Molimau Maelega a Ieova i le Savaliga!Galuega
O MOLIMAU a Ieova i le uluai senituri sa o ni tagata faamalolosi ma maelega i gaoioiga. Sa latou tauaveina ma le naunautai le poloaiga a Iesu: “Ia . . . o atu e fai tagata o nuu uma lava ma soʻo.”—Mataio 28:19, 20, NW.
Ae faapefea ona tatou iloa faapea sa tauaveina ma le uigā e uluai soʻo o Iesu lena poloaiga? Auā, ua faamaonia mai e le tusi o le Tusi Paia o le Galuega a le au Aposetolo faapea o i latou o ni Molimau maelega a Ieova, ua iai moni i le savaliga!
AOGĀ MA ISI TAUALUMAGA
O uiga tutusa i le gagana ma le faiga i le va o le Tala Lelei lona tolu ma le tusi o Galuega, ua faaalia ai e tasi le tusitala—o Luka, “le fomai pele.” (Kolose 4:14) E faatasi ai i ona taualumaga tutasi, o talanoaga ma tatalo o loo tusia i le Galuega. Pe tusa ma le 20 pasene o le tusi o loo iai lauga, e pei o na sa faia e Peteru ma Paulo i le puipuia o le faatuatuaga moni.
Sa tusia le tusi o Galuega i Roma pe a ma le 61 T.A. E manino lava faapea o le mafuaaga lena e lē o taʻua ai le alu atu o Paulo i luma o Kaisara po o sauaga na faia e Neru faasaga i Kerisiano pe a ma le 64 T.A.—2 Timoteo 4:11.
I le pei o le Tala Lelei a Luka, sa tuusaʻo atu le Galuega ia Teofilo. Na tusia ina ia faamausali ai le faatuatua ma lipotia ai le faasalalau atu o le Faa-Kerisiano. (Luka 1:1-4; Galuega 1:1, 2) Ua faamaonia e le tusi faapea sa iai le aao o Ieova i ana auauna faamaoni. Ua faailoa mai ai ia i tatou le mana o lona agaga ma faamalosia ai lo tatou mautinoa i valoaga faagaeeina tauatua. Ua fesoasoani foi le Galuega ia i tatou ina ia onosai i sauaga, uunaia i tatou ina ia avea o ni Molimau a Ieova faataulagaina totino, ma atiina aʻe lo tatou faatuatua i le faamoemoe o le Malo.
SAʻO I TALA FAASOLOPITO
I le avea o se aumea a Paulo, na faamauina ai e Luka a la faigamalaga. Sa ia talanoa atu foi i molimau vaai tino. O nei vala ma sailiiliga maeʻaeʻa ua avea ai ana tusitusiga o se galuega sili e tusa ai ma le saʻo i tala faasolopito.
O le mea lea ua mafai ai ona faapea mai le tagata aʻoga o William Ramsay: “O Luka o se tusitala o le tulaga muamua: ua lē na ona mau faatuatuaina o ana faamatalaga o mea moni, ae na te maua foi le uiga moni faatala faasolopito . . . Ua ao ona tuufaatasia lenei tusitala ma tusitala aupito silisili o tala faasolopito.”
PETERU—O SE MOLIMAU FAAMAONI
O le galuega na tuuina mai e le Atua o le faalauiloaina o le tala lelei e mafai ona tauaveina i le na o le mana o le agaga paia o Ieova. O lea, ina ua maua e soʻo o Iesu le agaga paia, na avea ai i latou o ana molimau i Ierusalema, Iutaia, ma Samaria ma “e oo lava i tuluiga o le lalolagi.” I le Penetekoso o le 33 T.A., ua faatumulia ai i latou i le agaga paia. Talu ai ona o le taimi lea faatoʻā ta le 9:00 i le taeao, ua mautinoa lava e leʻi onanā i latou, e pei ona manatu ai nisi. Ua avatu ai e Peteru se molimau e faafiafiaina ai, ma e 3,000 ua papatisoina. Ua taumafai ē tetee faalotu e taofi le tautala atu o tagata folafola o le Malo, ae i le tali mai i la latou tatalo, ua faapogai ai e le Atua ana molimau ina ia tautatala atu i lana afioga ma le faamalosi. Ina ua toe faamataʻuina foi, ua latou tali atu: “E tusa ona sili o lo matou ʻanaʻana i le Atua o le pule na i lo o tagata.” [NW] Ua faia pea le galuega a o faaauau ona latou talaʻi atu mai lea fale i lea fale.—1:1–5:42.
