Fesili Mai le Au Faitau
◼ Na taʻu atu e Mose i tagata Isaraelu faapea, “a o mea ua faailoa mai o ia te i tatou ia ma a tatou fanau, e faavavau.” (Teuteronome 29:29) Pe o nei mea ua “faailoa mai,” e aofia ai le malamalama lea na faasusulu i le Afioga a le Atua i nei aso e gata ai?
E leai, e lē saʻo pe a tuu le malamalamaga o valoaga lea ua tuuina mai ia i tatou i nei aso e gata ai, i se tulaga tutusa ma “mea ua faailoa mai” lea na talanoaina e Mose.
E tusa ma faamaumauga autū o upu a Mose, “o mea ua faailoa” lea sa ia tautala i ai, e faatatau i mea i le feagaiga o le Tulafono. (Teuteronome 29:25) Na faailoa atu e Mose faapea o nei “mea ua faailoa mai” o loo iai ni tiute tauave. O le lē taulau la o na ola ai e tusa ai ma nei tiute tauave, o le a mafua ai ona aʻoaʻia e Ieova ona tagata.
O le mea moni, o le feagaiga o le tulafono, o se faailoga faaaliga mai ia Ieova le Atua. O nisi faaaliga na muai tuuina mai i tamā matutua, ia Noa, e oo atu lava i tuā ia Atamu. Na faaaogāina Mose e tusia mea na faailoa mai e oo atu i ona aso, ma ua faasaoina mo i tatou i uluaʻi tusi e lima o le Tusi Paia. Mulimuli ane i le mataupu “A o mea Ua Faailoa Mai o Ia Te i Tatou Ia” (Le Olomatamata, Ianuari, 1987) sa faamatalaina ai nei “mea ua faailoa mai” na aofai uma ai faamatalaga uma lava o loo faamauina i le Tusi Paia.—2 Timoteo 3:16).
Peitaʻi, ua i le Tusi Paia “afioga [paia] a le Atua,” o mea ua ia faailoa mai. (Roma 3:2) Ina ua faamaonia le lē faamaoni o Iutaia faaletino, ona avea ai lea o Kerisiano faauuina ma tausi mea o “mea ua faailoa mai,” ma ua avea ai loa le faapotopotoga Kerisiano ma “poutu . . . ma le lagolago” ia i latou. (1 Timoteo 3:15; 1 Korinito 4:1) O lea, o sui o lena faapotopotoga i aso nei, ua mafai ona latou faaleo atu ma le saʻo upu a Mose, e faapea “o mea ua faailoa mai o ia te i tatou ia.”
I aso nei, ua faasusulu atu e Ieova le malamalama tele i nei “ea ua faailoa mai” E pei ona valoia mai e Tanielu, ua ‘fetaufetuliai’ tagata o Ieova i le Afioga faagaeeina, ma ua ‘tupu tele malamalama.’ (Tanielu 12:4) O lea, ua tatou iloa ai nei “isi mamoe.” (Ioane 10:16) Ua tatou iloa ai le “motu o tagata e toatele.” (Faaaliga 7:9-17) Ua tatou vaaia fai foʻi le faataunuuga o le faataoto i mamoe ma ʻoti. (Mataio 25:31-46) O na mea ua faaalia, pe faailoa mai ia i tatou, a e lē i le uiga o “mea ua faailoa mai,” e pei ona faamauina i le Afioga faagaeeina a Ieova.
O mea lea, o le a lē saʻo pe tuufaatasi na auiluma i le malamalama, i le tulaga tutusa e pei o faaaliga faagaeeina na ua faia aʻe ai “ma ua faailoa mai,” o loo faamauina i le Tusi Paia. Na i lo o lea, e ala i le matuā suʻesuʻeina o le Tusi Paia, ua sailia ai tagata o Ieova faatasi ma le tatalo le malamalamaga saʻo o na “mea ua faailoa mai.” E ala i le agaga paia, ua tuuina mai ai e Ieova lea malamalama i lana lava taimi atofa.
Ua taʻu mai le Tusi Paia ia i tatou faapea “o le ala o e amiotonu e tusa ia ma le malamalama o le ao, o loo tupu pea lona malamalama e oo i le tutonu o le la.” (Faataoto 4:18) O le faateleina o le malamalama o loo faasusulu atu e Ieova i “mea ua faailoa mai” ua faaalia ai ua lata tele mai le “ao” ma faamaonia ai foʻi o ana faamanuiaga o loo i luga o le faapotopotoga Kerisiano i aso nei.