Faatuatua e Mafai Ona Siitia ai Mauga!

SA faatali ma le naunau le motu o tagata. Na faatoʻā avatu ai lava e se tamā lona atalii e maʻi māliu i ē na manatu o ia e mafai ona latou faamalolō ia te ia. Ma le naunau lava, sa faatali ai o ia mo se faamalōlōga. A e leai se mea na tupu! Na toe alu ese ai loa lenei tamā ma le tiga tele.

I le taimi lava lena, na aliaʻi nai ai isi tagata e toafa ma o loo ō mai faatasi ma lo latou taʻitaʻi, o Iesu le Nasareta. Ua tamoe atu nei ia te ia le tamā ma aioi atu: “Le Alii e, ia e alofa mai i loʻu atalii, ua maʻi māliu, ua tiga lava; auā ua paʻū soo ia i le afi, ua faapea soo foi i le vai. Na ou au mai ia te ia i ou soo, a ua latou le mafaia ona faamalolō ia te ia.”

“Aua mai ia o ia iinei ia te au.” na fetalai atu ai Iesu. O le iʻuga? “Ua vavao atu Iesu ia te ia ona alu ai lea i fafo o le temoni sa ia te ia; ona malolo ai lea o le tama talu i lea lava itu aso.” Ioe, o se isi foi vavega! A e ai se ā na lē mafai ai e soʻo o Iesu ona faamalōlō le maʻi?

Na faamatala e Iesu le pogai i lona faapea atu: “Ona o lo outou le faatuatua.” Sa toe faaauau atu o ia: “Afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i lela mea; ona alu atu ai lea; e leai foi se mea tou te le mafaia.”—Mataio 17:14-20.

Mai lenei mea moni na tupu o le olaga, ua faamaonia ai le malosi o le faatuatua. A e o le ā moni le faatuatua? Pe e mafai ona atiina aʻe ma faamalosia? Pe e mafai moni ona ia siitia mauga?

O le A Le Faatuatua?

Na faamatalaina e le aposetolo o Paulo le faatuatua faapea “o le faalagolago lea i mea ua faamoemoe i ai, o le mautinoa lea (po o faamaoniga e faatalitonu ai) o mea e le o vaaia.” (Eperu 11:1) I se isi faaupuga, o le faatuatua o le mautinoa o se mea e lē o vaaia. E lē faavae i na o ni faaupuga, a e i ai sona faavae mau. O lea, e ese le faatuatua mia le talitonugofie e aunoa ma se faavae. Ua faamatala mai e se tasi lomifefiloi le talitonugofie e aunoa ma se faavai “o le talitonu po o le sauni e talitonu, a e (maise) lava i ni faamanoniga e lē mautinoa.” I lona eseesega, o le tagata e ia i lona faatuatua moni e i ai ana faamoniga maumaututū o mea ua ia talitonu i ai. O le mea lea e mafai ai ona ia faamatala ia te oe le pogai o lona muatinoa o le a oo mai sea mea. O le tamā e pei ona taʻua i le amataga o lenei mataupu, na i ia iia te ia ni faamaoniga na ia mautinoa ai faapea e mafai e Iesu ona faamalōlō lona atalii. O le ā le faamaoniga? Ioe, ua sili atu i le lua tausaga o fai e Iesu vavega, ma ua salalu atu tala e uiga ia te ia i Palesetina atoa.—Luka 7:17; Ioane 10:25.