O le faalagolago i le agaga o Ieova ua mafai ai e ana molimau ona onosaia sauaga. O lea, ina ua uma ona fetogia le molimau faamaoni o Setefano i maa ma oti ai, ua salalau atu soʻo o Iesu, ae ua avea ma auala ua salalau atu ai ma le tala lelei. Sa paeonia le faievagelia o Filipo i Samaria. O le mea e ofo ai, ona ua faaliliuina le tagata sauā o Saulo o Taso. I le avea o le aposetolo o Paulo, ua ia lagona le aasa o sauaga i Tamaseko ae ua sola mai fuafuaga fia fasioti a tagata Iutaia. Sa auaufaatasi Paulo ma aposetolo i Ierusalema mo se taimi puupuu, ona toe amata lea ona agaʻi atu i lana faiva.—6:1–9:31.
O loo iai le aao o Ieova i ana molimau, e pei ona faaauau ona faaalia i le tusi o Galuega. Ua faatuina e Peteru Toreka (Tabitha) mai le oti. I le tali atu i se valaau, ua ia faalauiloa atu ai i Kaisaraia le tala lelei ia Konelio, i lona aiga, ma ana uo. Ua papatisoina i latou o ni uluai tagata o Nuu Ese e avea ma soʻo o Iesu. O lea, ua iʻu ai “vaiasosa e fitugafulu,” ma ua aumaia ai i tatou i le 36 T.A. (Tanielu 9:24) E leʻi pine mulimuli ane, ua fasiotia e Herota Akeripa I le aposetolo o Iakopo ma faafalepuipuiina Peteru. Ae ua maua e le aposetolo se laveaiga faaagelu mai le fale puipui, ma ‘ua tupu tele le afioga a Ieova ma ua salalau atu.’—9:32–12:25.
MALAGA FAAMISIONARE E TOLU A PAULO
Ua tafe atu faamanuiaga ia i latou o ē faaaogā i latou lava i le auaunaga a le Atua, e pei ona sa faia e Paulo. Ua amata lana uluai malaga taamilo faamisionare i Anetioka, i Suria. I le motu o Kuperu, na oo ai ina talitonu le sui konesula o Sekio Paulo ma isi e toatele. I Pereka i Pafulia, ua alu ese ai Ioane Mareko mo Ierusalema, ae agaʻi atu pea Paulo ma Panapa i Anetioka i Pisitia. I Lusa, ua faaoo atu e tagata Iutaia sauaga. E ui ina sasaina ma tuua ua tali oti, ae ua toe malosi Paulo ma faaauau i le faiva. I le iʻuga, ua toe foi atu o ia ma Panapa i Anetioka i Suria, ua iʻu ai le uluai malaga taamilo.—13:1–14:28.
I le pei o lona sui i le uluai senituri, ua mafai ai e le Vaega Pule i aso nei ona taliina fesili faatasi ma le taʻitaʻiga a le agaga paia. O le peritomeina sa lē iai faatasi ma “mea e tatau,” ia e aofia ai le ‘faamamao mai mea e fasia mo tupua ma le toto ma mea e titina ma le faitaaga.’ (15:28, 29) A o amata e Paulo ma Panapa le malaga lona lua, ua aufaatasi atu ia i laua Timoteo. Ua faia ni gaoioiga vave ina ua aumai le valaau ina ia ō atu i Maketonia. I Filipi, ua iʻu ai le molimau atu i le vevesi ma le faafalepuipuiina. Ae ua tatalaina Paulo ma Panapa e ala i se mafuie, ma talaʻi atu i le pule o le fale puipui ma lona auaiga, ma ua oo foi ina talitonu i latou nei.—15:1–16:40.
O auauna a Ieova e ao ona avea o ni tagata aʻoga filiga o lana Afioga. O ē sa i Perea o ni tagata suesue i tusi, ma sa faapena foi Paulo. I le Areopako i Atenai, ua ia avatu ai se molimau e uiga i le faiga faalefoafoaga a Ieova, ma ua oo ina talitonu nisi. Ua faaalia le tele o le fiafia i Korinito o lea ua ia nofo ai i lena aai mo le 18 masina. A o iai i inā, ua ia tusia ai lana tusi Muamua ma le Lua i Tesalonia. Sa faamavae atu i lana au malaga o Sila ma Timoteo, ona folau atu lea o le aposetolo i Efeso, ma alu atu i Kaisaraia, ma malaga atu i Ierusalema. Ina ua toe foi mai i Suria i Anetioka, ona faaiʻu lea i inā lana malaga taamilo faamisionare lona lua.—17:1–18:22.
