Fesili Mai le Au Faitau

Talu ai e taumafai Molimau a Ieova ina ia faamaoni ma faatuatuaina e le tasi le isi, aisea la latou te lagona ai le tāua o le faia o se feagaiga tusitusia pe a faia ni a latou lava feutagaiga faapisinisi?

O lo latou faia faapea e faale-Tusi Paia, e aogā, ma o se gaoioiga alofa. E faapefea? Seʻi o tatou iloiloina la na vala o feagaiga faapisinisi.

Ua aumaia i le Tusi Paia se faamaumauga tusitusia o feutagaiga a le Atua ma ona tagata sa faia le latou feagaiga, o tagata Isaraelu. E aofia ai feutagaiga faapisinisi sa faia e tagata tapuai moni. I le Kenese mataupu e 23 o loo iai se feutagaiga faapisinisi e mafai ona tatou talanoaina. Ina ua maliu Sara lana avā pele, sa manao Aperaamo e maua se fanua e tanu ai. Ona ia feutagai lea ma tagata sā Kananā sa nonofo e latalata i Heperona. I le fuaiupu 7-9 o loo faaalia ai lona ofoina atu o se tau patino mo le fasi fanua sa ia manao ai. O loo faamaonia i le fuaiupu e 10 le faia o lenei ofo i luma o le lautele, a o faalogologo atu i ai isi tagata sa i le faitotoa o le aai. Ua faaalia i le fuaiupu e 13 le malie o le tagata e ana le laueleele e avatu le fanua ia Aperaamo, ae na tali mai Aperaamo e faatoʻā ia aveina le fanua pe afai e faatau. Ma i fuaiupu e 17, 18, ma le 20 o loo faamatala ai e faapea o le auala lena sa faia ai, sa faamautinoa “i luma o le fanauga a Heti, i luma o i latou uma o e ulu mai i le faitotoa o lana aai.”

Ae faamata e iai se eseesega, pe ana fai o tagata e toalua e faia lena feutagaiga faapisinisi, o ni tagata e i le tapuaiga moni uma i laua? Ua saunia mai e le Ieremia mataupu e 32 le tali. I le faasolo mai i le fuaiupu e 6, tatou te iloa ai sa manao Ieremia e faatau se fanua mai lona tausoga. O loo faaalia i le fuaiupu e 9 se tau talafeagai na malilie i ai. Seʻi faitau nei la le fuaiupu 10-12: “Ona ou [Ieremia] tusia lea i le tusi, ma ou faamaufaailogaina ai, ma ou amia mai molimau, ma ou fuatia le ario i le fua faatautau. Ona ou ave ai lea o le tusi o le faatau, o le ua faamaufaailogaina e tusa ma le poloaiga ma tulafono, atoa ma le ua le faamauina; ua ou ave foi le tusi o le faatau ia Paruka, le atalii o Neria, le atalii o Maaseia, i luma o Hanameali, le atalii o le uso o loʻu tamā, i luma foi o molimau na tusi i le tusi o le faatau, i luma foi o tagata Iuta uma sa nonofo i le lotoā o le fale puipui.”

Ioe, e ui lava sa feutagai Ieremia ma se isi uso tapuai, ma o lona tauaiga foi, ae na ia faia lava ni faatulagaga talafeagai faaletulafono. E lua ni kopi tusitusia na faia—o le tasi kopi sa faataatia ese e fai ma toe tapa i ai, ae o le kopi lona lua sa teuina malu ina ia fai ma faamaoniga pe a teʻi ua iai se masalosaloga i le moni aʻiaʻi o le kopi lea e faataatia ese. Sa faatinoina uma nei gaoioiga, e pei ona faapea mai le fuaiupu e 13, “i o latou luma.” O lea, sa avea o se feutagaiga faapisinisi faaletulafono, na molimauina, i luma o le lautele. E manino la, sa muai avea o se faiga faale-Tusi Paia le taulimaina e tagata tapuai moni o mataupu i se auala faamaonia tusitusia faapena.

