E Ao Ona Fai Ieova ma o Tatou Faatuatuaga

“O Ieova, e fai o ia mou faatuatuaga.”—FAATAOTO 3:26.

1. E ui ina toatele tagata e faapea mai o loo faatuatua i le Atua, ae o le ā e faaalia ai latou te lē o faia pea faapea?

O LE tagavai “Matou te Faatuatua i le Atua” (In God We Trust) o loo tusia lea i le tupe a le Iunaite Setete a Amerika. Ae po o tagata uma ea o loo latou faaaogaina lenei tupe i lena atunuu po o fea lava isi vaipanoa, o tuu atu moni lo latou faatuatua i le Atua? Po o sili atu ona latou faatuatua i tupe? O lena faatuatua i tupe i lena atunuu po o se isi lava atunuu, e lē mafai ona tuufaatasia ma le faatuatua atu i le Atua o le alofa, o lē e ona le malosi uma lava, o lē e lē tāitai ona ia faaaogaseseina lana pule ma e lē tāitai ona matapeapea. O le mea moni, ua manino lelei mai lona matuā taʻusalaina o le matapeapea.—Efeso 5:5.

2. O le ā le uiga ua iai i Kerisiano moni e faatatau i le malosi o le oa?

² E tuu atu le faatuatuaga o Kerisiano moni i le Atua, ae lē i oa, ma lona “malosi e pepelo.” (Mataio 13:22, NW) Ua latou iloa lelei o le malosi o tupe e uunaia ai le fiafia ma faaumiumi ai le ola e matuā faatapulaaina lava. E lē faapena le malosi o le Atua e Ona le Malosi Uma Lava. (Sefanaia 1:18) O lea la, maeu le atamai o le timaiga: “Ia aunoa a outou amio ma le matapeapea; ia gata ia o outou manao i mea ua ia te outou; auā ua fetalai mai o ia, Ou te le tuua lava oe, ou te le tuulafoai lava ia te oe”!—Eperu 13:5.

3. Ua faapefea i le mataupu atoa o le Teuteronome 31:6 ona faamalamalamaina le siiina mai e Paulo o le fuaiupu?

³ A o tusi atu upu o i luga i Kerisiano Eperu, sa sii atu ai e le aposetolo o Paulo faatonuga ia sa avatu e Mose i le fanauga a Isaraelu a o latalata lava i lona maliu: “Ia outou faamalolosi, ma outou loto tetele; aua tou te fefefe, aua foi neʻi matatau i o latou luma; auā o Ieova lou Atua, lua te o faatasi ma ia; na te le tuuna oe, na te le lafoai ia te oe.” (Teuteronome 31:6) E faaalia e isi fuaiupu o le mataupu atoa faapea sa taumafai Mose e uunaia le tuu atu ia Ieova o le lagona maufaatuatuaina lea e sili atu nai lo le tau ina faatuatua ia te ia na te saunia mai o latou manaoga faaletino. E faapefea?

4. Na faapefea ona faamaonia atu e le Atua i le fanauga a Isaraelu faapea e mafai ona faatuatua atu ia te ia?

⁴ I le 40 tausaga sa fesavaliai solo ai Isaraelu i le vaomatua, sa faamaoni ai le Atua i le saunia mo i latou o mea manaomia o le olaga. (Teuteronome 2:7; 29:5) Sa ia saunia foi le taitaiga. O se tasi o faailoga o lenei mea o le ao sa iai pe a ao, ma le afi pe a po, lea na taitaia ai le fanauga a Isaraelu i “le nuu o tafe ai le suāsusu ma le meli.” (Esoto 3:8; 40:36-38) Ina ua oo mai le taimi mo le ulu moni atu i le Nuu Folafolaina, na filifilia ai e Ieova Iosua e avea ma sē e sosoo ane ia Mose. O ē na aināina le nuu sa ono faatalitalia lo latou tetee ane. Peitai e faitau sefulu tausaga o iai Ieova i le savaliga a ona tagata, sa lē manaomia ai la ona latou matataʻu. Sa iai i le fanauga a Isaraelu mafuaaga uma latou te iloa ai o Ieova o ia o le Atua, e mafai ona faatuatuaina!

5. Ua faapefea ona talitutusa le tulaga o Kerisiano i aso nei ma le tulaga sa iai le fanauga a Isaraelu a o lei ulu atu i le Nuu Folafolaina?

