Fesili mai le Au Faitau

Pe ao ona tatou faia se faaiʻuga mai le Mataio 11:11 faapea sa muai silafia e Iesu o le a maliu Ioane le Papatiso a o leʻi maliu Iesu?

Ioe, e mautinoa sa silafia e Iesu faapea o le a lē ola pea Ioane e avea o se Kerisiano faauuina, auā na fetalai Iesu e faapea: “E moni, ou te fai atu ia te outou, e lei tu mai i e na fananau i fafine sē sili ia Ioane le papatiso; a o lē aupito itiiti i le malo o le lagi, e sili lea ia te ia.”—Mataio 11:11.

Ina ua folafola atu e le agelu o Kaperielu le fanau mai o Ioane o loo faatalitalia, sa ia valoia faapea o Ioane o le a, “muamua atu o ia i ona luma ma le loto o Elia ma lona faamalosi, . . . e sauni le nuu e faatatauina mo le Alii [o Ieova].” Sa tatau ona avea Ioane ma teuteu ala, e saunia tagata mo le Mesia a Ieova. Ae e leai lava se mea i lena faalauiloaga mai le Atua o faaalia ai faapea o le a avea Ioane lava ia ma soʻo o le Mesia o le a sau, e leai foi se fautuaga e tusa ai o lena aafiaga i le faamatalaga faavaloaga na faia e le tamā o Ioane o Sakaria.—Luka 1:17, 67-79.

I lea, ina ua uma ona ia papatisoina Iesu, sa faaauau pea ona talaʻi ma faia papatisoga e Ioane, i le pipii atu pea i lona tofiga o le saunia o se nuu. Sa iloa faavavega e Ioane faapea, o le a saunia e Iesu se papatisoga i le agaga paia, ae sa leʻi faapea mai Ioane o le a maua e ia lava le agaga, e avea ai o se Kerisiano faauuina. (Mataio 3:11) Sa iloa foi e Ioane faapea o le a oo ina faaitiitia ona soʻo, ae o le a faaauau ona faateleina soʻo o Iesu.—Ioane 3:22-30.

Ina o fetalai Iesu i le mea ua uma ona tatou faitauina i le Mataio 11:11, o le taimi lena a o iai Ioane i le falepuipui. Sa muai faailoa atu e Iesu faapea o lenei perofeta o loo faafalepuipuiina, sa itiiti na i lo o lē aupito itiiti o lē o le a avea ma tupu ositaulaga i le lagi i le lumanai. Peitai, e foliga mai sa silafia foi e Iesu faapea, e lē o toe umi se taimi ona maliu loa lea o Ioane, ma mavae atu ai le vaaiga faalelalolagi a o leʻi tatalaina le auala “fou” i le ola faalelagi. (Eperu 10:19, 20) O le uiga o lena mea faapea, o le a lē ola pea Ioane seia oo i le Penetekoso o le 33 T.A., i le taimi pe a amata ona faauuina soʻo o Iesu i le agaga. O lea, o le fetalaiga a Iesu i le Mataio 11:11 e mafai ona manatu i ai faapea o se faailoaga lea faapea sa ia silafia o le a lē alu Ioane i le lagi.