Le Mafuaaga Latou te Faaaogā ai Mea Faamanatu i le Tapuaiga
I NAPLES, i Italia. Seʻi vaai faalemafaufau faapea o loo e iai i inā i uluai tausaga o lona 18 o senituri T.A. I lona malumalu, o loo tu ai le faifilosofia Aialani o George Berkeley i luma o se mea faamanatu taʻutaʻua faalotu. O loo ia vaai ma le lē talitonu i le faafoligaina mai o le toto ua liusuavai o “San Gennaro,” le “tagata paia” Katoliko o Januarius.
I lenei itu, ua fai ai sina suiga itiiti o Naples. Mo se faataʻitaʻiga, e ui lava i le leaga o le tau i se tasi sauniga i nai tausaga na seʻi mavae atu, ae sa toe faatumuina le malumalu i tagata, ma na tupu ai se mea na foliga mai o se vavega. Na faafeiloaia le mea faamanatu ma le solo na taʻitaʻiina e le katinale akiepikopo i se pati mafana. Ioe, o lenei mea, o se tasi lea o mea na foliga mai ai ua liusuavai le toto o “San Gennaro” mo le tele o taimi. O vavega o loo aafia ai lenei faatusa faalotu na lipotia mai faapea na tutupu talu mai lona 14 o senituri.
E tusa ai ma le tu faa-Katoliko, o se mea faamanatu (relic) (mai le gagana Latina relinquere, o lona uiga “ia tuua i tua”) o se mea na tuua e se tagata sa manatu i ai o se tagata paia. E pei ona faasino mai e le Dizionario Ecclesiastico faapea, o ni mea faamanatu “i le uiga maumauai o le upu, o le tino po o se vaega o le tino ma lefulefu o le Tagata Paia, i se uiga lautele, o le mea e fesootai ma le tino o le tagata paia, ma ona o lea e tatau ai ona tuutoina i ai.”
Lagolagosua a le Pope
E lē taumate, e toatele ua tuuina atu faiga mamalu i mea faamanatu faalotu ona o vavega e foliga mai e fesootai atu ma ia mea. O le lagolagosua a le Pope e mautinoa o le tasi lea vala i lo latou lauiloa.
E lē itiiti mai i le toʻafa pope i tausaga e 70 ua mavae na tuuina atu se uaʻi faapitoa i mea faamanatu. Ua faaalia mai e se mekasini faavaitaimi a le lotu Katoliko faapea i le pei o lona sui muamua o Pio XI, o Pope Pio XII “na teuina mea faamanatu o le tagata paia o Lisieux i lona tino.” O Paulo VI “na ia teuina se tamatamai lima o le aposetolo [o Toma] i luga o se kesi i lona potu suesue,” ma o Ioane Paulo II “na te teuina, i lona lava fale, fasi tino o . . . toega o le tino oti” o “Sagato Benedict” ma “Sagato Aneterea.”—30 giorni, Mati 1990, itulau 50.
I le vaai atu i lena lagolagosua a pope, e lē o se mea la e ofo ai faapea o le manaoga mo mea faamanatu mo le tuutoina atu i ai a le tagata lava ia ma le tuutoina atu o le lautele, ua faateleina. Ae pe o faafiafiaina ai le Atua i le tuutoina atu i mea faamanatu faalotu?
[Ata i le itulau 3]
O le reliquary, o se pusa o loo faasaoina ai mea faamanatu faalotu
[Ē Ana le Ata]
Courtesy of The British Museum