Na Latou Faia le Finagalo o Ieova

Na Faafeiloaia Iesu e Avea ma Mesia ma Tupu!

O LE pisapisao o le motu o tagata na agaʻi atu i Ierusalema ia Nisani 9, 33 T.A., na faateʻia ai le toatele o tagata Iutaia. E ui lava o se mea masani le vaaia o tagata o feomaʻi i le aai a o lei oo i le Paseka, ae e ese mai ai nei tagata asiasi. O lē na faaautū i ai la latou solo o se tagata ua tietie i le tamai asini. O le tagata lea o Iesu Keriso, ma na fola ane e tagata o latou ofu ma lau pama i ona luma a o latou alalaga e faapea: “Osana i le alo o Tavita; ia manuia lē afio mai i le suafa o le Alii [Ieova]. Osana i mea e aupito i luga.” I le vaai atu i le motu o tagata, na uunaia ai le toatele o ē na i Ierusalema e auai atu i lea solo.—Mataio 21:7-9; Ioane 12:12,13.

E ui lava o lea ua faafeiloaia o ia, na silafia lava e Iesu e oo ia te ia puapuaga. O le mea moni, ua toe lima lava aso ona fasiotia lea o ia i lea lava aai! Ioe, na silafia e Iesu faapea o Ierusalema o le nuu e matuā faatuiese, ona ia fuafua ai lea ia amanaia mai lona ulufale atu faatasi ma lea lava manatu i lona finagalo.

Ua Faataunuuina se Valoaga Anamua

I le 518 T.L.M., na valoia ai e Sakaria le ulufale manumalo atu o Iesu i Ierusalema. Na ia tusia e faapea: “Ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia o le amiotonu ma le faaola; e agamalu o ia, o loo tietie i le asini, o le tamai asini foi. . . . na te tautala foi i le leleiga i nuu ese; o lana pule e pau mai i le sami e oo atu i le sami, e pau mai i le vaitafe e oo i tuluiga o le lalolagi.”—Sakaria 9:9, 10.

O lea la o le ulufale atu o Iesu i Ierusalema ia Nisani 9 na faataunuu ai le valoaga a le Tusi Paia. Sa lē o se mea na tupu faafuasei ae na fuafuaina ma le faaeteete. Muamua atu, a o i tua o Ierusalema, na faatonu ai e Iesu ona soo e toalua i le faapea atu: “Lua te o atu i le aai ua lumanai oulua, ona iloa atu loa lea e oulua o le asini ua nonoa, o lana tama foi ua faatasi ma ia; lua te tatalaina, i le taʻitaʻi mai ai ia te au. Afai foi e fai ane se tasi se upu ia te oulua, ia oulua fai atu, E manao i ai le Alii; ona tuu loa mai ai lea e ia.” (Mataio 21:1-3) Ae aisea na manao ai Iesu e tietie i Ierusalema i le asini, ma o le ā e tāua ai le auala na tali mai ai le motu o tagata?

O se Feau e Faatatau i le Tulaga Tautupu

O se faatusa vaaia, e sili atu ona malosi nai lo upu e tautala ai. O lea la, na iai taimi na faatinoina ai e perofeta a Ieova la latou feau ina ia lagolagoina ai la latou feau faaperofeta. (1 Tupu 11:29-32; Ieremia 27:1-6; Esekielu 4:1-17) O lenei vaaiga uigā o fesootaiga na faatumauina ai ma lē galo ai i mafaufau o ē loto maaa na matamata ane. I se auala talitutusa, na faatinoina ai e Iesu se feau malosi e ala i le tietie atu i le asini i le aai o Ierusalema. E faapefea?

I vaitaimi o le Tusi Paia na faaaogaina ai le asini mo fuafuaga tautupu. O se faataitaiga, na tietie atu Solomona i lona faauuga e avea ai ma tupu i le “falata” a lona tamā, o se manu e tupuga mai i se asini poʻa. (1 Tupu 1:33-40) O lea la o le tietie atu o Iesu i Ierusalema i le asini sa ono uiga faapea na ia faaalia atu ai le avea o ia ma tupu.a O le gaoioiga na faia e le motu o tagata na lagolagoina ai lea feau. E lē masalomia o le toatele na faia aʻe ai o tagata Kalilaia, ia na fofola atu o latou ofu i luma o Iesu,—o se faiga na toe faamanatu atu ai i le lautele le faailoaga o le tulaga tautupu o Ieu. (2 Tupu 9:13) O lo latou taʻua o Iesu o “le Alo o Tavita” na faamamafa atili ai lana aiā faaletulafono e pule ai. (Luka 1:31-33) Ma o lo latou faaaogaina o lau pama ua faamaonia ai lo latou gauai atu i lana pulega tautupu.—Faatusatusa i le Faaaliga 7:9, 10.

O le solo lea na ō atu i Ierusalema ia Nisani 9 ua avatu ai se feau manino e faapea o Iesu o le Mesia ma le Tupu tofia a le Atua. O le mea moni, e lē o tagata uma na fiafia e vaai ia Iesu o faaali mai i lea auala. Ae maise lava i le ʻau Faresaio ia na manatu e faapea e matuā sese lava ma e lē talafeagai mo Iesu ona faailoa mai i sea tulaga mamalu. E lē taumatea lo latou faatonu atu ma le ita i le faapea atu: “Le aʻoaʻo e, ia e aoai atu i ou soo.” Na tali atu Iesu e faapea: “Ou te fai atu ia te outou, a le feganavai i latou nei, e alalaga mai lava o maa.” (Luka 19:39, 40) Ioe, o le Malo o le Atua o le matua autū lena o le talaʻiga a Iesu. Na ia faalauiloa atu ma le faamalosi lenei feau e tusa lava pe e talia e tagata pe leai.

Le Lesona mo i Tatou

Na matuā manaomia le lototele e Iesu e oo atu ai i Ierusalema e tusa ai ma mea na valoia e le perofeta o Sakaria. Na ia silafia o lona faia faapea e faaosofia ai le maʻemaʻeā o ona fili. A o lei afio atu o ia i le lagi, na faatonuina e Iesu ona soo ina ia talaʻi le tala lelei o le Malo o le Atua ma ia “fai nuu uma lava ma soo.” (Mataio 24:14; 28:19, 20) Ina ia faataunuuina lenei galuega e manaomia ai foi le lototele. E lē o tagata uma e fiafia e faalogo mai i le feau. O nisi e latou te lē faatāuaina, a o isi e latou te teena. O nisi o malo ua latou tuu nisi o faasasaaga i le galuega talaʻi po o le matuā faasaina lava.

Peitai, ua iloa e Molimau a Ieova e faapea o le tala lelei o le Malo faavaeina o le Atua e tatau lava ona talaʻia, e tusa lava pe faalogo mai tagata pe latou te lē amanaiaina foi. (Esekielu 2:7) A o latou faaauau pea ona faia lenei galuega faasaoola, ua faamautinoaina i latou i le folafolaga a Iesu e faapea: “Faauta foi, ou te ia te outou i aso uma lava, e oo lava i le gataaga o le lalolagi.”—Mataio 28:20.

[Faaopoopoga i lalo]