Faaeteete i Perofeta Pepelo!
NA Ō atu se ulugalii Pasili e momoe i le po, ae la faalogoina ni tagata gāoi ua osofai atu i lo la fale. Sa mafai ona sosola le ulugalii na matuā fefefe, e ala i le faamalama o le potu moe ma telefoni atu i leoleo. Ae mulimuli ane, sa matuā gatete le avā ona o le mea na tupu o lea sa lē mafai ai ona moe o ia i lo la fale ma alu atu ai i le fale o lona tinā.
So o se tasi lava sa osofaia ma talepeina lona fale pe gaoia foi ana mea i se isi auala, o le a tiga alofa faatasi ma lenei avā. O se mea faapena e tupu, e mafai ona avea o se mea e faatupu maʻi, ma e faanoanoa ona e anoanoai tagata o loo puapuagatia i lenei auala. Ae peitai, e iai se isi ituaiga gaoi e sili mamao atu lava ona matuiā ona iʻuga.
O le ā lenei ituaiga o gaoi e sili ona matuiā, ma o ai foi tagata gāoi? Na tuuina mai e Iesu Keriso ia i tatou nisi o faamatalaga e uiga i lenei mea ina o ia fetalai e uiga i o tatou aso, na ia fetalai: “E tutū mai foi perofeta pepelo e toatele, latou te faasese foi i tagata e toatele.” (Mataio 24:11) I le ā le auala ua avea ai perofeta pepelo ma gāoi? O ā mea o latou gaoia? O lo latou gaoi ua fesootai lea ma a latou valoaga. O lea, ina ia mafai ona malamalama atoatoa i lenei mataupu, e manaomia ona tatou muaʻi iloa po o le ā le valovaloga e tusa ai ma le Tusi Paia.
Le Uiga o le Vavalo
Pe a e mafaufau e uiga i le vavalo, atonu o le mea muamua lava e oo mai i lou mafaufau, o le valoia lea o le lumanai. O le mea moni, o lenei mea sa o se vala o le galuega a perofeta a le Atua anamua, ae e lē o sa latou galuega sili. Mo se faaaʻoaʻoga, i se faaaliga, na taʻu atu ai i le perofeta o Esekielu ina ia “vavalo atu ia i le mānava,” sa na ona ia faaooina atu o se poloaiga mai le Atua. (Esekielu 37:9, 10) Ina o faamasinoina Iesu i luma o ositaulaga, sa tuufeanu atu tagata ma po atu ia te ia, ma faapea atu ma le faatauemu ē na faasauā ia te ia: “Keriso e, ina [vavalo] mai ia te i matou, po o ai na na fasia oe?” Latou te leʻi fesili atu ia Iesu ina ia valoia le lumanai. Ae sa latou luʻiina o ia ina ia faailoa mai e ala i le mana o le Atua i latou o ē na fasia o ia.—Mataio 26:67, 68.
O le mea moni, o le manatu autū na faafesootai mai e upu o le uluai gagana o le Tusi Paia na faaliliuina i le upu “vavalo” po o le “valoaga,” o lona uiga moni lava, o le muai taʻuina mai o le finagalo o le Atua e uiga i se mataupu, pe e pei ona taʻua ai e le tusi o Galuega, o le tautala e uiga i “mea mamana a le Atua.” (Galuega 2:11, NW) O le uiga lenei ua gaoia ai le toatele o tagata e perofeta pepelo.
E ui i lea, o ai perofeta pepelo, ma o ā mea o latou gaoia? Ina ia taliina lenei fesili, seʻi tatou toe tepa i tua i le talafaasolopito o le nuu o Isaraelu i le taimi o Ieremia.