Sa Tausia e Ieova i Matou a o Iai i Faasāsāaga—Vaega 3

O LE aso, 14 o Mati 1990. I lena aso lē ma faagaloina, sa ou i ai faatasi ma i latou na auai ina ua tuuina mai e se tagata maualuga o le Ofisa mo Mataupu Faalelotu i Perelini i Sasae, le maliega e faamaonia ai le faaeeina atu o se tulaga aloaia faaletulafono i Molimau a Ieova, i le mea na taʻua i lena taimi o Siamani Faatemokalasi po o Siamani i Sasae. A o faagasolo taualumaga o lena aso, sa ou toe mafaufau ai lava i tua i le taimi na avea ai aʻu ma Molimau ma toe mafaufau loloto i taimi faigata na matou tofo i ai.

I le taulotoaiga o tausaga o le 1950, i le uluaʻi taimi na talanoa mai ai ia te aʻu se Molimau na ma galulue faatasi o Makerita, e uiga i lona talitonuga faavae i le Tusi Paia, o le taimi lena sa matuā ogoogo ai sauaga na oo i Molimau a Ieova i Siamani i Sasae. E leʻi pine mulimuli ane, ae alu atu o ia e faigaluega i se isi mea, ma sa amata ai loa ona ou suesueina le Tusi Paia ma se isi Molimau. Na papatisoina aʻu i le 1956, ma sa ma faaipoipo ai loa ma Makerita i le tausaga lava lena. Sa ma aufaatasi atu i le Faapotopotoga i Lichtenberg i Perelini. Sa iai pe tusa ma le toaonosefulu le au talaʻi o le Malo na faia se sao i le galuega talaʻi.

I le lua tausaga talu ona mavae loʻu papatisoga, na o mai ai ni alii ofisa o le malo i le fale o lē sa taʻitaʻi i la matou faapotopotoga. Sa latou fuafua e puʻe o ia ma ave faapagota, ae o le taimi lena sa faigaluega ai o ia i Perelini i Sisifo. Sa mafai e lona aiga ona faafesootai atu o ia ina ia nofo ai pea i ina, ma i ni nai masina mulimuli ane, sa aufaatasi atu ai ia te ia lona aiga ma latou nonofo ai i Sisifo. E ui lava ina sa na o le 24 tausaga loʻu matua, ae o le taimi lena na tuuina mai ai ia te aʻu ni tiute tauave mamafa i le faapotopotoga. Ou te faafetai ona sa tuuina mai e Ieova le atamai ma le malosi na manaomia e tausia ai na tiute.—2 Korinito 4:7.

Saunia Meaʻai Faaleagaga

Ina ua faatuina le pa i Perelini ia Aokuso 1961, sa faafuaseʻi ai lava ona faaesea Molimau a Ieova i Sasae mai o latou uso i Sisifo. O lea, na amata ai loa se vaitaimi o le faia o kopi o a matou lomiga, muamua i le laau lomitusi, ona sosoo ai lea ma se faasologa o masini e fai ai kopi. E amata mai i le 1963, sa ou faaaluina ai le lua tausaga i le fausiaina o se nofoaga lilo i lo matou fale ina ia lolomia ai nei tusi. A uma ona galue i le aso atoa e avea o sē faia mea faigaluega, ona ou faaaluina lea o le po e saunia ai kopi o Le Olomatamata faatasi ma le fesoasoani a isi uso e toalua. Sa matuā taumafai lava pule faalemalo e fia iloa la matou faalapotopotoga lomitusi, ae sa fesoasoani Ieova ia i matou ina ia maua mai pea a matou meaʻai e pei ona matou taʻua ai i le taimi tatau.

O le saunia o ni kopi ia lava o a matou mekasini, sa manaomia ai le tele anoanoai o ni pepa, ma o le mauaina o nei aofaiga tetele sa lē faigofie. Ana faapea sa matou faatauina pea ni taʻaiga pepa atoatoa, semanū o le a uaʻi mai ai manatu o pule faalemalo. O lea la, sa tofu ai lava Molimau taitasi ma nai ana pepa e faatau ma aumai i la matou suesuega faale-Tusi Paia a vaega. Ona avatu ai lea mai i ina i le mea e lomia ai mekasini. Ia ona tufatufa lea e isi Molimau mekasini ua maeʻa saunia.

