‘E Tatau i se Ovasia ona . . . Pulea Totino’
‘E tatau i se ovasia ona . . . pulea totino.’—TITO 1:7, 8.
1, 2. O le ā le faaaʻoaʻoga o le taofiofi na saunia e Viliamu o Orange, faatasi ma ā iʻuga aogā?
UA SAUNIA e le talafaasolopito se faaaʻoaʻoga e matuā aogā lava ona matauina e aofia ai le taofiofia o faalogona ootia. I le ogatotonu o le senituri lona 16, na alu ai se malaga suesue a le aloalii talavou o Holani e suafa ia Viliamu o Orange ma le Tupu o Enelē II o Falani. Sa faailoa ane e le tupu ia Viliamu le la fuafuaga ma le tupu o Sepania ina ia fasiotia uma tagata Porotesano i Falani ma Holani—o le mea moni, i Kerisinetoma uma lava. Na iai le manatu o le Tupu o Enelē faapea o Viliamu o ia o se Katoliko tuutoina e pei o ia ma o le mea lea na ia faailoa uma atu ai auiliiliga o lenei faufauga leaga. Sa matuā lē fiafia Viliamu i le mea na ia faalogo i ai ona o le toatele o ana uo vavalalata o ni Porotesano, peitai na te leʻi faailoaina atu le mea sa ia manatu i ai; na i lo lea, sa ia faaalia le naunau tele i auiliiliga uma na avatu e le tupu ia te ia.
2 Peitai, i le taimi lava na mafai ai ona faia e Viliamu, na ia faataatia ai loa ni fuafuaga e taofia ai le faufauga leaga, ma na taʻitaʻia saʻo lenei i le faasaolotoina o tagata Holani mai le pulea e le lotu Katoliko faa-Sipaniolo. Ona sa mafai e Viliamu ona faaalia le pulea totino ina ua ia muai faalogo i lenei faufauga leaga, na lauiloa ai o ia o “Viliamu le Gūgū.” Talu ai le taulau manuia o Viliamu o Orange, ua faailoa mai ai ia i tatou faapea: “Sa avea o ia ma faavae moni o le tutoatasi ma le taʻutaʻua o le malo o Holani.”
3. O ai e mauaina aogā pe a faaalia e toeaina Kerisiano le pulea totino?
3 Ona o lona taofiofi, na aogā tele ai Viliamu le Gūgū ia te ia lava atoa ma ona tagata. I se faatusatusaga, o le fua o le agaga paia o le pulea totino, e ao ona faaalia i aso nei e toeaina Kerisiano, po o ovasia. (Kalatia 5:22, 23) I le faaalia o lenei uiga, o le a maua ai e i latou lava atoa ma le faapotopotoga ni aogā. I le isi itu, o le lē taulau ona latou faaalia o le pulea totino e mafai ona faia ai se faaleagaina e lē mafuafuaina.
Pulea Totino—O se Mea Manaomia mo Toeaina
4. O le ā le fautuaga a le aposetolo o Paulo ua faamamafa ai le manaoga mo toeaina ina ia faaalia le pulea totino?
4 Na talisapaia e Paulo, o ia o se toeaina, le tāua o le pulea totino. Ina ua ia fautuaina toeaina o ē na ō ane ia te ia mai Efeso, na ia taʻu atu ia i latou: “Ina tausi ia outou ia te outou, atoa ma le lafu mamoe uma.” Faatasi ai ma isi mea, o le tausia o i latou lava e aofia ai le manaoga ia faaalia le pulea totino, ia vaai a latou amio. I le tusi atu ia Timoteo, na taʻua ai e Paulo le manatu lava lea i le faapea atu: “Ia oe lava ia te oe, atoa ma lau e aʻoaʻo atu.” Sa faaalia e Paulo i lena fautuaga le popole i taaʻiga faaletagata a nisi e manatu mamafa tele i le talaʻiga na i lo le faatinoina o mea na latou talaʻia. O le mea lea, na ia muai faamamafaina ai le manaoga ina ia vaavaai i latou lava.—Galuega 20:28; 1 Timoteo 4:16.
