O le Soifuaga o Iesu ma Lana Faiva

Ua Faamalōlōina se Tama na Uluitinoina e se Temoni

A O Ō ESE ATU Iesu, Peteru, Iakopo ma Ioane, atonu pe o i le tuasivi o le Mauga o Heremoni, a e fetaiaʻi loa isi soʻo ma se faafitauli. I lona toe taliu mai, ua faafuasei ai lava ona silafia atu e Iesu se mea ua sese. O loo vagaia e le motu o tagata ona soʻo, ma o loo finau i latou ma le ʻau tusiupu. Ua matuā ofo lava le motu o tagata ina ua latou iloa atu Iesu, ma taufetauli atu loa e faafeiloai atu i a te ia. Ona fesili atu lea o ia: “Pe se a se mea tou te fesili ai ia te i latou?”

Ona sau ai le ai luma o se tasi tamaloa mai le motu o tagata ma tootuli mai i luma o Iesu, ma faamatala mai ia te ia: “Le aʻoaʻo e, ua ou au mai ia te oe loʻu atalii ua ia i le agaga gūgū; so o se mea e pue ai ia te ia, ona lafotu ai lea ia te ia; ua fāua le gutu, ua lilivau ona nifo, ua tino vale ai foi o ia; ua uma foi ona ou fai atu i ou soo ina ia latou tulia o ia, a ua le mafaia e i latou.”

E le taumatea o le au tusiupu lava ua sili atu ona tele a latou tala ona ua lē taulau ona faamalōlō e le ʻau soʻo le tama, atonu pe ua latou faaʻamuʻamu i a latou taumafaiga. Ma ua taunuu tonu mai lava Iesu i lenei taimi faigata. Ua ia fetalai atu: “Le tupulaga le faatuatua e, . . . ou te faapalepale ia te outou seia afea?

E foliga mai o loo fetalai atu Iesu i tagata uma lava o lo aofia i inā, ae e mautinoa lava o loo tuusaʻo faapitoa atu lava i le ʻau tusiupu, o ē sa faatupu faalavelavea i ona soʻo. Ona sosoo ai lea ma le fetalai atu o Iesu i le tama: “Ina au mai ia o ia ia te au.? A e peitai, ina ua sau le tama ia Iesu, ona taafiti ai lea o le temoni o loo i totonu ia te ia, ona paʻū ai lea o ia i le eleele ma ua faataafiti ia te ia. Ua taafili solo le tama i luga o le eleele ma ua fāuā lona gutu.

“Talu mai anafea ona oo o lena mea ia te ia?” ua fesili atu ai Iesu.

“Talu ina o tama itiiti,” ua tali mai ai lona tamā. “Ua lafo soo foi o ia ia te ia i le afi, atoa ma le vai, ina ia fano ai o ia.” Ona aioi atu lea o le tamā: “Ai se mea e te mafaia, ia e alofa mai ia te i matou, ma ia e fesoasoani mia ia te i matou.”

Atonu ua tele ni tausaga o tau saili e le tamāse fesoasoani. A e ona ua lē taulau ona faamalōlō e le ʻau soo o Iesu le tama, ona matuā tele ai lea o lona atuatuvale. Ina ua ootia Iesu i le augani atu ma le atuatuvale a le tamā, ona ia faalaeiau atu lea i lona faapea atu: “Afai ua e mafaia ona faatuatua, e mafaia mea uma lava i lē faatuatua.”

Ua silafia atu e Iesu ua taufetuli mai le motu o tagata ia te i latou, ona ia vavao atu lea i le temoni ua fetalai atu: “O oe na, le agaga gūgū ma le tutuli, ou te fai atu lava ia te oe, ina e alu i fafo ia te ia, aua foi e te toe alu i totonu ia te ia.” A o alu ese atu le temoni, ona ia toe faamafua foi lea na alaga o le tama ma faatafiti tele ia te ia. Ona taoto ai lea o le tama i le eleele ua lē gaoioi, ona fai mai ai lea o le toʻatele o tagata: “Ua oti lava ia,” A e ua tago atu Iesu i lona lima, ona tulai ai lea o ia.

Muamua lava ina ua auina atu le ʻau soo e talaʻi, sa latou taulia temoni. O lea, ina ua latou ulufale i se fale, ona latou fesili atu lea ia Iesu ina ua na o i latou: “Se a le mea na matou le mafai ai ona tulia o ia?”

Ua silafia lava ona o lo latou lē faatuatua, o lea ua tali atu ai Iesu: “Ua na o le tatalo ma le anapogi e mafai ai ona ō ese o mea faapena.” E manino lava, sa manaomia ni sauniuniga mo le tulieseina o le temoni e matuā sili lava lona malosi o loo aafia ai i lenei mea. Sa manaomia foi le faatuatua malosi, faatasi ai ma le tatalo e talosagaina ai le fesoasoani sili ona malosi a le Atua.

Ona faaopoopo atu lea o Iesu: “E moni, ou te fai atu ia te outou, afai e tusia lo outou faatuatua ma le fua o le sinapi, e fai atu outou i lenei mauga. Alu atu ia oe i lela mea; ona alu atu ai lea; e leai foi se mea tou te le mafaia.”

Maeu le malosi e mafai ona i ai le faatuatua! O toatugā ma faigata latou te punitia le agaʻigaʻi i luma i le auauanaga a Ieova, atonu e foliga mai e pei o se mauga faaletino e matuā sili ona telē ma e lē mafai ona siitia. A e peitai, ua faaalia e Iesu faapea, afai tatou te atiina aʻe le faatuatua i o tatou loto, ia faasūsū ma faamalosia o tatou loto ina ia tupu, o le a mafai lava ona faalauteleina agaʻi atu i le taʻumatuaina, ma o le a tatou mafai ai ona manumalo i na toʻatugā ma faigata e pei o ni mauga. Mareko 9:14-29; Mataio 17:19, 20; Luka 9:37-43.

◆ O le ā le tulaga na silafia e Iesu ina ua toe taliu mai mai le Mauga o Heremoni?

◆ O le ā le faalaeiauga na avatu e Iesu i le tamā o le tama ua uluitinoina e le temoni?

◆ Ai se ā na lē mafai ai e le ausoʻo ona tuli le temoni?

◆ O le ā le malosi e mafai ona oo i ai le faatuatua e pei ona faaalia e Iesu?