Talu ai ona sa masalomia aʻu e ofisa o le malo faapea o lea e faia soʻu sao i le lomia o tusi, sa latou matuā tulimataʻia ai lava aʻu. I le tau faaiʻuiʻuga o le 1965, na ou matauina ai lo latou tulituliloaina atili o aʻu i se tulaga sa leʻi masani ai ma na ou lagona ai sa iai se mea na latou fuafuaina. Na faafuaseʻi lava ona latou osofai mai i se tasi taeao po.

Toeitiiti Lava Maua

I lena taeao malūlū sa ou alu atu ai i laʻu galuega. A o leʻi tafa mai ata, sa ou saunia lelei oʻu ofu mafanafana ona o le maʻatiʻati o le malūlū. A o ou savali atu, sa ou iloa atu ai le onoono aʻe o ulu o ni tagata se toafa i tua atu o laau. Sa liliu mai tamaloloa i le pioga ma agaʻi mai i le auala lea ou te alu atu ai. Ua ou teʻi lava ina ua ou iloa lelei atu i latou o ni alii ofisa o le malo. O le ā nei laʻu mea o le a fai?

Sa sua ese le mafiafia o le kiona ma avanoa ai sina auala vaiti. Na ou savali pea. Sa ou savali punou lava e aunoa ma sou ēa i luga. Na fai lemu saʻu tatalo faavavevave. Ua matuā latalata mai lava tamaloloa. Pe na latou iloa mai aʻu? A o matou fepasiaʻi i se auala vaapiapi, sa faigata ona ou talitonu i le mea na tupu. Sa ou savali faanatinati pea. Na alaga mai se tasi o i latou, “Ei, o ia le la. Faatali mai!”

Sa ou momoʻe loa lava i le saosaoa na ou mafaia. Na ou faanatinati atu i le pioga, oʻu oso atu ai i luga o le pa a loʻu tuaoi ma ui atu ai i tua o la matou lotoa. Sa ou nanati atu i le fale, tapuni ma loka mau le faitotoa. Ona ou alaga atu lea, “Nonofo uma i luga! O lea ua o mai e ave aʻu.”

Sa pei o le emo o le uila le oo mai o Makerita i lalo ma tu i le faitotoa. O le taimi lena, na o loʻu oso atu ai loa i totonu o le potu i lalo ma faaola le ogaumu. Sa na ona ou tago atu lava taseʻi mai pepa uma o faamaumauga a le faapotopotoga sa ia te aʻu ma fetogi i le afi.

Sa pei o le a le feʻei mai o tamaloloa, “Tatala mai! Tatala mai le faitotoa! O faaoosala nei mo tagata lautele.”

Sa tu pea Makerita a o ou susunuina mea uma ina ia aua neʻi toe iloa. Na ou fesootai atu ia Makerita ma lue atu i ai lou ulu ina ia tatala le faitotoa. Sa feosofi mai tamaloloa i totonu.

Na latou fesili mai, “Aiseā na e sola ai?”

Sa leʻi pine ae taunuu mai le isi vaegaau, ma na sueina loa le fale atoa. O le mea sa sili ona ou popole i ai o le nofoaga lea na nana ai le masini lomitusi ma le faaputuga pepa lautetele e tusa ma le 40,000. Ae latou te leʻi iloa le mea na natia ai nei mea. E ui lava ina tele itula na faia ai le sailiga, ae sa fesoasoani mai Ieova ia te aʻu ina ia ou toafilemu pea. O lena mea na tupu na tosina atu ai i matou ia vavalalata i lo tatou Tamā faalelagi alofa ma sa faamalosia ai i matou ina ia onosai pea.

