Otootoga o Tala

O ni Talanoaga a le Katoliko ma Tagata Marxist

I Putapesi i Hungary, ia Oketopa 1986, na fai ai se talanoaga i le va o ni faifeau ma le au popoto i le faafilosofia e toa 15 o ni Katoliko ma le toa 15 o le au fai tofā a Marxist. Na tāloina lea fono e le Ofisa Pule o le Failautusi a le Vatikana mo Tagata Lē Talitonu ma le Faalapotopotoga a Saienitisi i Hungary e talanoaina le faa-evolusione o le tāua o amio.

I Katoliko na auai, sa faatasi ai Katinale Poupard o Falani, le taʻitaʻifono o Tagata lē Talitonu, ma Katinale Koenig mai Ositeria, o se faifeau faapitoa mo fesootaʻiga a le Lotu Katoliko ma malo komunisi. O tagata o le Marxist e aofia ai le ulu o le Matātā Eseese o le faa-Filosofia i Hungary ma Matātā Eseese o le Faa-Saienitisi Lē Talitonu i le Atua i Rusia.

Na lipoti ma e le nusipepa Farani i aso uma o le Le Monde e faapea: “Ua iloa e tagata popoto a Marxist ua latou fesagaʻi nei ma se mala o amioga tāua, o le mataʻutia ua latou tuaina e ala i le aofaiga o tagata e pule i o latou ola, le faaaogāina o vailaau faasaina, ma le inu tele i le ʻava malosi. E tusa ai ma le sui Katoliko, i ā latou sailiiliga mo se vaifofo ua latou [tagata Marxists] faamoeome i le felagolagomai o lotu Kerisiano. I le itu a Roma [Katoliko] o lenei fuafuaga sautualua na faia ina ia iloa lelei ai pea faapefea ona faafetaui atu le tagata ma amioga i le sosaiete a Marxist ma ina ia ‘iloiloina le faavae tau amio mo le faamanatuina faatasi i le va o Kerisiano i atunuu i Sasae [komunisi] ma Maxist.’”

O le vaifofo moni i fafitauli tau amio o le aso o le a lē maua i ni fonotaga i le va o ni manatu feteenaʻi. Na i lo o lena, o le a maua pe a fulisia e le Malo o Ieova i aao o lona Alo, o Iesu, lenei faiga o mea, ma fausia aʻe ai i lona tulaga se lalolagi fou i lalo o lena Malo faalelagi.—Tanielu 2:44; Faaaliga 21:4, 5.

Saʻolotoga Moni?

O le aʻoaʻoga o le saʻolotoga faatolu—o se gaoioiga e taliaina ai se faiga sauā na faia ina ia “faasaʻoloto ai tagata matitiva ma ē ua agaleagaina,” a e maise lava i le Lalolagi lona Tolu, ua amata foʻi ona taatele ai. Sa avea lenei ma mataupu mo talanoaga i le Fonotaga Faavaomalo Lona Lua a le Asosi o Lotu a Faifeau o le Lalolagi lona Tolu na faia i Oaxtepec, Mexico, ia Tesema 8-13, 1986. Ai se ā ua sili ai ona maumauaʻi nei tagata aʻoga popoto faalotu e avea o ni o latou sini se suiga o le tulaga lautele sa leʻi faapea ona i ai?

E ui lava na tuuina e le Vatikana se faatonuga e faaleaogāina ai le aʻoaʻoga o le saʻolotoga faalotu, a e o le Poloaʻiga i le Tuusaʻolotoina faa-Kerisiano ma le Saʻolotoga na auina atu i le 1986 na taʻua ai faapea e matuā “atoatoa faaletulafono ona faia se gaoioiga a i latou ua mafatia i faiga sauā a ē mauoa ma faiga o pulega faapolotiki.” Ua faamaonia nei o le tauiviga i “mea tau” o se “taumafaiga mulimuli.”

Peitaʻi, a o i ai i le lalolagi, pe sa aafia ea Iesu Keriso i ni gaoioiga lautele faalelalolagi? E leai, i le faatusatusa atu i ai, ina ua tago le aposetolo o Peteru “i le pelu,’ ina ia puipui ai le Alo o le Atua, na aʻoaʻi atu Iesu ia te ia i lona faapea atu: “Ina toe sulu ia o lau pelu i lona faamoega; auā o i latou uma o e tago i le pelu, e oti i latou i le pelu.” (Mataio 26:52) Ua folafola mai e le Tusi Paia faapea o le saʻolotoga moni o le a sau mai le faʻalaʻa tauatau pe a tafiesea e le Atua mai le lalolagi e lē gata i le mativa, le feitagaʻi faavaomalo, le faailoga lanu, ma faigasauā, a e faapea foʻi ma loimata maligi, tiga, faanoanoa, ma le oti. (Faaaliga 21:4) E mautinoa lava, o le saʻolotoga moni lenei.

Teena le Papatisoga o Tamaiti

Na faailoa atu talu ai nei e se faifeau Porotesano Siamani mai Frankfurt i taʻitaʻi o le lotu e faapea ua ia teena mo le agaʻi atu i luma ona toe “papatisoina ni tamaiti latou te lē iloa ni mea o lana pulega.” I lona faamatala mai pe ai se ā ua lē aogā ai lana lava papatisoga o se tamaitiiti e tusa ai ma le upu papatiso, fai mai Klaus Hoffmann, ua 58 tausaga le matua: “Na te lē o faataunuuina le mea o loo manaomia i le papatisoga faale-Tusi Paia, o lona uiga o le faatuatua, e lē o i ai foʻi le faatusa saʻo, ua taʻua o le faatofu.” I le lagolagoina o lona manatu, na ia filifili ai e toe papatisoina o ia ma i lea na “faatinoina ai le papatisoga faale-Tusi Paia o le tofu,” ua lipotia mai ai e le nusipepa Siamani o le Frankfurter Allgemeine Zeitung.

I se taimi muamua, na faamalōlō ai e ofisa o le lotu Hoffmann mai ona tiute, a e o e faamasinoga na faasalaina o ia na suia i se “faamalōlōga i le lotu masina mo ni fuafuaga e toe iloiloina.” Ma o ā iʻuga? Ua lipotia mai e le nusipepa faapea o isi ana toe sailiiliga atili e uiga i le mataupu ua na ona faailoa mai ai “faapea i totonu o le Tusi Paia e lē o lagolagoina ai se papatisoga mo pepe. E lē gata foʻi i lea, e leai lava se leo o tusitusiga a uluaʻi Kerisiano e faailoa mai ai sea gaoioiga seʻia oo mai i lona tolu o senituri.”

E lē o se mea e ofo ai, ona ua sii mai e taʻitaʻi lotu aganuu e avea o se faavae o lenei gaioioiga. Peitaʻi, ona o nei mea moni, ua faaauau ai pea ona faia le papatisoga o pepe i le tele o faiga a Kerisenitoma. Ua faasaʻoina ai ea lenei mea ona o le lagolagoina e faifeau? Na faatonu e Iesu ona soʻo ina ia papatiso atu, e lē o pepe, a o ē talitonu ua aʻoaʻoina e tausi i ana poloaʻiga uma. Sa lē o se pepe foʻi Iesu a e sa “tolu sefulu ona tausaga” ina ua faatofuina o ia i vai o le Vaitafe o Ioritana.—Luka 3:21-23; Mataio 28:19, 20.