5. Ua faapefea ona tofia toeaina Kerisiano, ma o gafea o le Tusi Paia ua faamauina ai o latou agavaa?
5 I le faasologa mai o tausaga, ua faasolosolo ai pea ina manino atili le matafaioi faale-Tusi Paia a toeaina. I aso nei, ua tatou iloaina o le avea ma toeaina o se tulaga e tofia. Ua tofia toeaina e le Vaega Pule o Molimau a Ieova po o ona sui e fesootai tuusaʻo atu i ai. I le isi itu, o lena tino, ua fai lea ma sui o “le auauna faamaoni ma le mafaufau.” (Mataio 24:45-47) O agavaa mo le avea ma ovasia Kerisiano, po o se toeaina, ua muai aumaia e le aposetolo o Paulo i le 1 Timoteo 3:1-7 ma le Tito 1:5-9.
6, 7. O ā agavaa patino o toeaina e manaomia ai le pulea totino?
6 Ua taʻua e Paulo i le 1 Timoteo 3:2, 3, NW faapea e tatau i se ovasia ona fai faatatau ona uiga. O lenei mea atoa ma le manaoga mo se toeaina ina ia maopoopo, e manaomia ai le faaalia o le pulea totino. O se tagata e agavaa ina ia avea ma ovasia e lē o ia o sē e fasitagata ma e lē finau. O ia agavaa e manaomia ai foi e se toeaina ona pulea totino. E lē gata i lena, ina ia aua neʻi avea se toeaina ma sē onā ma faamisa, pe inu tele i le uaina, e tatau ona ia faaalia le pulea totino.—Vaai foi faamaumauga i lalo o le 1 Timoteo 3:2, 3, NW.
7 I le Tito 1:7, NW ua taʻua patino ai lava e Paulo faapea e tatau i se ovasia ona pulea totino. Peitai, ia matau, e fia isi mea manaomia o loo lisiina ai i fuaiupu ia o loo aofia ai le pulea totino. Mo se faaaʻoaʻoga, e tatau i se ovasia ona saoloto mai tuuaʻiga, ioe, ia lē mataʻuleagaina. O le mea mautinoa, e lē mafai e se toeaina ona ausia na mea manaomia seʻi vagana ua ia faaalia le pulea totino.
Pe a Feutagai ma Isi
8. O ā uiga e manaomia e toeaina i le avatuina o se fautuaga ua faamamafaina ai le manaoga mo le pulea totino?
8 I le ma le isi, e tatau i se ovasia ona onosai ma faapalepale i feutagaʻiga ma uso talitonu, ma o lenei mea e manaomia ai le pulea totino. Mo se faaaʻoaʻoga, tatou te faitau ai i le Kalatia 6:1, [NW]: “Le au uso e, afai e uia e se tagata se ala sese ae na te leʻi muai iloa, o outou o ē ua iai agavaa faaleagaga [ae maise o toeaina] ia taumafai e faafoi mai lena tagata i le loto agamalu, a o taitoatasi outou ma faaeteete, ona o le mataʻu ina neʻi tofotofoina foi outou.” E manaomia le pulea totino ina ia faaalia ai le loto agamalu. I lea itu, o le pulea totino e aofia ai foi le vaavaaia o le tagata lava ia. E faapena foi pe a talosagaina se toeaina mo se fesoasoani e se tagata o loo mafatia, e matuā tāua ai lava ona pulea totino. E tusa foi po o le ā le manatu o se toeaina e uiga i le tagata, e tatau lava ia te ia ona agalelei, onosai, ma malamalama. Na i lo le vave avatu o se fautuaga, e tatau i le toeaina ona naunau e faalogologo ma tāea mai i le tagata le mea atonu o loo faasoesā ia te ia.
9. O le ā le fautuaga e ao i toeaina ona teu i manatu i feutagaʻiga ma uso ua matuā mafatia?
9 Ae maise lava pe a feutagai ma tagata o loo matuā mafatia, ua talafeagai ai le fautuaga lenei o loo i le Iakopo 1:19: “[Ia iloa lenei mea] oʻu uso pele e, ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.” Ioe, ae maise lava pe a fetaiai ma ni tali inainā pe aafia ai faalogona ootia, e tatau i se toeaina ona faaeteete ia lē tali atu foi faapena i ai. E manaomia le pulea totino ina ia aua ai le faafetauia upu e osofai mai ai faalogona ootia, i upu e osofai atu ai faalogona ootia, aua le “taui atu le leaga i le leaga.” (Roma 12:17) I le tali atu i lena auala o le a na ona faaleaga atili ai o mea. O lea foi la ua toe aumai e le Afioga a le Atua i inei se fautuaga lelei mo toeaina, e faamanatu mai ai ia te i latou faapea “o le tali filemu e liliueseina ai le ita.”—Faataoto 15:1.