Falepuipuiina ae Saoloto

I le faaiʻuga o tausaga o le 1960, sa faailoa mai ai ia te aʻu ina ia ou lipoti atu mo se tiute faavaegaau. Talu ai e lē mafai ona ou auauna ona o loʻu talitonuga, sa ave faamalosia ai loa aʻu ma taofia i le falepuipui mo le fitu masina i se nofoaga o galuega mamafa. E toʻa 15 Molimau sa iai i le falepuipui i Cottbus, i le itu i saute sasae o Perelini. O i matou uma, na ala ona matou i ai i inā, ona o le solitu faa-Kerisiano. (Isaia 2:2-4; Ioane 17:16) Sa uumi aso o a matou galuega ma sa mamafa foi galuega. Matou te feala i le 4:15 i le taeao, ma ave ai i matou i fafo o le nofoaga ina ia galulue i le faia o auala o nofoa afi. E ui ina faafalepuipuiina, ae peitai, sa maua o matou avanoa e taʻu atu ai i isi e uiga i le Malo o Ieova.

Mo se faaaʻoaʻoga, e toalua ni tagata sa faia valovaloga na matou i ai faatasi i Cottbus. I se tasi aso, na ou faalogo ai sa matuā manao lava se tagata talavou e fia talanoa mai ia te aʻu. Faamata o le a se mea o ia manao ai? Sa ia faamatala mai ia te aʻu mea uma sa i lona loto. Na faia e lona augātinā, ni valovaloga, ma sa ia maua foi se mana faapena ina ua uma ona ia faitau i tusi a lona augātinā. E ui lava sa matuā manao lenei tamaloa ina ia saoloto mai mana o loo pulea ai o ia, ae sa fefe lava o ia i ni osofaiga mai agaga. O lea, sa ia tagi ai, ma tagi ai lava. Ae o le ā laʻu mea o le a fai i ai?

A o faagasolo la ma talanoaga, sa ia faamatala mai faapea, o lona tomai e valoia ai le lumanai sa faaleaogāina ina ua auaufaatasi ma Molimau a Ieova. Sa ou faamatala atu i ai faapea, e i ai agaga leaga po o temoni, ma agaga lelei, po o agelu faamaoni. I le faaaogāina o le faaaʻoaʻoga e uiga ia i latou o ē na avea ma Kerisiano i Efeso anamua, sa ou faamamafa atu i ai le manaomia ona lafoaʻi o mea uma sa fesootai atu ma valovaloga po o so o se isi lava faiga faataulaitu. (Galuega 19:17-20) “O lea la, ia faafesootaʻi Molimau,” sa ou taʻu atu ai ia te ia. “So o se mea lava e te maua ai Molimau.”

I ni nai aso mulimuli ane, na tuua ai e le tamaloa talavou le nofoaga o faasalaga, ma ou te leʻi toe faalogo lava e uiga ia te ia. Ae o le mea na ou tofo i ai e uiga i lena tamaloa fefevale ma le lē faamafanafanaina o lē na moomoo mo le saolotoga, na faalolotoina ai loʻu alofa mo Ieova. E ui ina sa saisaitia le toʻa 15 o i matou o Molimau i le falepuipuia ona o lo matou faatuatua, ae sa matou saoloto i se auala faaleagaga. Sa faasaolotoina lena tamaloa talavou mai le falepuipui, ae sa fai pea ma pologa i se “atua” o lē sa ia fefe i ai. (2 Korinito 4:4) O le mea lea, e ao ai ia i tatou o Molimau ona faapelepele i lo tatou saolotoga faaleagaga!

Tofotofoina a Matou Fanau

E lē gata ina sa tutū mausalī tagata matutua mo lo latou talitonuga faavae i le Tusi Paia, ae sa faapena foi tagata talavou. Sa tuuina atu ia te i latou omiga ina ia faagutugutulua ai i le aʻoga atoa ma le galuega. Sa tatau i la ma fanau uma lava e toafa ona tutū mo lo latou talitonuga.

O se sauniga e faʻalo ai i le fuʻa sa masani ona faia i taeao o Aso Gafua. Sa laina tamaiti i le lotoā a le aʻoga, ma usu se pese ma faia le faʻalo ua taʻua o le faʻalo a Thälmann a o sisi aʻe le fuʻa. O Ernst Thälmann o se fasioti tagata a Siamani Komunisi na fasiotia e fitafita (SS) a Nazi i le 1944. Ina ua mavae le taua lona lua a le lalolagi, sa avea ai Thälmann ma toa i Siamani Sasae. Ona o lo matou talitonuga faavae i le Tusi Paia, sa tatau ai ona tuuina atu lena auaunaga paia e tau lava Ieova le Atua, o lea na ma faatonuina ai ma laʻu avā la ma fanau e toafa ina ia tutū faaaloalo pea i le taimi o le sauniga ae aua neʻi faia ai so latou sao.

