Se Sauniga Fiafia—Le Faauuga o le Vasega Lona 104 a Kiliata
“O SE aso fiafia lenei, ma ua tatou olioli uma lava.” O upu na a Carey Barber, o se sui o le Vaega Pule o Molimau a Ieova, na ia tatalaina ai le polokalame o le faauuga o le vasega lona 104 a le Aʻoga Faale-Tusi Paia a le Olomatamata o Kiliata, ia Mati 14, 1998. Na valaaulia le aofia e 4,945 ina ia amata le sauniga i le usuina o le pese o le Malo numera 208, ua faaulutalaina “Le Pese o le Olioli” (A Song of Rejoicing).
Fautuaga Aogā Ina ia Tumau i le Fiafia
O le vaega amata o le polokalame, o se faasologa o ni lauga pupuu faale-Tusi Paia se lima, na saunia mai ai fautuaga aogā i le auala e tausisia ai le agaga olioli lea sa iai i le aso o le faauuga.
O le lauga muamua na tauaaoina e Joseph Eames o le Matagaluega o Tusitusiga. Na talanoa o ia i le matua “Ia Faataitai i le Agaga o Ē Alolofa Faamaoni,” sa faavae mai le tala faale-Tusi Paia i le 2 Samuelu mataupu e 15 ma le 17, lea na faufau ai Apisaloma, le atalii o Tavita, e aveese mai le malo na tuuina atu e le Atua i lona tamā e ala i le faatupuina o se fouvalega. Peitai ane, sa iai i latou na faamaoni atu pea i le tupu o Tavita, o lē na faauuina e Ieova. O le ā se lesona e mafai e misionare fou ona aʻoaʻoina mai lenei mea? Fai mai upu faaiu a le uso o Eames: “Po o fea lava tou te ō i ai i tou tofiga faamisionare, ia faatupuina ma le alofa faamaoni le agaga o le felagolagomai ma le faaaloalo i le pule faatiokarate. Ia fesoasoani atu i isi ia latou faia foi faapea.”
Na sosoo ai i le polokalame David Sinclair, o lē na ia otooto maia mea manaomia e sefulu, o loo taʻua i le Salamo 15, mo le avea ma malo i le ‘fale fetafai o Ieova.’ I lana lauga, na faamatuaina “Ia Avea Pea Outou o ni Malo i lo Outou Fale Fetafai Faamisionare,” na ia faalaeiau ai le ʻau faauu ina ia faatatauina lenei salamo i o latou tofiga faamisionare, o iina o le a avea ai i latou ma malo. Na faamatilatila e le uso o Sinclair le tāua o le ola i tapulaa faale-Atua i taimi uma. O ā iuga? Ua taʻua i le Salamo 15:5: “O le ua faia ia mea e le faagaeetia lava ia e faavavau.”
Na sosoo ai ma John Barr, o se sui o le Vaega Pule, na ia tataʻi atu manatu i le telē o le aogā o le pepese i sauniga faa-Kerisiano. Ae o le ā le pese e sili ona olioli ai lea o loo peseina i le lalolagi aoao i aso nei? O le tala lelei o le Malo Faa-Mesia o le Atua. O le ā ua iu i ai lenei peseina o le pese, po o le talaʻia o le Malo? O le vaega lona lua o le pese numera 208, o loo taʻu lelei mai ai faapea: “E ala i le talaʻiga o le Malo ma aʻoaʻoga faa-Kerisiano, e toatele ai ua tosina atu i le itu a Ieova. O i latou foi nei, o loo peseina atu pese o le olioli, o loo latou faaleo atu, ua matuā mamao lava!” Ioe, i aso taitasi e tusa ma le 1,000 soo fou ua papatisoina. Na faaiu mai le uso o Barr: “Po ua lē matagofie ea uso e, le mafaufau faapea, ua aauina atu outou i oganuu e feiloai ai ma ituaiga o tagata o ē o loo faatalitali mai e fia faalogologo i la outou pese o viiga?”
