Sa Tausia e Ieova i Matou a o Iai i Faasāsāaga—Vaega 2

I LE vaitaimi o le Taua Lona Lua a le Lalolagi, sa tusi ai i le talauga o le fusipaʻu o loʻu ofu toniga faafitafita a Nazi le faaupuga “Ua Faatasi le Atua ma i Matou.” Sa ou iloa o se tasi lenei faaaʻoaʻoga o le aafia o lotu i taua ma le faamasaatoto. Na ou inoino i ai. E oo atu la i le taimi na matou talanoa ai ma ni Molimau a Ieova se toʻalua i LimbachOberfrohna, i Siamani i Sasae, ae ua ou matuā fiu lava i lotu ma oo ai ina avea aʻu o se tagata e lē talitonu i le Atua ma o sē talitonu i le evolusione.

Sa ou taʻu atu i Molimau na asiasi mai: “Aua neʻi lua manatu o le a avea aʻu ma Kerisiano.” Peitai o ā la finauga sa faamautinoa ai ia te aʻu e iai se Atua. I loʻu fia suesuevale, na ou faatauina ai se Tusi Paia ma i se taimi na amata ai loa ona ou suesueina faatasi ma i laua. O le tausaga lea e 1953 i lona tau e totogo ai mea, o le taimi lena ua toeitiiti tolu tausaga talu ona faasāina e faiga Faa-Komunisi galuega a Molimau i Siamani i Sasae.

Na faapea mai le faamatalaina e Le Olomatamata faa-Peretania o Aokuso 15, 1953, o le tulaga o Molimau a Ieova i lena taimi: “E ui lava i le faaauau ona mataʻiina faananā ma faamataʻuina, e ui lava i le lē mafai ona latou feasiasiai e aunoa ma le muai faamautinoa e lē o tulimataʻia i latou, e ui lava a maua i se tasi se lomiga o le Olomatamata, o lona uiga o le lua po o le tolu tausaga i le falepuipui mo le ‘tufatufaina o lomiga taufaasese’, ma e ui lava i le faitau selau o uso e sili ona taʻumatuaina, o ē sa fai ma taʻitaʻi ua faafalepuipuiina, peitai, o loo tumau pea ona talaʻi auauna a Ieova i Siamani i Sasae.”

I le 1955, na ma auai atu ai ma laʻu avā o Regina i se tauaofiaga faavaomalo a Molimau a Ieova i Nuremberg, i Siamani i Sisifo, ma i le tausaga na sosoo ai na ma papatiso faatasi ai i Perelini i Sisifo. O le mea moni, a o leʻi oo lena ina fausia aʻe le Pa i Perelini i le 1961, lea na vavaeese ai loa Siamani i Sasae mai ia Perelini i Sisifo. Peitai e ui lava a o leʻi oo ina ou papatiso, ae sa tofotofoina lava loʻu faamaoni ia Ieova le Atua.

Talia o Avega Tauave

Sa manaomia e le faapotopotoga a Molimau a Ieova i Limbach-Oberfrohna, lea na amata ona ma auai atu i ai, se tasi e mafai ona ia aumaia lomiga faale-Tusi Paia mai Perelini i Sisifo. Sa iai si a ma tamai pisinisi ma la ma fanau laiti e toʻalua, peitai na muai taulaʻi atu o matou olaga e auauna ia Ieova. Sa ma toe faafouina la matou taavale tuai, lea na mafai ona nanā ai tusi e 60. Sa lamatia tele le galuega o le avea ma avefeau, ae na ou aʻoaʻoina ai le faalagolago atu ia Ieova.

Sa lē faigofie le sopo atu i se taavale mai Perelini i Sasae i le itu i Sisifo, ma sa masani ai lava ona ou tau mānatu po o le a faapefea ona matou mafaia. Matou te oo loa i le itu saoloto, ona aoao loa lea o lomiga ma nanā tusi i le taavale a o leʻi toe sopo atu i le tuaoi ma toe ō atu i Siamani i Sasae.

I se tasi aso, a o faatoʻā uma lava ona nanā a matou tusi ae savali ane loa i fafo o se fale mautotogi, se tagata matou te lē masani ai. Na valaau mai: “O outou na.” Na fetoʻi le tātā o loʻu fatu. Pe sa ia matauina mai i matou? “E lelei pe a tou ō i se isi mea i le taimi e sosoo ai. O le tulimanu lena e faamautū i ai le taavale uaealesi a leoleo a Siamani i Sasae, ma latou te ono puʻeina ai outou.” Sa ou mapuea ua ou toʻa. Na sologa lelei le sopoiaina o le tuaoi, ma sa matou pepese atu ai lava i le auala, le toʻafa o i matou na iai i le taavale a o matou toe agaʻi atu i le fale.