Sa aʻoaʻoina foi tamaiti aʻoga i pese faaKomunisi. Na ma ō atu ma Makerita i le aʻoga a la ma fanau ma faamatala atu i ai le pogai latou te lē pepese ai i na pese faapolotiki. Sa ma fai atu faapea, o loo latou te fiafia lava e aʻoaʻoina nisi pese ese. O lea, na aʻoaʻoina ai e la ma fanau i le amataga lava ona tutu mausalī ma faaesea i latou mai a latou tupulaga.

I le agaʻi atu i le faaiʻuga o tausaga o le 1970, na manao ai la ma tama teine ulumatua e aʻoaʻoina se mataupu faapitoa i se tasi o ofisa. Ae peitai, sa manaomia ona uia e tagata aʻoga taitasi se uluaʻi toleniga faavaegaau mo le 14 aso. Talu ai ona sa leʻi faatagaina e le loto fuatiaifo o Renate o ia e auai i lenei mea, sa ia tumausalī ai ma na iʻu ina faasaoloto mai ai o ia mai lea tiute tauave o le mauaina o se toleniga faapena.

I le taimi o lana aʻoaʻoga, na alu ai Renate i se vasega na valaaulia ai o ia e auai i le aʻoaʻoina o le fanafana. Na faapea atu le faiaʻoga, “Renate, e tatau foi ona e sau i le aʻoga fanafana.” Sa ese le manatu o le faiaʻoga i le tetee a Renate. Na ia folafola atu, “E te lē fanaina se fana. E na o lou vaaia lava o le vai inu ma taumafa māmā.”

I le avea o se aiga, na matou talanoaina ai le mataupu i lena afiafi. Sa matou lagona faapea o le auai o Renate i le aʻoga fanafana e sese, e tusa lava pe lē auai tuusaʻo o ia. I le faamalosia e ala i le talanoaga na faia ma i matou faatasi ma le tatalo, sa ia lē faatagaina ai o ia lava ina ia faamataʻuina. Maeu se faamalosiau mo i matou i le vaai atu i la ma tama teine talavou o faia se tulaga mo mataupu silisili amiotonu!

Faateleina la Matou Galuega Talaʻi i le Lautele

Ina ua faaitiitia teteega i la matou galuega i le faaiʻuiʻuga o tausaga o le 1970, na amata ai loa ona aumaia le anoanoai o a matou lomiga mai Sisifo. E ui o lenei galuega o se galuega lamatia, ae na tauofo ni uso totoa e faia lenei galuega. Maeu lo matou matuā talisapaia o nei lomiga ua maua mai pea, atoa ma taumafaiga a i latou na mafai ai ona maua. Ina ua ogoogo sauaga i le amataga lava o tausaga o le sā, sa avea ai le galuega talaʻi i lea fale ma lea fale o se mea faigata. O le mea moni, o le fefe i faasalaga na faapogai ai ona ō ese nisi. Ae a o faagasolo le taimi, na faateleina ai i se auala mataʻiina la matou galuega talaʻi i le lautele. I tausaga o le 1960, sa tusa na o le 25 pasene o le au talaʻi o le Malo na auai e lē aunoa i le auaunaga mai lea fale i lea fale. Ae peitai, na oso aʻe i le 66 pasene le fuainumera o i latou na auai e lē aunoa i lena vala o le faiva i le faaiʻuiʻuga o tausaga o le 1980! E oo atu i lena taimi, ua tau le āno mai pule faalemalo i la matou galuega talaʻi i le lautele.