E aogā foi. Ua tatou iloa le moni o le faaupuga e faapea “o le tausaga ma le mea e tupu ai e oo ia te i latou uma.” (Failauga 9:11) E aofia ai ma Kerisiano faamaoni. Ua faaupu mai faapenei e le Iakopo 4:13, 14: “Faauta mai ia, outou o e fai ane, ‘O le asō po o taeao tatou te o atu ai i lea aai, po o le tasi aai, ma nonofo ai i le tausaga e tasi, ma faatau, ma maua ai oloa;’ a e le iloa e outou se mea e tupu a taeao.’ O lea, atonu tatou te amataina se fuafuaga, e pei o le faia o se faatauga tele o se mea, se maliega e fai se galuega po o se auaunaga mo le isi tagata, po o se isi lava mea e faia mo se tasi. Ae o le ā o le a tupu taeao—po o le masina a sau po o le tausaga a sau? E faapefea pe a teʻi ua tupu faafuasei se faalavelave ia i tatou po o le isi tagata lea tatou te faipisinisi faatasi? O lena mea atonu e foliga mai o le a faigata ai ona tausia le maliega lea sa fai. E faapefea pe afai ua lē mafai ona tatou faatinoina le galuega po o se auaunaga, pe ua iloa foi e le tagata lea tatou te faipisinisi faatasi ua tau lē mafai ona ia totogia tupe pe ua lē mafai ona ia faaauauina lana vaega o le maliega? Pe afai e leai se maliega tusitusia, e mafai ona tutupu aʻe faafitauli matuia, o faafitauli e ono mafai ona foia pe semanu e lē oo i ai pe ana iai sina feutagaiga tusitusia.

E lē gata i lea, e lē tatau ona tatou faagaloina e faapea, ona o le tulaga matuā lē mautinoa i le tele o vala o le olaga, e ono oo ai i le iai o se isi tagata e tatau ona ia faaauauina pe na te faavasegaina la tatou vaega i le pisinisi po o le vaega a le isi tagata lea sa tatou faipisinisi faatasi. Na fai mai atili Iakopo i le fuaiupu e 14: “Auā pe se a lo outou ola? O le puao lava lea, ua aliali mai i se itu aso itiiti, ona mou ai lea.” E ioeina le mea moni, e mafai ona tatou oti faafuasei. Ae o se maliega, se feagaiga tusitusia, e mafai moni ona faataga ai isi ina ia latou faaauau le taulimaina o mataupu, pe a teʻi ua iai se mea e tupu faafuasei i so o se tasi o ē o loo faia se pisinisi.

O lenei mea, e tatai atu ai i le vala lona tolu—o feagaiga tusitusia o ni gaoioiga alofa. E mautinoa lava, po o ai lava le tagata o loo iai i le pisinisi e faafuasei ona maliu pe oo i ai se faalavelave faafuasei, o le a avea o se faiga alofa mo se Kerisiano le saunia o se faamaumauga tusitusia o ona tiutefai po o ni ana ala tupe e ono maua. Ma e nai lo le atagia atu ai o se uiga lē faatuatuaina, e faaalia ai le alofa mo le uso lea o loo tatou feutagai pe a faia se feagaiga tusitusia o le a faamatala manino ai ma le saʻo po o ā mea e tatau ona ia faia po o ni mea na te ono maua. O lenei laasaga alofa o le a faaitiitia ai so o se pogai o ni lagona tiga pe lē fiafia, pe a teʻi ua galo i se tasi o tagata lē lelei atoatoa ia o loo fai le la pisinisi, nisi o faamatalaga po o ni tiutefai. Auā o ai se isi o i tatou e lelei atoatoa, e lē galogalo mea, pe oo ina faauiga sese ni faamatalaga po o ni gaoioiga?—Mataio 16:5.

E iai isi auala e avea ai le faia o ni maliega tusitusia faapisinisi o se faaatagiaina atu o le alofa mo lo tatou uso, lo tatou aiga, ma le faapotopotoga. Peitai e tatau ona manino lelei, e lē gata o se gaoioiga alofa, ae o na faamaumauga tusitusia i ni auiliiliga saʻo aʻiaʻi, e aogā ma e faale-Tusi Paia.