Sauniuniga mo le Vā Eseese

I tausaga mai le 1950-1959, sa faalagolago atu ai uso i Siamani i Sasae ia i latou i Sisifo mo ni lomiga ma taʻitaʻiga. Peitai o fetuutuunaiga i le 1960 sa fesoasoani ai i Molimau taitoatasi i Siamani i Sasae ina ia fesootai vavalalata ai pea ma o latou uso Molimau i le vaipanoa sa latou nonofo ai. Ona oo lea ia Iuni i le 1961, na faia ai i Perelini le uluai vasega o le Aʻoga o le Faiva o le Malo mo toeaina. Sa ou auai i lenei uluai aʻoga e fa vaiaso le umi. Toetoe lava lē atoa le ono vaiaso mulimuli ane, ae faafuaseʻi loa ona motusia mai i matou mai le itu i Sisifo ina ua fausia aʻe le Pa i Perelini. Ona lē gata ai lea ina faia faalilolilo la matou galuega, ae ua vā eseese foi.

Sa matataʻu nisi faapea atonu o le a faasolo ina mou atu le galuega a Molimau a Ieova i Siamani i Sasae. Peitai ane, o fetuutuunaiga faalefaalapotopotoga na muai faasilasila mai po o le leʻi atoa o le tausaga na muamua atu, sa fesoasoani lea ia i matou e tausisia ai le autasi ma le malosi faaleagaga. E faaopoopo atu i ai, o le toleniga na maua e toeaina o ē na auai atu i le uluai vasega a le Aʻoga o le Faiva o le Malo, na faaauupegaina ai i latou e faasalafa atu lenei toleniga i isi toeaina. O lea la, sa saunia i matou e Ieova mo lo matou vā eseese, e pei foi ona ia saunia ai i matou mo le faasāsāaga i le 1950 e ala i tauaofiaga itumalo i le 1949.

I le motusia mai le itu i Sisifo, na manino ai le tatau ona matou tausolomua i le faagaoioia pea o le faalapotopotoga. Na matou tusi atu i o matou uso Kerisiano i Perelini i Sisifo, ma faatū atu i ai se manatu mo se feiloaiga ma i latou i le alatele i Sasae lea sa faigofie mo tagata faimalaga mai le itu i Sisifo. Na matou faatagā faafoliga ua leaga la matou taavale i le nofoaga tonu lea na fuafua e feiloai i ai. I ni nai minute ae taunuu ane loa le taavale a uso, ma aumai ai a matou lomiga faale-Tusi Paia. O le itu e fiafia ai, ona sa latou aumaia ai ma laʻu tusi aʻoga o le Aʻoga o le Faiva o le Malo, o aʻu faamaumauga na fai, ma laʻu Tusi Paia na tuu ai i Perelini ona o le fia malupuipuia. Maeu se faagaeetia ina ua toe maua mai! Sa itiiti soʻu iloa o le a tele soʻu manaomia o nei mea i isi tausaga na sosoo ane ai.

Se Aʻoga na Faia Faalilolilo

I ni nai aso mulimuli ane, sa faatonuina ai i matou ina ia faatulaga ni vasega o le Aʻoga o le Faiva o le Malo i vaega uma o Siamani i Sasae. E toʻafa faiaʻoga na tofia, e aofia ai ma aʻu. Ae sa foliga o se galuega faigata mo aʻu le aʻoaʻoina o toeaina uma a o loo faasāina la matou galuega. Ina ia suia la le foliga moni o le mea sa matou faia, na ou filifili ai e faatulaga vasega e pei o loo tolauapi i ni faiga malōlōga.

E taitoafa tagata aʻoga i vasega taitasi, toalima ia te aʻu o le faiaʻoga, ma le uso e toaono i ai e fai ma kuka. Sa auai foi avā ma fanau. E masani lava la ona iai le toʻa 15 i le toʻa 20 tagata i le vaega. Sa faigata ona maua se laufanua e fetaui e tolauapi ai, o lea na matou toe ō ai ma loʻu aiga e saili nisi nofoaga talafeagai.

I se tasi aso, a o alu atu la matou taavale i se nuu, na matou matauina ai se auala e agaʻi atu i se fanua o loo totō ai le tele o laau ma e matuā mamao ese mai le auala savali. Sa foliga mai e talafeagai, ona ou alu atu loa lea i le pulenuu. Sa ou faamatala atu i ai: “O loo matou sailia se nofoaga matou te tolauapi ai mo le lua vaiaso faatasi ma nai nisi aiga. Matou te mananao e nonofo na o i matou ina ia mafai ai e tamaiti ona taaalo ma taufetuli solo. Pe mafai ona matou faaaogāina le vaega o le itu lelā e tele mai ai laau?” Na malie o ia, ona matou faia loa lea o faatulagaga.