I se tasi taimi, na ave ai e le uso lea sa ma galulue lona afafine laiititi i le faiva. I le faamafanafanaina ona o le auai o le teineitiiti, na valaaulia ai i matou i totonu o le fale e se tamaitaʻi matua o lē sa matou talanoa atu i ai. Sa ia talisapaia la matou taulimaga faale-Tusi Paia ma loto malie ina ia matou toe asiasi atu. Na mulimuli ane ou tuuina atu le toe asiga i laʻu avā, o lē na vave lava ona amataina se suesuega faale-Tusi Paia i le aiga ma le fafine. E ui ina faasolo ina matua i tausaga ma sa fāi atu lona malosi, ae ua avea nei lea tamaitai ma o matou tuafafine ma o loo faaauau pea ma le tiotio i le auaunaga ia Ieova.

Suiga a o Lalata mai le Saolotoga

Sa sauniunia i matou e Ieova mo le taimi o le a matou olioli ai i le saolotoga e sili atu. O se faataʻitaʻiga: E leʻi pine lava talu ona aveesea le sā, ae fautuaina loa i matou ina ia suia le auala matou te valaauina ai igoa o le tasi ma le isi i sauniga. Ina ia puipuia, o le pogai lena na matou valaauina ai uso ma tuafāfine taitoatasi i o latou igoa muamua. O le toatele lava sa latou iloaina isi uso ma tuafāfine mo le tele o tausaga, latou te leʻi iloaina le faaiʻu o se uso talitonu. Peitai, i sauniuniga mo le taliaina fiafia o le toatele o tagata naunau ia matou sauniga, sa faalaeiauina ai i matou ina ia valaau i latou i o latou faaiʻu. Mo nisi, sa foliga mai e lē mafana ma faaaloalo lenei mea, ae o i latou na mulimuli i le fautuaga, sa sili atu ona faigofie mulimuli ane ina ua maua lo matou saolotoga.

Sa faalaeiauina foi i matou ina ia amata a matou sauniga i se pese. I lenei auala, na matou tutupu aʻe ai ua masani i taualumaga na mulimuli ai faapotopotoga i isi nofoaga. O le isi fesuiaiga, o le toatele o a matou suesuega a vaega. Sa auaumalie ona faateleina i latou mai tagata e toafa e oo atu i le toavalu a o faagasolo tausaga o le 1950. Mulimuli ane, na faateleina ai i latou i le toasefulu ma i le faaiʻuga ua toasefululua. Sa faaopoopo atu i ai le faia o se suesuega ina ia faamautinoa ai faapea, o le nofoaga e faia ai sauniga a faapotopotoga taitasi, sa tu lelei i se nofoaga ogatotonu mo le toatele o Molimau.

I nisi taimi sa mafai ai ona matou iloa le atamai o se fesuiaiga na fautuaina mai, pe a oo i le taimi e uma ai ona faatinoina. Maeu le faaalia pea e Ieova o ia lava i le avea o se Tamā atamai ma magafagafa! Sa auaumalie lava ona ia aumaia i matou ina ia ōgatasi ma lana faalapotopotoga atoa faalelalolagi, ma sa matou lagona atili ai pea lava pea le avea o i matou ma vaega o le auuso o ona tagata i le lalolagi aoao. E mautinoa lava, sa puipuia ma le alofa e Ieova ona tagata i le toetoe lava 40 tausaga na latou galulue ai i lalo o faasāsāaga i Siamani i Sasae. Maeu lo matou olioli i le taimi nei ona ua maua so matou tulaga faatulafonoina!

I aso nei, ua i ai le 22,000 po o le sili atu foi Molimau a Ieova i le mea sa uluaʻi taʻua o Siamani i Sasae. Ua latou tutū e avea o se molimau i le taʻitaʻiga atamai ma le alofa a Ieova le Atua. O lana lagolagosua talu mai tausaga sa matou i ai i lalo o faasāsāaga ua faaalia ai faapea e mafai lava ona ia pulea so o se tulaga. Tusa lava po o le ā se auupega ua fuafuaina faasaga i ona tagata, o le a lē manuia lava. E tausi lelei pea e Ieova i latou o ē faatuatuaina o ia. (Isaia 54:17; Ieremia 17:7, 8)—E pei ona faamatalaina e Horst Schleussner.

[Ata i le itulau 31]

O Horst and Makerita Schleussner i le nofoaga o le Sosaiete i Perelini i Sasae