Fesili Mai le Au Faitau

E tusa ai ma le Mataio 17:20, na lē mafai e aposetolo ona faamalolo se tama na maʻi ‘ona o le itiiti o lo latou faatuatua.’ Peitai ane, i le Mareko 9:29, o loo faatatau atu lo latou lē mafaia ona faamalolo ona na manaomia le tatalo. Aisea ua aumaia ai ni mafuaaga lē tutusa i tala eseese a Evagelia?

O le mea moni lava e soo faatasi nei tala e lua, e lē feteenai. Muamua lava, tagai i le Mataio 17:14-20. Na faamatala atu e se tamaloa faapea o lona atalii e maʻi māliu ma na lē mafai e soo o Iesu ona faamalolo le tama. Ona faamalolo ai lea e Iesu le tama e ala i le tuliesea o se temoni na faapuapuagaina o ia. Na fesili atu le au soo pe aisea na lē mafai ai ona latou tuliesea i fafo le temoni. E tusa ai o le tala a Mataio, na tali atu Iesu: “Ona o lo outou faatuatua itiiti; auā e moni, ou te fai atu ia te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i lela mea; ona alu atu ai lea; e leai foi se mea tou te le mafaia.”

Suʻe nei i le Mareko 9:14-29, tatou te maua ai iina nisi faamatalaga auiliili. Mo se faataitaiga, ua aumaia i le Mareko 9:17 le faamatalaga maʻoti o lenei mea na tupu, le ituaiga o maʻi e oso faafuasei na faapogaia e se agaga leaga. E lelei ona matauina o nisi vaega o le Tusi Paia ua taʻua ai na faamalolo e Iesu maʻi māliu ma tagata na uluitinoina e temoni. (Mataio 4:24) Ae o lenei tulaga faapitoa, na māfua le oso o le maʻi ona o se “agaga gūgū ma le tutuli,” o lona uiga, o se agaga leaga lea na faamautinoa mai e le fomai o Luka. (Luka 9:39; Kolose 4:14) Mātau le fasi fuaitau o le Mareko 9:18, o “so o se mea e pue ai ia te ia [e le temoni].” O lea, sa lē faasoloatoa ona osofaia le tama e le temoni, e osofai atu mai lea taimi i lea taimi. Ae sa lē mafai lava e le au soo ona tuli i fafo le temoni ma faapea ona faamalolo ai i le tama. Ina ua latou fesili atu pe aisea, na tali atu faapea Iesu: “Ua na o le tatalo e mafai ai ona ō ese o mea faapena.”

O lea la, o le faitauina ma le faaeteete o le tala a Mareko, e faaalia ai e leai se feteenaiga ma le mea na tusia e Mataio. I le Mareko 9:19, tatou te faitau ai na faanoanoa Iesu ona o le lē faatuatua o lena tupulaga. Ma i le Mareko 9 fuaiupu e 23, ua faamauina ai na ia fetalai atu i le tamā o le tamaitiiti e faapea: “E mafaia mea uma lava i lē faatuatua.” Ua faamamafa mai foi e Mareko le tāua o le faatuatua. Ae o le Mareko 9 fuaiupu e 29, ua aumaia ai e Mareko se faamatalaga patino faaopoopo. Na faaopoopo mai Mareko e tusa ai ma le fetalaiga a Iesu e faatatau i le tatalo, e lei faaaofiaina mai e Mataio po o Luka lena mea.

E mafai la faapefea ona tatou faamatalaina atu? I nisi o mea na tutupu, na tutuli ai i fafo e aposetolo e 12 ma soo e 70 agaga leaga. (Mareko 3:15; 6:13; Luka 10:17) Peitai, na lē mafai e le au soo ona tuli i fafo le temoni i le mea lenei na tupu. Aisea? Afai tatou te tuufaatasia faamatalaga auiliili ua taʻua i nei tala eseese, e tatau ai la ona tatou faia se faaiuga faapea sa lei saunia i latou e tuli ese le temoni i le tala lenei. Atonu o se tasi o vala o le faafitauli ona o le ituaiga o temoni na aafia ai, talu ai e foliga mai o temoni e mafai ona iai ni uiga totino e eseese, e ese foi mea e fiafia i ai, ma e ese foi o latou tomai. O le temoni la lea na ulu i le tama i lenei tala, e manaomia faapitoa ai se faatuatua malosi ma le tatalo faatauanau mo le fesoasoani a le Atua. O le mea moni, sa ia Iesu lena ituaiga o faatuatua. Na ia te ia foi le lagolagosua a le Faafofoga tatalo, o lona Tama lea. (Salamo 65:2) E lē gata ina mafai e Iesu ona faamalolo le tama maʻi e ala i le tuliesea i fafo o le temoni ae na ia faia foi faapea.