Sa matou tō faleie i le laufanua ma faatū ai ma laʻu taavale toso ina ia faia ai se faatafāfā i le ogatotonu e lē iloa mai i fafo. Sa fai le taavale toso ma potu aʻoga. Matou te feiloai ai i inā mo le 8 itula o suesuega maeʻaeʻa i aso taitasi mo le 14 aso. I le isi vaega lalata ane sa iai nofoa ma se laulau, na faatutū ai ina neʻi iai ni tagata asiasi faafuaseʻi ane. Ma sa iai! O na taimi sa matou matuā sapaitalia ai le lagolagosua alofa a o matou aiga.

A o faia a matou aʻoga, sa tutū solo pei ni leoleo o matou aiga. I se tasi la aso, na vaaia ai le pulenuu, o lē sa avea foi ma failautusi o le Itu Faa-Komunisi, ua agaʻi mai i le ala i lo matou laufanua. Na oomi e lē na fai ma leoleo le ki sa sosoo atu i se uaea i le faailoilo i le taavale toso. Na vave ona matou feosofi i fafo ma nonofo solo i nofoa o loo faataamilo i le laulau ia na muai faatulaga ma amata loa ona fai le pelē. Sa iai foi se fagu schnapps ina ia matuā moni atu ai lava le vaaiga lea. Sa faaleuō le asiasiga mai a le pulenuu ia i matou ma toe taliu ai i lona aiga e aunoa ma sina masalosalo i le mea moni lea na tupu.

Sa faafoeina vasega o le Aʻoga o le Faiva o le Malo i le atunuu atoa mai le tau e totogo ai mea o le 1962 seia oo i le faaiʻuiʻuga o le 1965. Na faia ai i inā se toleniga maeʻaeʻa, lea na aofia ai ma faamatalaga i le auala e feagai ai ma o matou tulaga eseese i Siamani i Sasae, na saunia ai foi toeaina mo le vaavaaia o le galuega talaʻi. Ina ia auai la i nei vasega, sa lē gata ina faataulaga ai e toeaina a latou faiga malōlōga, ae o le lamatiaga foi i le faafalepuipuiina.

Aogā o le Aʻoga

Sa mataʻitūina e taʻitaʻi o malo a matou galuega, ma i le faaiʻuiʻuga o le 1965, ina ua maeʻa ona auai uma i le aʻoga le toatele o toeaina, ae taumafai loa nei taʻitaʻi e taia mai la matou faalapotopotoga i se ta mataʻutia sa ono faamutaina ai. Na latou puʻeina faapagota le toʻa 15 o Molimau o ē na manatu i ai sa taʻitaʻia le galuega. O se gaoioiga na matuā saunia lelei, auā na matuā aofia ai le atunuu atoa. Ona toe manatu foi lea o le toatele o le a mou atu le faagaoioia o Molimau. Peitai ane, e ala i le fesoasoani a Ieova na matou taumafai ai e faafetaui atu i le tulaga ua iai ma faaauau pea la matou galuega e pei ona sa iai muamua.

O le itu patino na faafaigofie ai lenei mea o le toleniga lea na maua e toeaina mai le Aʻoga o le Faiva o le Malo, atoa ma fusi o le maufaatuatuaina sa matuā faamautūina a o latou olioli i a latou faatasitasiga i taimi o nei aʻoga. Na faaalia ai i lea le lototele o le faalapotopotoga. Maeu le tāua o lo matou mulimulituʻi ma le usiusitai i faatonuga a le faalapotopotoga!—Isaia 48:17.

Na manino mai i masina mulimuli ane faapea, o le faasāsāaga tele lea na faia e taʻitaʻi faalemalo sa itiiti lava sona aafiaga i la matou galuega. Sa na o sina taimi puupuu lava na mavae atu ai, ae toe amata vasega o le Aʻoga o le Faiva o le Malo. Ina ua toe matauina e nei taʻitaʻi lo matou toe olaola, sa faafuaseʻi ai lava ona toe suia a latou faufauga. Maeu se manumalo mo Ieova!

Maelega i le Faiva

O le taimi lena sa iai le tusa ma le taitoalima tagata i vaega o Suesuega Tau Tusi a le Faapotopotoga. O suesuega tau tusi na sa matou mauaina mai ai a matou lomiga faale-Tusi Paia, ma o i inā foi sa faatonutonu mai ai le galuega talaʻi. Sa faamanuiaina e Ieova i maʻua ma Regina mai lava i le amataga, i le aumaia o le toatele o tagata o ē na mananao e suesueina le Tusi Paia.

Sa tau iai ni suiga o le auaunaga mai le fale i le fale ina ia puipuia ai i matou i le masalomia ma le puʻeina faapagota. Matou te asiasi atu i se fale e tasi, ona misi lea o nisi fale ae faatoʻā toe afe i se isi fale. I se tasi o fale na faaulufale ai i maʻua ma Regina e se tinā. A o matou talanoaina le mataupu faale-Tusi Paia, ae savali mai loa i totonu o le potu lona alo tama. Sa tuusaʻo mai lava faaupuga a le tama.