Pulea Totino i Fono a Toeaina ma Mataupu Faafaamasinoga
10, 11. O le ā e tupu i fono a toeaina, e faaalia ai le manaomia o le pulea totino i na faatasiga?
10 O le isi vaega e manaomia ai e toeaina Kerisiano le faaeteete ia faaalia le pulea totino, o taimi o fono a toeaina. I le tautala atu ma le agamalu mo le lelei o le upu moni atoa ma le faamasinoga tonu, e manaomia ai le pulea totino i nisi taimi. E manaomia foi le pulea totino ina ia alofia ai le taumafai e faumalo i se talanoaga. Afai e iai i se toeaina se faanaunauga faapena, o se agalelei le ofoina atu e se isi toeaina ia te ia o se fautuaga.—Faatusatusa 3 Ioane 9.
11 I le ma le isi, i fono a toeaina, atonu e tofotofoina se toeaina ua naunautai nauā e faatupuina aʻe faalogona ootia, pe oo foi ina leotele ai. Pagā le matuā faaalia ai i na gaoioiga o le lē lava o le pulea totino! O na mea e faatoʻilalo moni ai i ni itu se lua. O le tasi itu, e oo ai ina leiloa e se tagata lona pulea totino, ma iʻu ai ina faavaivaia lona lava tulaga e ala i le faatagaina o faalogona ootia e ufitia ai mea moni. I le isi itu, ona ua faatupuina aʻe e se tagata faalogona ootia, e tauau ai ina ia faavevesia pe oo foi ina tetee ai i ona uso toeaina. Peitai, a lē faaeteete toeaina, e ono avea le eseese aʻiaʻi o manatu ma auala e faapogaia ai fevaevaeaiga i o latou tulaga. O le a iʻu lenei mea ina faaleagaina ai i latou lava atoa ma le faapotopotoga.—Faatusatusa Galuega 15:36-40.
12. I le feagai ai ma ā tulaga e tatau ai i toeaina ona faaeteete ia faaalia le pulea totino?
12 E matuā manaomia foi le pulea totino e toeaina ina ia alofia ai le faaituau po o le faaaogāina sese o la latou pule. E faigofie tele ona lolo atu i tofotofoga, i le faatagaina o manatunatuga faaletagata lē lelei atoatoa e taaʻina ai mea e tautala ai pe faia e se tasi! I lea taimi ma lea taimi, ua lē taulau ai i toeaina ona gaoioi ma le tonu pe afai e maua se tasi o a latou fanau po o se isi o le auaiga ua agasala i le faia o se amio sese. I tulaga faapena, e manaomia ai le pulea totino ina ia aua le avea sootaga tau le toto ma mea e pupuni ai le faaiʻuga tonu.—Teuteronome 10:17.
13. Aiseā e manaomia faapitoa ai lava le pulea totino e toeaina i mataupu faafaamasinoga?
13 O se isi tulaga e matuā tāua ai le pulea totino, o le taimi e taulima ai se mataupu faafaamasinoga. E tatau i toeaina ona faaalia le pulea totino e sili atu ina ia aua ai neʻi taaʻina faaletatau i latou e faalogona ootia. E lē tatau ona faigofie nauā ona latou lolo atu ona o loimata. I le taimi lava e tasi, e tatau i se toeaina ona faaeteete ia aua neʻi leiloa lona toʻafilemu pe afai e lafo atu ni tuuaʻiga ma ni faitioga leaga ia te ia, e ono pei o le tulaga pe a feagai ma aposetate. Ua fetaui lelei ai upu a Paulo i inei: “E le tatau ona finau o le auauna a le Alii, a ia agamalu i tagata uma.” E manaomia le pulea totino ina ia faaalia ai le agamalu i lalo o omiga. Ua faaauau ona faailoa mai e Paulo faapea “o le auauna a le Alii” e tatau ona “[taofiofia ia lava mai le leaga], ia aʻoaʻo atu ma le agamalu i e o finau mai.” Ina ia faaalia le agamalu ma ina ia taofiofia se tasi pe a feagai ma teteega, e manaomia ai le pulea totino e sili atu.—2 Timoteo 2:24, 25.
