Na Latou Faia le Finagalo o Ieova

O se Tamā e Nofo Sauni e Faamagalo

UA TAʻUA o le tala e pito sili ona puupuu ua tusia—e talafeagai lelei lava. O le faataoto a Iesu i le alofa o se tamā mo lona atalii na leiloa, ua pei o se faamalama e mafai ona iloa atu ai se vaaiga matagofie i le agaalofa o le Atua mo tagata agasala e salamō.

Na Leiloa ae ua Toe Maua

Sa iai se tamaloa e toalua ona atalii. Na faapea atu le uii ia te ia: ‘Ou te manao i loʻu tofi o le oa i le taimi nei, nai lo o le faatali seia e maliu.’ Na ioe i ai le tamā, ma e foliga mai na ia avatu ia te ia le tasi vae tolu o mea uma sa ia te ia—o le vaega ua tatau mo le uii o atalii e toalua e tusa ai ma le tulafono. (Teuteronome 21:17) Na faanatinati ona ao e le taulealea ana oa ma malaga atu loa i se nuu mamao lea na ia faaalu uma ai ana tupe e ola ai i se olaga e matuā lē mamā.—Luka 15:11-13.

Ona tupu ai lea o se oge tele. Ona o le atuatuvale, na talia ai e lenei taulealea se galuega o le avea ma sē e fafagaina se lafu puaa—o se galuega inosia i se Iutaia. (Levitiko 11:7, 8) Na matuā lē lava mea ʻai, o lea na ia manaonao ai e samusamu i atigi mea na ʻaina e puaa! Mulimuli ane, ona toe atamai ai lea o le taulealea. Na ia faapea ane ia te ia lava, ‘O auauna a lou tama ua sili atu ona aai lelei nai lo o aʻu nei! O le a ou toe foi atu i le aiga, tautino aʻu agasala, ma talosaga atu ina ia avea aʻu o se tasi o tagata faigaluega a loʻu tama.’a—Luka 15:14-19.

Ona toe foi atu loa lea o le taulealea i le aiga. E lē masalomia na matuā suia lava ona foliga vaaia. E ui i lea, ‘na iloa mamao atu o ia’ e lona tama. Na mutimutivale lona alofa, na ia momoʻe atu i lona atalii, fusi ia te ia, ma “sogi atu ia te ia.”—Luka 15:20.

O lenei feiloaiga mafana na faafaigofie ai i le taulealea ona faamatuu atu mea na mamafa ia te ia. Na ia faapea atu, “Loʻu tamā e, ua ou agasala i Lē o i le lagi, atoa ma ou luma, ua ou le toe aoga ona taʻua o lou atalii, [“Ia e avea aʻu ia pei o se tasi o au tagata faigaluega,” NW].” Na faatonuina loa e le tamā ana auauna. Na ia faatonu atu e faapea: “Au mai ia loa le ofu tatapuvae e aupito lelei, ma faaofu ia te ia; ma ia tuu se mama i lona lima, ma faasee i ona vae; au mai ia foi le tamai povi peti, ma fasi; tatou te aai ma olioli; auā o loʻu atalii lenei, na oti, ua toe ola mai; na le iloa foi o ia, a ua maua.”—Luka 15:21-24.

Ua amata le faigaai tele, e aofia ai musika ma siva. Ina ua toe foi mai le atalii matua mai le fanua na ia lagona mai le vāvāō. Ina ua ia iloaina ua toe foi mai i le aiga lona uso ma o le mafuaaga lena o le pāti, na matuā ita o ia. Ona ia faitio atu ai lea i lona tama, “Faauta, o tausaga e tele, ua ou auauna ai ia te oe, ua leai lava sau poloaiga ua ou solia; a e te lei au mai lava se tamai ʻoti ma aʻu, matou te olioli ai ma aʻu uo. Peitai o lou atalii lena, sa na faaumatia au mea faatasi ma fafine tali tane, ua sau o ia, ona e fasi lea le tamai povi peti māna.” Ua tali atu ma le agaalofa lona tama: ‘Atalii e, ta te nonofo pea ma oe, o aʻu mea uma foi, o āu ia. Ae ua tatau foi ona tatou olioli, auā o lou uso lena na oti, a ua toe ola mai. Na leiloa o ia, ae ua toe maua mai.’—Luka 15:25-32.

Lesona mo i Tatou

O le tamā i le faataoto a Iesu ua suitulaga i lo tatou Atua agaalofa, o Ieova. E pei o le atalii na leiloa, o nisi tagata na tuua le saogalemu o le aiga o le Atua mo se taimi ae mulimuli ane toe foi mai. E faapefea la ona silasila Ieova i ia tagata? O i latou e toe foi ia Ieova ma le salamō moni e mafai ona faamautinoa e faapea “e le aoai mai pea lava ia; e le faamoemoe foi lona toasa e faavavau.” (Salamo 103:9) I le faataoto, o le tamā na momoʻe atu e faafeiloai lona atalii. E faapena foi, o Ieova e lē gata ina loto malie ae naunau e faamagalo ē e agasala ae salamō. O ia “e faamagalo sala” ma e na te “matuā faamagaloina.”—Salamo 86:5; Isaia 55:7; Sakaria 1:3.

I le faataoto a Iesu, o le alofa moni o le tamā na faafaigofie ai mo le atalii ona mauaina le lototele e toe foi atu ai. Ae mātau: E faamata o le ā le mea e ono tupu pe ana faapea na faato e le tamā le tama pe matuā ita lava ma faapea atu e aua le toe foi atu? O se uiga faapena e semanu e lē toe foi atu ai lava le tama.—Faatusatusa i le 2 Korinito 2:6, 7.

O lona uiga la, o le alofa moni o le tamā na saunia ai le avanoa mo lona atalii e toe foi atu ai ina ua alu ese. E iai taimi, e tatau ai i toeaina Kerisiano i aso nei ona aveesea tagata agasala e lē salamō mai le faapotopotoga. (1 Korinito 5:11, 13) I le faia faapea, e mafai ai ona latou saunia le avanoa mo tagata agasala e toe foi mai, e ala i le faasino atu i ai ma le agaalofa laasaga ia na te mafai ona uia mo le toe faaeaina mai i le lumanai. O le manatuaina o lena fesoasoani moni mai le loto, ua mulimuli ane uunaia ai le toatele ua leiloloa faaleagaga e salamō ma fesoasoani ai ia i latou e toe foi atu i le aiga o le Atua.—2 Timoteo 4:2.

Na faaalia foi e le tamā le agaalofa ina ua toe foi atu lona atalii. E lei umi ae ia iloa le salamō moni o lona atalii. O lea, nai lo le auiliilia uma o faamatalaga e faatatau i le agasala a lona atalii, sa ia pisi loa i le faia o mea e faafeiloai ai o ia, ma sa ia faaalia le fiafia tele i le faia faapea. E mafai ona faataitai Kerisiano i lenei faaaoaoga. E tatau ona latou olioli e faapea ua toe maua lē na leiloa.—Luka 15:10.

O le gaioioiga a le tamā na lei masalomia ai le leva ona ia faatalitalia o le toe foi atu o lona atalii ua taase. O le mea moni, ua na o se ata lea o le faanaunauga o Ieova o loo iai mo i latou uma ua tuua lona aiga. E “lē finagalo ia fano se tasi, a ia oo uma lava i le salamo.” (2 Peteru 3:9) O i latou e salamō e mafai ona faamautinoaina e faapea o le a faamanuiaina i latou “i tausaga e filemu ai mai luma o le Alii [Ieova].”—Galuega 3:19.

[Faaopoopoga i lalo]