Ia Faaaoga Tonu le Saolotoga Faa-Kerisiano
O KERISIANO ua “valaauina . . . i le saʻolotoga,” a e ua lapataia foi i latou ia “aua nei faia le saʻolotoga ma ufiufi o le loto leaga.” (Kalatia 5:13; 1 Peteru 2:16) Paga le mataʻutia mo se Kerisiano e toe faapologaina ai! Mo se faaaʻoaʻoga.
E toatele tagata lotu ua aʻoaʻoina faapea o le inuina o le ʻava malosi o se agasala. A e o le a faasaolotoina o ia e le poto saʻo mai lenei manatu sese, talu ai ua tausalaina e le Tusi Paia e le o le inu, a o le ona. (Faatusatusa le Salamo 104:14, 15 ma le 1 Korinito 6:10 ma le 1 Peteru 4:3) Nei la, o le Kerisiano ua faasaolotoina atonu ua i ai le lagona fiafia e inu i nisi o taimi. A e afai na te amata ona “fai le saʻolotoga ma ufiufi o le loto leaga.” e ono mafai la ona ia faia e sili atu, ma tupu ai le tauau ina faalagolago i le ʻava malosi, pe oo lava ina pologa i ai.
O lea, pe a maea ona faasaolotoina mai vaaiga sese i faafiafiaga, laei ma teuga, po o amioga foi faavafealoai, vaai nei matele le Kerisiano i se itu: ma soona faalau ai tupe ma taimi i mea ia na muai faasaina a e ua faatagaina nei. O le faaleagaina lena o le saolotoga tau Kerisiano. Atonu e mafai ona oo atu ai i se tulaga matuiā.
Talai le Faamoemoe o le Saolotoga
E talu mai le faavaeina o le Malo faa-Mesia o le Atua i le 1914 ua i ai lana folafolaga faapea “ma le faamoemoe ia tuusaunoa ia lava mea na faia ia le faapologaina e le iuvale, a e oo i le saolotoga o le fanau a le Atua e manuia ai” ua vave ona agai atu i lona faataunuuga. (Roma 8:21) Ua maea ona faasaolotoina e Keriso le lagi mai aafiaga leaga faa-Satani. (Faaaliga 12:7-12) Ua le pine ae ia faaumatia Papelonia Tele, o le ua faapologaina tagata e ala i mea leaga faalotu. Ma, i le taua a le Atua o Amaketo, o le a ia faasaolotoina ai le fanau a tagata mai faiga malo lē lelei atoatoa e ala lea i le tuimomomoina o i latou ia lē toe i ai. (Tanielu 2:44; Faaaliga 18:21; 19:11-21) O le a ia faasaolotoina le fanau a tagata mai le mafuaaga sili o le faapologaina pe a taofiofia Satani, “ina ia le toe faaseseina e ia o nuu, seia atoa ia tausaga e afe.”—Faaaliga 20:2, 3.
I le faaiuga o Lana Pulega i le Afe o Tausaga, ona faasaolotoina atoatoa loa lea e Keriso tagata mai iuga leaga na oo mai ona o uluai gaoioiga o le saolotoga i tuā i Etena. O le faileagaina o vaega o lanu o le a faasaolotoina mai le faamasinoga lē tonu ma faiga faailoga tagata. O le a faasaolotoina fafine mai le pule saua a tane. O tagata mamaʻi o le a saoloto mai faamaʻi. O tagata matutua o le a saoloto mai auga matuitui o le tino matua. Ma, o le mea ofoofogia e ofo ai, o tagata faavauvau o le a faasaolotoina mai le faanoanoa, auā o e pele ia i latou sa feoti o le a faasaolotoina mai tuugamau!—Faaaliga 20:13-21:5; tagai foi i le Salamo 146:5-10.
E ala i le talaiina o lenei feau tauatua o le saolotoga, ua faaaoga ai e Molimau a Ieova i aso nei lo latou lava saolotoga faa-Kerisiano i se auala aoga. Paga se vaaiga lata mai mo i latou pe ana fai latou te lagolagoina gaoioiga a tagata mo le saolotoga lea e na o le pau lava le mea lelei e maua mai ai e na o sina mapusaga, ma o le mea moni, e punitia ai le faamoemoe moni mo le saolotoga.
Manatunatu i ai: Ua ia te oe le avanoa e te ola ai e tofo i le saolotoga e silisili na i lo o le saolotoga lea na tautala i ai Patrick Henry. A e le gata i lea, ua ia te oe foi le avanoa e te olioli ai i ona faamanuiaga e oo lava i le faavavau pe a mavae Amaketo!