Pulea Totino i le Va ma le Itupā Vaivai
14. O le ā le fautuaga lelei e ao i toeaina ona utagia i a latou feutagaʻiga ma i latou o le itupā vaivai?
14 E tatau i toeaina ona matuā mataalia e faaalia le pulea totino pe a oo i a latou feutagaʻiga ma i latou o le itupā vaivai. Ua lē atamai mo se toeaina ona faia na o ia se asiasiga faaleoleo mamoe i se tuafafine. E ao i le toeaina ona ō faatasi ma se isi toeaina po o se auauna o le faiva. Atonu i le talisapaia o lenei faafitauli, na fautuaina ai e Paulo le toeaina o Timoteo: “Ia aioi atu i . . . loomatutua, peiseai o tinā; o fafine muli foi, peiseai o tuafafine ia, [ma le amio mamā uma].” (1 Timoteo 5:1, 2) Ua matauina nisi o toeaina e tuu o latou lima i luga o se tuafafine e pei o se gaoioiga a se tamā. Peitai, atonu ua latou faaseseina i latou lava, auā e mafai ona mafua sea gaoioiga ona o se uunaiga o le alofa faaleuo na i lo le alofa faaleuso Kerisiano e mamā.—Faatusatusa 1 Korinito 7:1.
15. Ua faapefea ona faamatilatila i se mea na tupu le faalumaina e mafai ona iʻu i le suafa o Ieova pe a lē lava ona faaalia e se toeaina le pulea totino?
15 Pagā le tele o le faaleagaina o le upu moni ua iʻu i ai ona sa lē faaalia e nisi o toeaina le pulea totino i a latou feutagaʻiga ma tuafāfine i le faapotopotoga! I nai tausaga ua mavae atu, na faateʻaina ai se toeaina ona sa ia auai i le mulilua ma se tuafafine Kerisiano e lē o se Molimau lana tane. I le po lava lea na faasilasila ai le faateʻaina o lē sa avea muamua ma toeaina, na masau atu ai le tane loto tigā i le Maota o le Malo ma se fana ma faapā agaʻi i le toalua lea ua agasala. E leai se tasi o i laua na fasiotia, ma na toe aveesea le auupega mai ia te ia, peitai i le aso na sosoo ai, na faatomuaina ai e se nusipepa lauiloa i ona itulau muamua faamatalaga e uiga i ‘le tafanaina i se lotu.’ Pagā le faalumaina na aumaia e le lē lava o le pulea totino o lena toeaina, i le faapotopotoga atoa ma le suafa o Ieova!
Pulea Totino i Isi Itu
16. Aiseā e tatau ai i toeaina ona faaeteete ia faaalia le pulea totino pe a faia lauga i le lautele?
16 E matuā manaomia foi le pulea totino pe a avatu e se toeaina se lauga i le lautele. E ao i se failauga i le lautele ona fai ma faaaʻoaʻoga o le toʻa ma apoapo. Ua taumafai nisi e faafiafia a latou au faalogologo i le faia o le tele o faaupuga mālie e tau ina feʻatai ai. Atonu e faaalia ai i lenei mea le lolo atu i le tofotofoga ina ia faafiafia la latou aofia. O le mea moni, o le lolo uma atu i tofotofoga, o le lē lava lea o le pulea totino. E mafai foi ona faapea o le ovataimi pe a faia se lauga, e faaalia ai le lē lava o le pulea totino, atoa ma le lē lava o sauniuniga.
17, 18. O le ā le vaega a le pulea totino e faia i le faapaleniina e se toeaina o ana avega tauave eseese?
17 O toeaina galulue mamafa uma e tatau ona faafetaiaia le luʻi ia faapaleniina mea eseese ua tagisiaina lona taimi ma le malosi. E manaomia le pulea totino ina ia aua ai le māfuli uma atu i le tasi mea po o le isi. O nisi toeaina ua manatu mamafa tele i manaoga o le faapotopotoga ua faapea ai ona galo ia i latou o latou aiga. O le mea lea, ina ua taʻu atu ai e se tasi tuafafine i le avā a se toeaina e uiga i le manaia o le asiasiga faaleoleo mamoe sa faia e le toeaina ia te ia, na faapea mai le avā a le toeaina: “Ou te faamoemoe o le a ia faia se asiasiga faaleoleo mamoe ia te aʻu i se isi taimi!”—1 Timoteo 3:2, 4, 5.