E pei ona faaalia e Paulo, o le molimau atu i lea fale ma lea fale o se vaega matuā tāua o le faiva faa-Kerisiano. O le malaga taamilo lona tolu a le aposetolo (52-56 T.A.) e matele lava ina toe uia le auala o lana malaga taamilo lona lua. Ua faagaeeina e le faiva a Paulo teteega i Efeso, o i inā ua ia tusia ai le Tusi Muamua i Korinito. Na tusia le Tusi lona Lua i Korinito i Maketonia, ma na ia tusi atu i Roma a o iai i Korinito. I Meleto, ua feiloai ai Paulo ma toeaina o Efeso ma tautala e uiga i le pe na faapefea ona ia aʻoaʻo atu ia i latou i le lautele ma mai lea fale i lea fale. Ua iʻu lana malaga taamilo lona tolu ina ua taunuu i Ierusalema.—18:23–21:14.
LĒ UIGĀ SAUAGA
E leʻi taofiina e sauaga laugutu o molimau faamaoni a Ieova. O lea ina ua ō mai le motu o tagata sauā e faasagatau ia Paulo i le malumalu i Ierusalema, ua ia molimau atu ma le faamalosi i tagata faatupu faalavelave ua matuā feita. O se taupulepulega ina ia fasiotia o ia na faaleaogāina ina ua auina atu o ia i le Kovana o Filiki i Kaisaraia faatasi ma le leoleoga faafitafita. Ua noanoatia pea Paulo mo tausaga e lua a o taumafai Filiki e faia se faiga faatogafalea lea sa leʻi taitai ona taunuu. Ua faalogo lē na sui ia te ia, o Feso, i le talosaga a Paulo ia Kaisara. Ae peitai, a o leʻi agaʻi atu i Roma, ua faia ai e le aposetolo se tetee na faateʻia ai i luma o le Tupu o Akeripa.—21:15–26:32.
Ma le lē faavaivai i tofotofoga, ua faaauau ai pea e auauna a Ieova ona talaʻi atu. Sa mautinoa lava le moni o lenei mea e uiga ia Paulo. Ona o lana talosaga ia Kaisara, ua agaʻi atu ai le aposetolo i Roma faatasi ma Luka pe a ma le 58 T.A. I Mura i Lukia, ua tuu atu ai i latou i le isi vaa. E ui ua afatia i latou ma malepe ai le vaa ma taunuu ai i le motu o Melita, ae mulimuli ane na ave ai i latou e se isi vaa i Italia. E oo lava i lalo o leoleoga faafitafita i Roma, e valaaulia e Paulo tagata e ō mai ma faalauiloa atu ia i latou le tala lelei. I le taimi o lenei faafalepuipuiina, ua tusi ai o ia i tagata Efeso, Filipi, Kolose, Filemoni, ma Eperu.—27:1–28:31.
UA IAI PEA I LE SAVALIGA
Ua faataʻitaʻia e le tusi o Galuega faapea o le galuega na amata e le Alo o le Atua sa tauaveina pea ma le faamaoni e molimau a Ieova o le uluai senituri. Ioe, i lalo o le mana o le agaga paia o le Atua, na latou molimau atu ai ma le maelega.
Ona o le faalagolago atu ma le tatalo a uluai soʻo o Iesu i le Atua, sa iai ai Lona aao ia i latou. O lea, e faitau afe ua oo ina talitonu, ma sa ‘talaʻiina atu le tala lelei i mea uma lava na faia i lalo o le lagi.’ (Kolose 1:23) E moni, i lena taimi ma nei foi taimi, ua faamaonia e Kerisiano moni i latou o ni molimau maelega a Ieova ua iai i le savaliga!
[Pusa/Ata i le itulau 13]
KONELIO LE TAʻITAʻIAU O LE TOASELAU: O Konelio sa o se ofisa o le vaegaau, po o le taʻitaʻiau o le toaselau. (10:1) O le totogi faaletausaga o se taʻitaʻiau pe a ma le faalima taimi e telē ai na i lo totogi o tagata maulalo o le vaegaau, pe tusa ma le 1,200 tenari, ae e mafai ona sili atu. Pe a litaea, na te maua se meaalofa o tupe po o se fanua. O ana teuga o le vaegaau e felanulanuai, e mai lava i le puloutau lanu siliva e oo atu i le ofu tele faapiliki, o se ofu tatapulima ua faia i le vulu lelei, ma talita o vae ua teuteuina. I le iloa i ai, o le ʻau a le taʻitaʻiau e faia aʻe i tane e 100, ae i nisi taimi e na o le 80 pe a. O tagata fou i le “ʻau a Italia” e manino lava e mai tagatanuu Roma, ma tagata lautele i Italia.
