Fesili Mai le ʻAufaitau

Pe afai e faalogo se Kerisiano i ni leo, po o lona uiga ea ua osofaʻia o ia e temoni?

E leai. Ua lipotia mai, o le auala lenā e faaali mai ai temoni, ae o le toʻatele o tagata o ē faalogo i leo pe oo foʻi i ni tulaga lē mafaamatalaina o le mafaufau, ua iloa ane ina ua uma ona faia ni suʻesuʻega, e iai ni o latou faafitauli tau i le soifua mālōlōina.

E oo lava i le uluaʻi senituri, i nisi taimi, e foliga mai sa iloa e tai tutusa lava āuga o osofaʻiga a temoni ma tulaga i faafitauli o le soifua mālōlōina. I le Mataio 17:14-18, e tatou te faitau ai e uiga i se tama talavou lea na faamālōlōina e Iesu. E ui lava ina faaalia mai sa matuā aafia le tama talavou i āuga o le maʻi māliu, ae o le mea moni, o ona mafatiaga, na māfua moni lava i se temoni. Ae peitaʻi, i se mea na tupu muamua, ina ua aumai le toʻatele o tagata iā Iesu ina ia faamālōlōina, na aofia ai iā i latou nei ia nisi o ē na “uluitinoina e temoni, ma ē ua maʻi māliu.” (Mataio 4:24) E manino mai la, o nisi o maʻi māliu e leʻi ulutinoina e ni temoni. O o latou faafitauli, o ni maʻi faaletino.

Ua lipotia mai e faapea, o nisi o ē o loo mafatia i le maʻi o le mafaufau e taʻua o le schizophrenia, o se maʻi e faalogo i leo pe aafia i nisi āuga, lea e foliga e matuā ese lava, lea e mafai ona togafitia i fualaau.a O isi tulaga lē lelei faaletino e ono māfua ai ona fenuminumiaʻi le mafaufau ma manatu sesē ai nisi e faapea, e pogai i temoni. Talu ai e manatu le tagata lea e faalogo i leo ma aafia i nisi faalētonu o le mafaufau e faapea, o temoni e māfua ai lona maʻi, e tatau lava ona matuā faalaeiauina o ia ina ia suʻesuʻeina pe e iai se faamatalaga a le fomaʻi e faatatau i lona maʻi.

[Faamatalaga pito i lalo]