⁵ O loo savavali foi Kerisiano i aso nei i le vaomatua o lenei lalolagi amioleaga a o latou agaʻi atu i le lalolagi fou a le Atua. O nisi o i latou ua sili atu i le 40 tausaga o latou uia pea lenei ala. Ua latou tutū nei i le faitotoa o le lalolagi fou a le Atua. Peitai, o loo faasalavei ane pea fili, i le taumafai e taofia so o se tasi mai le ulu atu i le mea o le a avea ma Nuu Folafolaina, e sili atu le matagofie nai lo le nuu anamua lea sa tafe ai le suasusu ma le meli. Maeu la le talafeagai mo Kerisiano i aso nei o upu a Mose, e pei ona toe taʻua mai e Paulo: “Ou te le tuua lava oe, ou te le tuulafoai lava ia te oe”! O i latou uma e tumau i le faamaoni ma le lototele, e tumu i le faatuatua, ma tuu atu atoa le maufaatuatuaina ia Ieova, e mautinoa le tauia o i latou.

Le Maufaatuatuaina e Faavae Aʻe i le Iloa ma se Faauooga

6, 7. (a) O le ā na tofotofoina ai le maufaatuatuaina e Aperaamo o Ieova? (e) O ā faalogona atonu sa iai ia Aperaamo a o faimalaga atu i le nofoaga lea sa tatau ona ia faataulaga ai Isaako?

⁶ I se tasi taimi, na poloaia ai Aperaamo le augatamā o le fanauga a Isaraelu, ina ia faataulaga lona atalii o Isaako e fai ai le taulagamū. (Kenese 22:2) O le ā na mafai ai e lenei tamā alofa ona iai sona faatuatuaga lē maluelue faapena ia Ieova ma vave ai ona ia lotomalie e usitai? Ua tali mai le Eperu 11:17-19: “O le faatuatua na fai taulaga ai Aperaamo ia Isaako, ina o tofotofoina o ia, o le na talia foi upu na folafolaina ua ia avatu ma taulaga o lona atalii e toatasi, sa fetalai mai le Atua ia te ia, E valaauina lau fanau ia Isaako. Ua manatu o ia e mafaia e le Atua ona toe faatu mai tagata nai e ua oti, o lea foi na ia toe maua mai ai o ia, ua fai lea ma faatusa.”

⁷ Ia manatua, e tolu aso na agaʻi atu ai Aperaamo ma Isaako i le nofoaga o le a fai ai le taulaga. (Kenese 22:4) Sa tele se taimi na maua e Aperaamo e ono toe manatunatu ai i le mea ua tāpā o ia e fai. Pe mafai ona faaāta i o tatou mafaufau ona faalogona, ona lagona ootia? O le fanau mai o Isaako sa avea o se pogai na lei faatalitalia o le olioli. O lena faamaoniga o le faalaa ane tauatua sa atili ai ona pipii vavalalata atu i le Atua ia Aperaamo ma lana avā o Sara, lea sa lē mafai muamua ona fanau. E mautinoa talu mai lena taimi, sa la ola ai ma faatalitalia se lumanai o le a iai mo Isaako ma ē tupuga mai ia te ia. Ae pe o le a muta faafuasei ea o la faamoemoega, e pei ona foliga mai ai, ona o le mea ua tāpā mai nei e le Atua ia i laʻua?

8. Na faapefea e le maufaatuatuaina e Aperaamo o le Atua ona sili atu nai lo le tau ina talitonu faapea e mafai e le Atua ona toe faatūina mai Isaako?

⁸ E ui i lea, sa iai ia Aperaamo se faatuatuaga e faavae aʻe i lona iloa totino lea e iai i le va o ni uō mamae. I le avea o se “uo a le Atua,” na “faatuatua [ai] Aperaamo i le Atua, ona taʻua ai lea ia te ia e fai ma amiotonu.” (Iakopo 2:23) O le maufaatuatuaina e Aperaamo o Ieova sa sili atu nai lo le tau ina talitonu faapea e mafai e le Atua ona toe faatūina mai Isaako. Sa matuā talitonu maumauai Aperaamo e talafeagai le mea ua tāpā o ia e Ieova e fai, e ui sa lei malamalama Aperaamo i vala uma e aofia ai. Sa leai se mafuaaga na te masalomia ai pe sa amiotonu Ieova i le faia o lenei manaoga. Ona atili faamalosia lea o le faatuatuaga o Aperaamo ina ua faasalavei ane le agelu a Ieova e puipui Isaako mai le fasiotia moni e fai ai le taulaga.—Kenese 22:9-14.