18 E manaomia foi e se toeaina le pulea totino ina ia faapaleni ai le taimi na te faaaluina i suesuega totino ma le taimi e faaaluina i le faiva i le fanua po o asiasiga faaleoleo mamoe. I le manatu atu i le taufaaʻoleʻole o le loto o le tagata, e matuā faigofie lava i se toeaina ona faaaluina le taimi tele i mea ua ia iloa e sili ona fiafia i ai, na i lo le taimi e tatau ai mo ia. Afai e fiafia o ia i tusi, atonu e sili atu ai la ona ia faaaluina se taimi tele i suesuega totino na i lo le mea e ao ona ia faia. Afai na te iloa e fai si faigata o le faiva i lea fale ma lea fale, atonu o le a ia sailia ni faamolemolega e faagalo ai, ae faia asiasiga faaleoleo mamoe.
19. O le ā le matafaioi a toeaina ua faamamafaina ai le manaomia o le pulea totino?
19 O le matafaioi ia tausisi i mea e faalilolilo, e manaomia ai foi e se toeaina ona mataalia ina ia faatinoina le matuā pulea totino. Ua talafeagai ai i inei le fautuaga e faapea: “Aua le faaali atu le upu faalilo a le tasi tagata.” (Faataoto 25:9) Ua faaalia i mea tutupu faapea atonu o se tasi lenei o mea manaomia ua faafia ona solia e toeaina. Afai o iai i se toeaina se avā atamai ma le alofa o sē e lelei a la fesootaiga, atonu la o le a taaʻina o ia e talanoaina pe na ona taʻu foi i ai o mataupu e faalilolilo. Peitai e lē tatau lenei mea ma e matuā lē atamai lava. Muamua, ua faalataina ai le faatuatuaina. Ua ō mai uso ma tuafāfine faaleagaga i toeaina ina ia malu ai ia i latou ona ua iai i uso le talitonuga faapea o le a faalilolilo aʻiaʻi le taulimaina o le mataupu. O le faailoa atu o mataupu e faalilolilo i le avā a se tasi e sese, e lē atamai, ma o se lē alofa foi lena ona o le a taatia atu ai i ona luga lenei avega mamafa na te lē manaomia.—Faataoto 10:19; 11:13.
20. Aiseā e matuā tāua ai mo toeaina ona faaalia le pulea totino?
20 E aunoa ma se fesili, o le pulea totino, e matuā tāua, ma ae maise lava mo toeaina! E ala i le faatuatuaina ia i latou o le faaeaga o le fai ma taʻimua i tagata o Ieova, ua sili ai foi ona tele lo latou tali fuaitau atu. Talu ai le tele o mea ua tuuina atu ia i latou, e tele foi mea o le a manaomia mai ia i latou. (Luka 12:48; 16:10; faatusatusa Iakopo 3:1.) O le faaeaga ma o le tiute o toeaina le faataatia o se faaaʻoaʻoga lelei mo isi. E lē gata i lena, ua iai toeaina i se tulaga e faia ai mea lelei e sili atu po o le faaleagaina e sili atu na i lo isi, ae masani lava ona faalagolago i le pe latou te faatinoina le pulea totino pe leai. E lētioa la ona faapea mai Paulo: ‘E tatau i se ovasia ona . . . pulea totino.’
O E Manatua?
◻ O ā mea manaomia faale-Tusi Paia mai toeaina e faailoa ai e tatau ona latou faaalia le pulea totino?
◻ Aiseā e manaomia ai e toeaina le pulea totino pe a feutagai ma uso talitonu?
◻ E ao faapefea ona faaalia le pulea totino i fono a toeaina?
◻ O le ā le luʻi ua aumaia e le manaoga mo toeaina ina ia tausisi i mea e faalilolilo?
[Ata i le itulau 20]
E matuā manaomia le faaalia o le pulea totino i fono a toeaina
[Ata i le itulau 23]
E tatau i toeaina Kerisiano ona faaalia le pulea totino ma tausisi i mea e faalilolilo