“Le Pepesi o le Filemu”?

“LE PEPESI O LE FILEMU.” “Oi, Maeu se Lalolagi Filemu.” “Ua Faanatinati ona Pepesi atu le Filemu i Mea Uma Lava.” O nei faaupuga sa avea o ni ulutala i nusipepa na sa faateʻia ai le au faitau i le pe a ma le tausaga pe lua foi ua mavae. I le lalolagi aoao, o le suiga i tala, mai le pogisa ma le faaumatiaga i se tulaga lelei ma le manuia, sa o se mea e ofo ai. O le ā le mea na tupu?

E mataʻina lava, ona e leʻi leva tele atu, i na o ni nai masina lava, ae ua faaiʻuina uma lava feteenaiga tetele pe na faaitiitia ai foi lo latou malolosi. I Aferika, na ‘pepesi atu ai’ le filemu i Anekola. I Asia Tutotonu, na aveesea ai e Rusia ana ʻautau mai i Afekanisitana. I Amerika Tutotonu, na faaiʻuina ai le taua i le va o le malo o Nikarakua ma tagata fouvale o le Itu Tetee. I Asia i Saute Sasae, na malilie ai tagata Vietiname e ō ese mai i Kamupesia. Sa oo atu lava le “pepesi o le filemu” i Sasae Tutotonu ona ua iʻu lava ina matuā taofia le taua faamasaa toto i le va o Irana ma Irake.

Atonu e sili foi ona aogā ona matauina le tulaga fou i le va o malo e sili ona malolosi. Ina ua mavae le 40 tausaga o le taua malūlū, sa faigata ona talitonu i ni gaoioiga o le leleiga, i faaupuga e uiga i faanaunauga i lo la va ma gaoioiga mautū agaʻi i le filemu i le va o Rusia ma le Iunaite Setete. E lē gata i lea, e tusa ai ma The Economist, ua faailogaina ai nei e Europa se vaitaimi aupito umi o faaauau ai pea e aunoa ma se taua i lona talafaasolopito uma ua faamaumauina. E moni lava, o le filemu ua iai i tala fou.

O le ā lona uiga? Pe ua iai tagata fai polotiki i le siʻui o le avatua o le “filemu mo o tatou taimi”? O nei upu na saunoa i ai le palemia o Peretania o Neville Chamberlain, i le lima sefulu tasi tausaga ua mavae. Sa faamaonia lava lo latou matuā sese, ina ua oo i sina taimi puupuu lava mulimuli ane, na pa ai le taua lona lua a le lalolagi. Pe o le a moni ea nei ia upu ona ua umi se taimi talu ona fai?