“Faalogo i Upu a Ē Popoto” o le matua lena o le lauga na sosoo mai na taulimaina e James Mantz o le Matagaluega o Tusitusiga. Na ia taʻua ai faapea e iai nisi mea e faatoʻā mafai ona aʻoaʻoina e ala i le poto masani o le tagata. (Eperu 5:8) E ui i lea, ua faalaeiauina i tatou e le Faataoto 22:17 ina ia ‘uaʻi atu o tatou taliga ma faalogo i upu a ē popoto,’ po o i latou o ē ua iai le poto masani. E tele mea e mafai e le ʻau faauu ona aʻoaʻoina mai isi na muamua atu ia i latou. “Ua latou iloa le auala e finauina ai le tau o oloa ma faatauoloa. Ua latou iloa po o fea vaipanoa o le aai e alofia ona o ni lamatiaga i le tino po o amioga lē tatau. Ua latou iloa mea e ilitata ai tagata o le atunuu. O misionare ua leva, ua latou iloa mea e te manaomia ina ia e fiafia ai ma taulau manuia i lou tofiga,” o le tala lea a le uso o Mantz.
I le talanoaina o le matua “Ia Talisapaia Lou Tofiga Faatiokarate,” na faamatala ai e Wallace Liverance, o le lesitala o le Aʻoga o Kiliata, faapea o nisi misionare, e pei o le aposetolo o Paulo, o Timoteo, ma Panapa, na latou maua o latou tofiga mai le Atua e ala i le agaga paia po o nisi faaaliga faavavega, peitai o misionare na toleniina i Kiliata ua tofia atu i latou i se nofoaga i le fanua o le lalolagi e “le auauna faamaoni ma le mafaufau.” (Mataio 24:45-47) Na ia faatusatusa tofiga o misionare i nofoaga sa tofia atu e Kitiona i ona tagata o ē na tau ma le ʻau a Mitiana. (Faamasino 7:16-21) Na faalaeiau mai le uso o Liverance: “Ia talisapaia lou tofiga faatiokarate faamisionare. E pei lava ona ‘sa tutū pea fitafita a Kitiona e taitasi i le mea sa iai,’ ia faapena foi ona e vaai i lou tofiga o le mea lena e tatau ona e iai. Ia faatuatua e mafai e Ieova ona faaaogā oe e pei lava ona sa ia faaaogā le toluselau o tagatatau a Kitiona.”
O le Naunau i Tagata e Maua ai le Fiafia
Na taʻua e le Watchtower i se tasi taimi: “Nai lo le taulai o o tatou faanaunauga i mea faitino ma fausaga fou eseese a lenei lalolagi, o mea e lē mautinoa pe tumau ona aogā, maeu le sili atu ona lelei ma sili atu ona atamai pe a fai tagata ma o tatou faanaunauga moni ma ia aʻoaʻo ia maua le olioli moni i le faia o mea mo isi.” I le ogatusa ma lena manatu, na talanoaina ai e le uso o Mark Noumair, o se tasi o faiaʻoga o le Aʻoga o Kiliata, faatasi ma ni tagata aʻoga o le vasega, mea na tutupu i la latou auaunaga i le fanua ma faapea mai: “O le faaalia o le naunau totino i isi o le a avea ai outou ma ni misionare lelei.”
Ki e Maua ai le Fiafia i Atunuu Ese
O ā nisi o ki e taulau manuia ma maua ai le fiafia i le galuega faamisionare? O le uso o Charles Woody o le Matagaluega o le Auaunaga ma Harold Jackson, o lē na avea muamua ma misionare i Amerika Latina ma o se fesoasoani i le Komiti o Aʻoaʻoga, na la faatalanoaina ni sui o Komiti o Lālā eseese, o ē sa auai i le vasega lona iva o le aʻoga mo sui o komiti o lālā. O se faataitaiga lenei o fautuaga na ofoina mai e nei uso:
Na taʻua e Albert Musonda mai Zambia: “Pe a tausolomua i se misionare le alu atu e faafeiloai uso, e tupu aʻe ai se agaga lelei tele auā o le a mafana atu ai uso i le misionare, ma mafana atu foi le misionare i uso.”
Na fautua mai Rolando Morales mai Guatemala e faapea, pe a ofo atu i misionare e ni tagata faaleuō ni vaitaumafa e masani aʻi le atunuu, e mafai ona latou tali atu ma le agalelei ma le faautauta: “Ou te fou mai i le atunuu. Maimau pe ana mafai ona ou inuina, ae ona e lei masani ai loʻu tino e pei o outou. Ou te faamoemoe e iai se aso ona mafai lea ona ou inuina, ma o le a ou fiafia e faia faapea.” O ā ni aogā o lena tali? “O le a lē tiga ai lagona o tagata, ma o le a faaalia ai foi e misionare le agalelei i isi.”