9, 10. (a) O anafea le isi taimi muamua atu na faaalia ai e Aperaamo lona maufaatuatuaina o Ieova? (e) O le ā se lesona tāua e mafai ona tatou aʻoaʻoina mai ia Aperaamo?

⁹ Sa faaalia e Aperaamo lenei lava ituaiga o faatuatuaga i le amiotonu a Ieova i le tusa ma le 25 tausaga muamua atu. Ina ua lapatai mai o le a faaumatia Sotoma ma Komoro, sa tatau lava ona popole o ia mo le tulaga lelei o so o se tagata amiotonu sa ola ai iina, e aofia ai Lota le atalii o lona uso. Na augani atu Aperaamo i le Atua i upu nei: “Ia mamao lava ia te oe ona e faia faapea e fasioti i e amiotonu faatasi ma e amio leaga; ma ona faagatusa e amiotonu ma e amio leaga, ia mamao lava lea ia te oe. O le na te faamasinoina le lalolagi uma, e le faia ea e ia le faamasinoga tonu?”—Kenese 18:25.

¹⁰ Sa talitonu maumauai Aperaamo le augātamā faatuatua e faapea, e lē tāitai ona faia e Ieova se mea e amioletonu. Mulimuli ane, na pese le faisalamo: “E amiotonu Ieova i ona ala uma; o loo alofa ia i ana mea uma lava na faia.” (Salamo 145:17) E lelei pe a tatou fesili ifo ia i tatou lava: ‘Pe ou te taliaina ea mea ua faataga e Ieova e oo mai ia te au e aunoa ma loʻu masalosalo i lana amiotonu? Po o oʻu talitonu maumauai ea faapea, po o ā lava mea na te faataga o le a iu ina aogā mo aʻu ma aogā foi i isi?’ Afai e mafai ona tatou tali mai i le ioe, o lena la ua tatou aʻoaʻoina se lesona tāua mai ia Aperaamo.

Le Faaalia o le Mautinoa i Filifiliga a Ieova

11, 12. (a) O le ā le vala o le maufaatuatuaina ua manaomia e auauna a le Atua? (e) O le ā atonu o se faafitauli mo i tatou i nisi taimi?

¹¹ O i latou e iai le vaaiga ua ia Ieova lo latou faatuatuaga, ua latou faaalia foi lo latou faatuatuaina o tane ua filifilia e Ieova e faaaogā i le galueaiina o ana fuafuaga. Mo le fanauga a Isaraelu, sa uiga lena mea i lo latou maufaatuatuaina o Mose, ma lē na sosoo ane ia te ia, o Iosua. Mo uluai Kerisiano, sa uiga lenei mea i lo latou maufaatuatuaina o aposetolo ma toeaina o le faapotopotoga i Ierusalema. Mo i tatou i aso nei, ua uiga i le iai o so tatou maufaatuatuaina o “le auauna faamaoni ma le mafaufau” ua tofia e aumaia ia i tatou “mea e ʻai [faaleagaga] i ona itu aso,” faapea foi i isi, o ē o i latou na ua faia aʻe ai le Vaega Pule.—Mataio 24:45.

¹² O le mea moni, o le tuu atu o lo tatou faatuatuaga ia i latou o loo taimua i le faapotopotoga Kerisiano e mo lo tatou lelei. Ua taʻu mai ia i tatou: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.”—Eperu 13:17.

Alofia le Faaluafesasi i Filifiliga a Ieova

13. O le ā le mafuaaga ua ia i tatou mo le maufaatuatuaina o i latou ua tofia e taimua?

¹³ Ua fesoasoani mai le Tusi Paia ia i tatou ina ia tatou paleni ai i le maufaatuatuaina o i latou o loo taimua i tagata o Ieova. Tatou te ono fesiligia i tatou lava: ‘Pe na faia ea e Mose ni mea sese? Pe na faaalia ea e aposetolo i taimi uma uiga e pei o uiga o Keriso lea na finagalo Iesu ia iai ia i latou?’ O loo manino mai tali. Ua filifili Ieova e faaaogā tane faamaoni ma tuutoina atu e taitaia lona nuu, e ui lava o i latou o ni tane lē lelei atoatoa. E faapena foi la, e ui e lē lelei atoatoa toeaina i aso nei, ae tatau lava ona tatou amanaia i latou o ē “[ua tofia] e le Agaga Paia e fai ma leoleo [ovasia], ia leoleo atu i le ekalesia a le Atua.” Ua tatau ia i latou la tatou lagolagosua ma le faaaloalo.—Galuega 20:28.

