Pe E te Manatua?

Pe sa e olioli ea i le faitauina o lomiga talu ai nei o Le Olomatamata? Afai sa e olioli, o le a e fiafia la e toe faamanatuina manatu nei:

▫ Pe mafai ona maua le upu moni faalelotu?

Na fetalai Iesu Keriso: “E iloa e outou le upu moni, e tuusaoloto foi outou e le upu moni.” (Ioane 8:32) Sa lē gata ina faasino mai e Iesu faapea e mafai ona maua le upu moni, a e na faaalia foi, o le sailia o le upu moni o se mea e manaomia i la tatou tapuaiga i le Atua. Na ia taʻu atu i le fafine Samaria: “O e tapuai faamaoni latou te tapuai i le Tamā i le agaga ma le faamaoni [“upu moni,” NW].” (Ioane 4:23)—4/15, itulau 5.

▫ O ai Robert Estienne, ma na faapefea ona ia faalauiloaina lona soifuaga?

O Robert Estienne o se tagata lomitusi, o lē na soifua i le lona 16 senituri. Sa ia tuutoina atu lona olaga i le lomiaina o le Tusi Paia ma tauivi malosi ina ia sailia mai upu o le Tusi Paia sa muai tusitusia ai. O lana faiga mo le vaevaeina o mau o le Tusi Paia i fuaiupu ua faafuainumeraina, o le faiga lea ua faaaogaina i le lalolagi aoao i aso nei.—4/15, itulau 10, 14.

▫ Ua faapefea ona aogā ia i tatou le faitauina o le Tusi Paia i lea aso ma lea aso?

E faifaipea ona mauaina mai i le Tusi Paia ni uiga fou mo i tatou, ma o valoaga e faatatau i aso e gata ai ua oo ina faatāuaina atili e tusa ai ma mea ua tatou vaaia, ua tatou faalogo ai, ma tatou oo moni i ai. A o faalauteleina atu lo tatou poto masani i le olaga ma tatou onosaia faafitauli, tatou te matuā talisapaia atili ai fautuaga a le Tusi Paia. (Faataoto 4:18)—5/1, itulau 15.

▫ E mafai faapefea ona manatuaina mau o le Tusi Paia?

A o e faitauina le Tusi Paia, ia faailoga mau e te manao e manatua, po o le tusia i ni pepa malō ma tuu nei pepa malō i se mea o le a mafai ona e tilotilo pea i ai i aso taitasi. A o e taumafai e tauloto na mau, ia mafaufau loloto i ai ma ia faaaogā. Aua e te taumafai e taulotoina ni mau se tele i le taimi e tasi, atonu ua lava le tasi po o le lua i vaiaso taitasi.—5/1, itulau 16, 17.

▫ O le ā le faamatalaga o loo i le Evagelia a Luka ua faaopoopo atu i mea ua saunia mai e isi tusitala faa-Evagelia?

E ui o le tele o faamaumauga a Luka e tali tutusa ma faamaumauga a Mataio, a e tusa ma le 59 pasene e eseese ai. Na faamauina e Luka i lana tusi ni vavega uigaese se ono, ma e sili atu foi i le faaluaina o lena aofai le tele o isi tala faatusa a Iesu o loo faamatala mai e Luka, a e lē o faamatalaina e isi tusitala faa-Evagelia.—5/15, itulau 12.

▫ O ā ni faasusuluina atu mataina o le malamalama o le upu moni na faaalia i le 1935?

O le tausaga lena na malamalama ai tagata o Ieova e faapea, o le motu o tagata lea e taʻua i le Faaaliga 7:9, 14 e lē o faatatauina atu, i se vaega lona lua faalelagi, a e o loo faatatau ia i latou o lo latou faamoemoe o le lalolagi. (Ioane 10:16)—5/15, itulau 20.

▫ O ā auala aogā e mafai ona tatou faamafanafana atu ai i ē o faavauvau?

Ia faalogologo atu i ai. Ia avatu i ai ni faamautinoaga. Ia faaavanoa atu oe. Ia e tausolomua pe a talafeagai. Ia tusi atu i ai se tusi po o se pepa o faamafanafanaga. Ia tatalo faatasi ma i latou. (Iakopo 5:16) Ia faaauau pea ona fesoasoani atu ia i latou.—6/1, itulau 13, 14.

