Atua,” sa fai mai ai le aposetolo o Paulo, ma ua faaopoopo mai: “O ē tetee foi e sala lava i latou.”—Roma 13:1-4.
A e faapefea pe afai ua le tonu le faamasinoga a le pulega a se ofisa o le Malo? E faapefea pe afai ua ia le faamasino tonu i tagata taitoatasi po o vaega toaitiiti e faaleamanaiaina? Ua faatonu mai le Tusi Paia: “Afai ua e iloa atu ona sauāina o le ua mativa, ma le fao mea i le faamasinoga ma le faatonuga i se itu malo, aua e te ofo i lea mea; auā o loo vaai o le ua sili i lea tagata sili; o loo silasila foi le ua silisili ia te i laua.” (Failauga 5:8) Atonu e mafai ona toe tuuina i sē e sili atu ona maualuga i le pulega po o le faamasinoga. A e tusa lava pe le maua mai ai le faamasinoga tonu i le auala lena, e mafai i auauna a le Atua ona mautinoa faapea, “auā o fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.”—2 Nofoaiga a Tupu 16:9.
E faapena foi le tulaga i totonu o le aiga. Afai e faaaoga sese e tane po o tamā a latou pule, tatou te mautinoa lava o le a faasaʻoina e le Atua na mea, na te le faatagaina se faamasinoga le tonu i lana faiga fou amiotonu ua lata ona oo mai. A e i le taimi nei, o fafine ma fanau Kerisiano e faaauau pea ona faaaloalo i le mataupu silisili o le tulaga ulu faa-Kerisiano, e tusa lava pe le saʻo i nisi o taimi. Ua latou talisapaia faapea e le taʻufaatauvaaina ai e na fuafuaina e aumaia ai le filemu ma le autasi i totonu o le aiga faapea foi ma le faapotopotoga Kerisiano.—1 Korinito 11:3.
“Saolotoga Mai Pulega i Totonu o le Faalapotopotoga
E tusa ai ma e tulaga ulu i totonu o le faapotopotoga Kerisiano, fai mai le Afioga a le Atua: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai.” (Eperu 13:17) E ui lava o lenei pulega a le au toeaina e faatatau, a e ua tuuina atu e le Atua ia i latou e ala i lona agaga paia. O lea, sa tuuina mai i se auala sili ona tuusaʻo nai lo o le pule faatatau tofia, mo se faaaʻoaʻoga le pule faalemalo.—Galuega 20:28.
Ua i ai i nisi le lagona faapea o faatonuga ma tulafono ua tuuina mai e le Atua e ala i lana faalapotopotoga vaaia, ua soona lauvaea naua, ua le lava ai se saolotoga mo tagata taitoatasi. O le pogai lea ua taofia ai e nisi le auaufaatasi ma Molimau a Ieova; ua latou le toe mananao foi e gauai atu i e o leoleoina o latou agaga. E ui lava i na manatu nei tagata o loo latou saoloto, a o le mea moni o lo latou “saolotoga” ua toe faapologaina ai foi i latou i talitonuga sese ma faiga faalotu.
O Kerisiano moni e faaaloalo i le pule, le pule e le faatuaoia mai le Atua ma pule faatatau a le tagata. O lenei vaaiga saʻo o le pule e puipuia ai i latou mai le faaaoga seseina o le saolotoga faa-Kerisiano ua latou maua mai i le poto saʻo o le upu moni.
[Faamatalaga faaopoopo i le itulau 6]
O le pulega a le Atua e le faatuaoia ma e faaae i luga o ia o Le Na Faia Mea.
[Faamatalaga faaopoopo i le itulau 6]
E le faasagatau Kerisiano i le malo auā o ana taualumaga e tali atu ai ia lava i le Atua.
[Faamatalaga faaopoopo i le itulau 7]
O Kerisiano moni e faaaloalo i le pule, le pule e le faatuaoia a le Atua ma le pule faatatau
[Ata i le itulau 7]
Talisapaia le Pule Silisili, o Ieova le Atua
Ia iloa le pule faatatau i totonu o le faapotopotoga
Totogi i pulega faalemalo