Ua faamatalaina foi le faatuatua o le “pepa faamaonia o mea ua ia faamoemoe i ai.” O se tamāloa na ia fatauina se fanua i se isi nuu, ma sa ia te ia se pepa faamaonia na ia mautinoa ai o loo ia ia lea fanua, ma o lana mea totino moni lava, e ui lava atonu na te lē vaai lava i ai. O lea, e faapena foi le tagata e i ai le faatuatua na te aumaia ni faamaoniga maumautūtū o mea ua ia talitonu ia ia. Mo se faaaʻoaʻoga, seʻi faapea ua ia te ia le faatuatua faapea, o le a aumaia e Ieova le filemu moni i lenei lalolagi e ala i Lona Malo. Ona i ai lea i lea tagata ni faamaoniaga faapea o loo soifua le Atua ma e i ai lona mana, lona finagalo, ma le atamai e manaomia ina ia aumaia ai le filemu ma ua Ia faavaeina le Malo mo lena fuafuaga. O lena faamaoniga e tatau ona lava le malosi e faatalitonu ai, e lē gata i le tagata e i ai le faatuatua a e atoa foi ma isi o le a ‘fesili atu i le uiga o le faamoemoe ua ia te ia’ mo le filemu.—1 Peteru 3:15.

Faatuatua e Mafai ona Siitia ai Mauga!

A e peitaʻi, atonu o le a fesili mai se isi, Pe o le uiga o le faamatalaga a Iesu faapea e mafai moni lava e lena faatuatua ona siitia ia mauga?” Atonu pe sa aofia ia i le fetalaiga a Iesu le mea lena, a e sa masani foi ona ia faaaogā faataʻitaʻiga. (Mataio 13:34) O lea, atonu pe sa manatu o ia i toʻatugā e pei o ni mauga i lē sa talitonu. O le mea moni, o le upu “mauga” e masani pea ona faaaogā i ni faupega tetele o ni m ea e pei o le “mauga o aitalafu.” O lena faatuatua moni e mafai ona aveesea pe siitia ai toʻatugā e pei o ni mauga, e tusa ai ma le faailoaina mia i le tele o mea tutupu i aso nei.

Mo se faaaʻoaʻoga, e te lē ioe ea faapea o le pē o le tino e amata mia i le ua e agaʻi i lalo o avea lena e pei o se mauga? O lea, o se tagata e pē atoa le tino o loo nofo i Venikuva, B.C. Kanata, e lē gata i na ia aʻoaʻoina le vali ata, i le faaaogāina a lē o se pulumu po o se tamaʻi naifi ʻai e ū i lona gutu, a e na te maua foi mea e tausi ai o ia e ala i le faatauina atu o ana ata. A e lē gata i lea, ua uunaia foi o ia e lona faatuatua e talanoa atu i isi e uiga i mea ua ia aʻoaʻoina mai le Tusi Paia, ma e mafai ona ia faia faapea i le alu atu i lona nofoa faataavalevale, po o lona tusia foi o ni tusi. Na te lomia ana tusi i le tātāina o ki o le laau lomitusi e se fasi laau e ū i lona gutu. E auai foi e lē aunoa i sauniga faa-Kerisiano ma faia foi ni lauga i le Aʻoga o le Faiva Faatiokarate a Molimau a Ieova. O lana faaaʻoaʻoga o le faatuatua, fatasi ai ma le galue mamafa ma le finafinau, o se puna lea o faalaeiauga ia i latou o loo siomia o ia.

O le faatuatua i le Afioga a le Atua ma ana folafolaga e masani lava ona fesoasoani i isi. Mo se faaaʻoaʻoga, ua mafai e le faatuatua ona fesoasoani i le toatele e foia uiga lē faa-Kerisiano ma le tu, e pei o faiga lē faamaoni tau pisinisi, gaoi, ulaula, pelē tupe, onāga, faiga faataulaitu, feusuaiga lē mamā, faiga sese faalotu. O le mea moni taatele lava i nei mea uma e tutupu, o le mauaina lea o se faamaoniga e mautinoa ai e faapea, o loo soifua Ieova le Atua, o le Tusi Paia o lana Afioga tusia, ma o ana folafolaga na muai faataatia mai i le Tusi Paia e maufaatuatuaina, ma o le a faataunuuina lava. O se faatuatua faapena e mafai ona siitia ai mauga.