▫ O le ā e mafai e uso ma tuafāfine faaleagaga ona fai e fesoasoani atu ai ia i latou o loo nonofo i aiga e lē lolotu faatasi ina ia tumau?

Ia talatalanoa atu pea ia i latou i upu faalaeiau, i upu mautinoa, ma upu faamafanafana. (1 Tesalonia 5:14) O lenei faiga o le a avea e pei o se faafouina i o latou mafaufau ma o latou tino. Pe afai e aogā ma talafeagai, ia faaauai foi i latou i au gaoioiga faatiokarate po o ni mea faasamasamanoa foi. Ia taʻua i latou i au tatalo. (Roma 1:9; Efeso 1:16)—6/1, itulau 29.

▫ O ā taui e maua mai le faaalia o le onosai a o auai i le faiva i le fanua?

O le onosai e fesoasoani i se tagata talaʻi o le Malo e onosaia ai so o se faaletonu po o teteega. Nai lo le finau atu ma le ita i tagata e ona fale, a e o faifeau onosai o le a mafai ona latou avatua se tali agamalu po o le tuumuli ese ma le filemu, ma faatumauina ai le filemu ma le olioli. (Mataio 10:12, 13) E lē gata i lea, o le a tosina mai ai ē pei ni mamoe i le feau o le Malo.—6/15, itulau 9.

▫ Aisea e tāua tele ai le iloaina o le upu moni o le Tusi Paia?

O le iloaina o le upu moni e faasaolotoina ai i tatou mai i pepelo, o faiga taufaasese, ma faiga faataulaitu. Pe a tatou ola e tusa ai ma le upu moni, o le a faamalosia ai i tatou ina ia onosaia faigata ma faagaeetia ai i tatou i le faamoemoe lea e mafai ona tatou onosaia ai tofotofoga.—7/1, itulau 8.

▫ O le ā le tiute tauave autū na faaauauina mai pea e le faapotopotoga o Kerisiano faauuina ina ua mavae atu Isaraelu faaletino?

O le faaeaga o le molimau atu i le silisili ese o Ieova i nuu ese. (Isaia 43:21; 1 Peteru 2:9)—7/1, itulau 19.

▫ O le ā ua faatatau i ai upu a le aposetolo o Peteru e faapea e ao i le tane ona ʻavatu le āva’ i lana avā? (1 Peteru 3:7)

O le tane o lē āva i lana avā na te lē faamaasiasiina o ia pe taʻufaatauvaaina o ia. Nai lo lea, na te faaalia i ana upu ma ana gaoioiga—pe a na o i laʻua ma i luma foi o isi tagata—e faapea na te matuā faaaloalogia o ia. (Faataoto 31:10-31)—7/15, itulau 19.

▫ Aisea e mafai ai ona faapea atu o se faiga alofa le tuuesea mai le faapotopotoga Kerisiano o se tagata ua faia se mea sese a e lē salamō?

O le faateʻaina o se faailoaga lea o le alofa mo Ieova ma ona ala. (Salamo 97:10) E faaalia ai le alofa mo i latou o loo tuliloaina le ala amiotonu auā ua aveesea mai ai i lo latou lotolotoi se tasi o lē e mafai ona avatua ni taaʻiga leaga ia i latou; o se puipuiga foi lenei mo le mamā o le faapotopotoga. (1 Korinito 5:1-13)—7/15, itulau 25.

▫ E mafai faapefea ona mataulia i aso nei “le auauna faamaoni ma le mafaufau,” lea na taʻua e Iesu i le Mataio 24:45-47?

Ua mataulia faapitoa i latou e ala i le galuega o loo latou faia o le sauniunia o lomiga faale-Tusi Paia, i le aʻoaʻo atu ma le talaʻi atu o le “tala lelei o le malo,” ma e ala foi i lo latou pipii mau atu i le Afioga a le Atua, le Tusi Paia. (Mataio 24:14; 28:19, 20)—8/1, itulau 16.