14. O le ā e lelei ona matauina e faatatau i le filifilia e Ieova o Mose e fai ma taʻitaʻi nai lo Arona po o Miriama?

¹⁴ E tolu tausaga e matua ai Arona ia Mose, ae laiti uma i laʻua i lo la tuafafine o Miriama. (Esoto 2:3, 4; 7:7) Ma talu ai e sili atu ona lelei le tautala a Arona nai lo Mose, o lea na tofia ai o ia e avea ma fofoga fetalai mo lona uso. (Esoto 6:29–7:2) Peitai, mo le taitaiga o Isaraelu, sa lei filifilia e Ieova lē e sili ona matua, o Miriama lea, po o lē e sili ona lelei le tautala, o Arona lea. O lona filifilia o Mose sa faia lava ma lona silafia lelei o vala uma ma manaoga uma sa iai i lena taimi. Ina ua iai se taimi na galo ai ia Arona ma Miriama lenei malamalamaga, ona la faitio lea: “Ua na o Mose ea ua fetalai mai ai Ieova? e le o i maua foi ea ua fetalai mai ai o ia?” Na faasalaina Miriama e tusa ma lenei uiga lē faaaloalo i le filifiliga a Ieova ona e foliga mai o ia na faaosoina le faitioga ia Mose, o lē sa tatau ia te ia ma Arona ona amanaia o lē “na matuā agamalu lava . . . e sili lava i tagata uma o i le lalolagi.”—Numera 12:1-3, 9-15.

15, 16. Na faapefea ona faamaonia mai e Kalepo lona maufaatuatuaina o Ieova?

¹⁵ Ina ua aauina atu tagata vāai e 12 ina ia asiasi i le Nuu Folafolaina, e toʻa 10 na foi mai ma se lipoti lē lelei. Na latou faamataʻuina loto o tagata Isaraelu e ala i le taʻua o tagata Kanana faapea “o tagata tino eese lava i latou.” O lenei mea, na māfua ai, ona ‘muimui le fanauga a Isaraelu ia Mose ma Arona.’ Peitai e lē o tagata vāai uma na faaalia le leai o se maufaatuatuaina ia Mose ma ia Ieova. Ua tatou faitau ai: “Ona vavao ai lea e Kalepo i le nuu ia filemu i luma o Mose, ua faapea atu, Seʻi tatou matuā o ae lava i ai, ma fai ai mo i tatou; auā e mafai lava ona tatou manumalo ai.” (Numera 13:2, 25–33; 14:2) O le tulaga maumauai o Kalepo sa lagolago mai i ai lona uso tagata vāai o Iosua. Na faaalia uma e i laʻua lo la maufaatuatuaina o Ieova ina ua la faapea mai: “Afai e finagalo alofa mai Ieova ia te i tatou, na te faaootia lava i tatou i lena nuu, ma foai mai ai ia te i tatou; o le nuu lava ua tafe ai le suāsusu ma le meli. A e . . . aua foi tou te matatau i tagata o le nuu . . . o loo ia te i tatou Ieova; aua tou te matatau ia te i latou.” (Numera 14:6-9) Sa tauia lenei maufaatuatuaina o Ieova. Mai le augatupulaga matutua sa iai i lena taimi, e na o Kalepo lava ma Iosua, ma nisi au sā Levī na latou maua le faaeaga e ulu atu ai i le Nuu Folafolaina.