[Pusa/Ata i le itulau 13]
TATALO I LUGA O LE TAUALUGA O SE FALE: Sa faaalia ma le fetaui e Peteru le poto ina ua ia tatalo toatasi i luga o le taualauga o se fale. (10:9) O le sio itiiti ua faataamilo i luga o le taualuga mafolafola sa natia ai o ia mai le iloa atu. (Teuteronome 22:8) Sa avea foi le taualuga o le fale o se nofoaga e mapu i ai ma solaese ai mai le pisapisaō o le auala i taimi o le afiafi.
[Pusa/Ata i le itulau 13]
UA MANATU I AI O ATUA I FOLIGA O TAGATA: O le faamaloloina e Paulo o se tamaloa pipili na manatu ai tagatanuu o Litia faapea sa faaalia mai atua pei o ni tagata. (14:8-18) O Seu, le atua sili o Eleni, sa iai sona falesa i lena aai, ma o lona atalii o Hereme, o le avefeau a atua, sa matauina i ana lauga uigā. Talu ai le manatu o tagata faapea o Paulo o Hereme lea ona sa ia taʻimua i le tautala atu, sa latou manatu ai ia Panapa o Seu. Sa o se aganuu le faapaleina o tupua o atua sese i ula o fugalaau po o lau o laau o le tasura po o le paina, ae na teena e Paulo ma Panapa na faiga ifo i tupua.
[Pusa/Ata i le itulau 13]
TALITONU LE PULE O LE FALE PUIPUI: Ina ua matala faitotoa o le fale puipui ona o le mafuie ma matalatala noanoataga o ē na iai i totonu, sa taumafai le pule mai Filipi o le fale puipui e pule i lona ola. (16:25-27) Aiseā? Auā i le tulafono a Roma na poloaiina faapea afai e solase pagota o lana sala o le a puapuagatia ai le leoleo o le fale puipui. E foliga mai sa filifili le leoleo o le fale puipui e oti i le pule i le ola na i lo le oo i se faasalaga e faasatauro ai o ia, lea atonu sa faatalitalia e nisi pagota. Ae peitai, sa ia talia le tala lelei, ma “papatisoina loa lea o ia ma lona aiga uma.”—16:28-34.
[Pusa/Ata i le itulau 14]
O SE TALOSAGA IA KAISARA: I le fanau mai ma avea o se tagatanuu Roma, sa iai ia Paulo le aiā e talosaga ai ia Kaisara ma ia faamasinoina i Roma. (25:10-12) Sa lē tatau ona saisaitia se tagatanuu Roma, sasaina, pe faasalaina e aunoa ma le faamasinoga.—16:35-40; 22:22-29; 26:32.
[Pusa/Ata i le itulau 14]
LE TAUSI MALUMALU O TIANA: I le ita ona o le talaʻiga a Paulo, na faapotopoto ai e le tagata faimea ario o Temetiu se motu o tagata faatupu faalavelave. Ae sa faataapeina le motu o tagata e le tusiupu o le nuu. (19:23-41) Na faia e tagata faimea ario ni faatusa ario laiti mo le vaega aupito sili ona paia o le malumalu lea o loo faatu ai le faatagata o le atua fafine o le fanau tama e tele ona susu o Tiana. Sa tauva aai o le isi i le isi mo le faamamaluina i le avea o lona ne·o·koʹros, po o ‘lē e tausia le malumalu.’
[Ē Ana le Ata]
Musei Capitolini, Roma
[Pusa/Ata i le itulau 14]
FAALAVELAVE I LE SAMI: Ina ua fetaiai le vaa na ave ai Paulo ma se afā tele na taʻua o Eurokuto ‘sa tau lē mafai ona latou taofia le tulula.’ (27:15, 16) O le tulula o se tamai vaa sa masani ona tau i tafatafa o se vaa tele. E tauaveina e se vaa tele ni uaea po o maea e mafai ona toso faataamilo i le tino o le vaa ina ia nonoa ai i luga ma faasaoina ai le milosia e mafua mai i gaoioiga a le fanā o le vaa i taimi o matagi. (27:17) Na motusi ese e nei auvaa taula e fa ma tatala ai fusi o le foeuli, po o foe i le pito i lalo, sa faaaogā e uli ai le vaa. (27:29, 40) Sa iai i le vaa o Alesania se faailoga “Seukuroi”—o Castor ma Pollux, sa manatu i ai o ni laveai o le auvaa.—28:11.