Na ia fesili mai: “Po ua outou vāai ea i lo outou Atua? Ou te fia faailoa atu ia te oulua, o aʻu na o mea lava ou te vaai i ai ou te talitonu i ai. O isi mea uma, o lapisi.”

Sa ou tali atu: “E lē mafai ona ou talitonu i lena manatu. Seʻi tulou lava, Po ua e vaai ea i lou faiʻai? Peitai o mea uma o loo e faia e faamaonia atu ai o loo iai lou faiʻai.”

Na ma faaali atu i ai ma Regina ni faaaʻoaʻoga o nisi o mea e mafai ona talitonuina e aunoa ma le vaai i ai, e pei o le eletise. Na logo faatutuila le tama, ma amata ai loa se suesuega faale-Tusi Paia a i laua uma ma lona tinā. Na oo ina avea uma i laua ma Molimau. O le mea moni, e toʻa 14 tagata sa ma faia ma laʻu avā a latou suesuega na oo ina avea ma Molimau. O le ʻafa o lena fuainumera o i latou na matou fesootai a o faia a matou asiasiga mai lea fale i lea fale, a o le isi ʻafa o ē na ma muai fetaui i ai i ni molimau lē fuafuaina.

O le taimi lava e faia ai e lē aunoa se suesuega faale-Tusi Paia, ma ua matou mātauina o lea tagata ua maufaatuatuaina, ona matou valaaulia loa lea o ia i a matou sauniga. Peitai ane, o le muai faamautinoaga, pe lē ono avea le tagata aʻoga ma itu e lamatia ai le malupuipuia o tagata o le Atua. O le ala lena i nisi taimi pe ā ma le tausaga po o le sili atu, faatoʻā matou valaaulia se tagata aʻoga o le Tusi Paia i se sauniga, ma o nisi taimi e sili atu ai ona uumi taimi faatoʻā faia faapea. Ou te manatua se tasi tamaloa o lē sa iai i se tulaga lauiloa; sa uo lelei ma tagata taʻutaʻua i tulaga maualuluga o le Itu Faa-Komunisi. E iva tausaga o fai lana suesuega faale-Tusi Paia faatoʻā faataga e auai i sauniga! Ua avea nei lenei tamaloa ma o matou uso faa-Kerisiano.

Tulimataʻi Pea i Matou e Taʻitaʻi o Malo

Ina ua mavae le 1965 sa leʻi toe iai ni puʻeina faapagota na matou toe fetaiai, ae sa leʻi tuua ai i matou i se filemu. Sa lamalama pea i matou e taʻitaʻi o malo. O le taimi lena ua oo ina tele loʻu aafiaga i le faagaoioiga o la matou faalapotopotoga, o lea na matuā mataʻitūina ai aʻu e leoleo. E lē mafaitaulia taimi na latou ave ai aʻu ina ia fesiligia, ma matou ō atu ai i le ofisa o leoleo ma tuʻifesili ai aʻu. Latou te fai mai: “Ia faatofā atu loa i lou saolotoga. O lea o le a e alu i le falepuipui.” Ae mulimuli ane lava latou te toe faasaoloto mai aʻu.

I le 1972 na asiasi mai ai ia te aʻu ni alii o le malo ma na teʻi lava ua la aumaia se faamālō lelei i la matou faalapotopotoga. Sa la faalogologo i la matou Suesuega o Le Olomatamata a le faapotopotoga. Sa la faitio mai: “E ese le matuiā o le mataupu.” Na manino mai lo la popole i ni faalogona atonu o le a iai i nisi e faatatau i faiga faapolotiki a Komunisi pe a latou faitau i le mataupu lea e talanoaina ai. Ona la fai mai lea: “Ae ui i lea, o loo salalau solo Le Olomatamata i lomiga e lima po le ono miliona, ma o loo faitauina foi i atunuu tau atinaʻe. Ua lē na o sina mekasini faatauvaa.” Sa ou mafaufau ifo ia te aʻu lava ia: ‘Maeu le saʻo o la oulua faamatalaga!’

E oo mai i le 1972 ua tusa ma le 22 tausaga o matou iai pea i faasāsāaga, ma sa taʻitaʻia pea ma le alofa ma le atamai i matou e Ieova. Sa matou mulimulituʻi i ana faatonuga, peitai e toe 18 ni tausaga ona faatoʻā maua lea e Molimau i Siamani i Sasae se tulaga aloaia faaletulafono. Maeu lo matou loto faafetai mo saolotoga matagofie ua matou olioli ai nei ina ia tapuai atu i lo tatou Atua, o Ieova!—E pei ona faamatalaina e Helmut Martin.