O le ā e mafai ona fesoasoani i misionare ina ia tumau ai i o latou tofiga? O le manatu lenei o le uso o Paul Crudass, o sē na faauu mai le vasega lona 79 a Kiliata, ma ua 12 nei tausaga talu ona auauna i Liperia: “Ou te iloa o le mea moni e misia e mātua a latou fanau. Peitai e iai taimi e taumafai ai se misionare e faamasani atu i le atunuu, i agaifanua, i tagata. Atonu e oo ia te ia lagona ua toe fia tuua lona tofiga. Pe afai e maua sana tusi mai le aiga o loo faapea mai, ‘Ua matuā matou misia lava oe; matou te lē iloa po o le a faapefea ona matou ola e aunoa ma oe,’ atonu ua lava na upu e tapena ai ana ato ma toe foi atu i le aiga. E tāua tele la mo tauaiga o loo i le aofia i le asō ona manatua lena mea.”
Ina ua uma faatalanoaga, ona tauaaoina mai lea o le lauga faaiu o le polokalame e Theodore Jaracz, o se sui o le Vaega Pule. O lana matua: “Ia Faamuamua Pea le Malo i Lou Olaga.” E mafai faapefea e misionare ona maumauai pea ma lē tosina ese mai la latou galuega? Na ia faalaeiauina i latou ina ia iai se faasologa mo suesuega totino faale-Tusi Paia, o le a fesoasoani lena ia i latou e faamuamua ai pea manaoga o le Malo i le olaga. Ma o upu faamanatu nei sa sili ona talafeagai: “Ua lafoaia e nisi misionare suesuega totino ona ua alu uma le taimi i le faaaogaina o fausaga fou eseese faaeletise, o E-mail, ma le komepiuta. E tatau ona ia i tatou le mafaufau lelei ina ia paleni ai i le faaaogaina o so o se meafaigaluega ae lē o le faaaluina ai o se taimi tele i le faia o se mea e mafai ona faasolosolo mālie ona faalavelavea ai la tatou suesuega totino o le Afioga a le Atua.”
Ina ua maeʻa le lauga a le uso o Jaracz, ona sosoo loa lea ma le tufatufaina o tusipasi ma le lauina o se tusi o le agaga talisapaia mai le vasega. Na faaalia mai e se tasi na fai ma sui o le vasega lagona uma o tagata taitoatasi i upu nei: “Sa matou vaaia faamaoniga moni o le alofa lea na fetalai Iesu o le a mataulia ai ona soo, ma o lenei ua faamautinoa mai ai ia i matou, e tusa lava po o fea matou te iai, o loo iai lava se faalapotopotoga e mafana, e alofa, ma faatinā mai, o loo lagolagoina i matou. Ona o lena lagolagosua, ua matou nofo sauni ai e ō atu i tuluʻiga uma o le lalolagi.” O se faaiuga na matuā faagaeetia uma ai lagona i le aso fiafia o le faauuga mo le vasega lona 104 a Kiliata.
[Pusa i le itulau 24]
Faamaumauga o le Vasega
Aofai o atunuu o loo iai o latou sui: 9
Aofai o atunuu ua tofia i ai: 16
Aofai o tagata aʻoga: 48
Aofai o ulugalii: 24
Faatatauga o tausaga: 33
Faatatauga o tausaga i le upu moni: 16
Faatatauga o tausaga i le faiva faataimi atoa: 12
[Ata i le itulau 25]
Vasega Faauu Lona 104 o le Aʻoga Faale-Tusi Paia a le Olomatamata o Kiliata
I le lisi i lalo, o laina e amata mai i luga agaʻi i tua, ma o igoa e lisi mai le itu agavale i le itu taumatau i laina taitasi
(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.
[Ata i le itulau 26]
O uso o ē na auai i le aʻoaʻoina o le vasega lona 104: (mai le itu agavale) W. Liverance, U. Glass, K. Adams, M. Noumair