¹⁶ I ni tausaga mulimuli ane ona faapea mai lea o Kalepo: “A o aʻu nei, na ou matuā mulimuli atu ia Ieova loʻu Atua. . . . O lenei foi, faauta, ua faaolaina aʻu e Ieova, e pei ona fetalai mai o ia, o ia tausaga e fagafulu ma le lima, talu ona fetalaia mai e Ieova lenei upu ia Mose, a o feoai Isaraelu i le vao; o lenei foi, faauta mai ia, o aʻu nei e valugafulu ma le lima oʻu tausaga i le aso nei. O loo tumau loʻu malosi i le aso nei e pei o le aso na auina atu ai aʻu e Mose; e pei o loʻu malosi i lea aso, o loo o faapea foi loʻu malosi i le aso nei.” (Iosua 14:6-11) Seʻi mātau le uiga mautinoa o Kalepo, lona faatuatua, ma ona tomai faaletino. Peitai, sa lei filifilia e Ieova Kalepo e sosoo ane i le tofiga sa iai ia Mose. O le faaeaga lenei na tuuina atu ia Iosua. E mafai ona tatou maufaatuatuaina faapea sa iai mafuaaga a Ieova mo lana filifiliga, ma o se filifiliga foi na sili ona lelei.

17. O le ā atonu sa foliga ai e lē talafeagai ia Peteru tiute tauave?

¹⁷ E faatolu ona faafitia e le aposetolo o Peteru lona Matai. Sa ia osovale foi ma taulimaina mataupu i lona lava poto, ma ia tipiesea ai le taliga o le auauna a le ositaulaga sili. (Mataio 26:47-55, 69-75; Ioane 18:10, 11) Atonu e faapea mai nisi o Peteru o se tagata sa palaai, ma lē paleni, sa lē talafeagai ona tuuina atu ia te ia ni faaeaga faapitoa. Peitai, o ai lea na tuuina atu i ai ki o le Malo, na faaeaina na te tatala le ala i le valaau faalelagi i vaega e tolu o tagata? O Peteru.—Galuega 2:1-41; 8:14-17; 10:1-48.

18. O le ā le mea sese, tatou te mananao e alofia e pei ona taʻua e Iuta?

¹⁸ O nei faaaoaoga e faaalia ai e tatau ona tatou faaeteete i le faamasinoina o foliga mai fafo. Afai e tuu atu lo tatou faatuatuaga ia Ieova, o le a tatou lē masalosalo la i ana filifiliga. E ui o loo faia aʻe lana faapotopotoga faalelalolagi i tagata lē lelei atoatoa, o ē e lē faapea mai e saʻo atoatoa, ae o loo ia faaaogā pea i latou i se auala mamalu. Na lapataia e Iuta, le ʻafa uso o Iesu, Kerisiano o le uluai senituri e uiga i tagata o loo “latou taʻufaatauvaa i alii, ma upu leaga i e ua mamalu.” (Iuta 8-10) Aua lava neʻi o tatou pei o i latou na.

19. Aisea e leai ai se mafuaaga tatou te faaluafesasi ai i filifiliga a Ieova?

¹⁹ E foliga mai e filifilia e Ieova mo tiute tauave patino, tagata taitoatasi o ē e iai ni uiga patino talafeagai ina ia taitaia ai ona tagata i le ala o loo ia finagalo ia latou savavali ai i lena taimi patino. E tatau ona tatou taumafai e amanaia lenei mea moni, ae lē o le faaluafesasi i filifiliga a le Atua, ae ia talia ma le lotomaulalo le auauna atu i so o se mea lava ua tofia i ai i tatou taitoatasi e Ieova. O le faia faapea tatou te faaalia ai ua fai Ieova ma o tatou faatuatuaga.—Efeso 4:11-16; Filipi 2:3.

Faaalia o le Maufaatuatuaina i le Amiotonu a Ieova

20, 21. O le ā atonu tatou te aʻoaʻoina mai le auala na feutagai ai le Atua ma Mose?

²⁰ Pe afai e iai ni taimi e mātele ai ina tatou faatuatuaina naʻuā i tatou lava ae itiiti ia Ieova, seʻi o tatou aʻoaʻoina la se lesona mai ia Mose. Ina ua 40 ona tausaga, sa ia alu atu ai o ia lava e faasaʻoloto le fanauga a Isaraelu mai le pologa i Aikupito. E lē masalomia sa lelei uunaiga o ana taumafaiga, peitai sa lei iu ai i se laveaiga vave o Isaraelu, e lei faaleleia ai foi lona lava tulaga. O le mea moni, na iu ina manaomia ona sola ese ai. Ina ua mavae le 40 tausaga o ni toleniga fitā i se nuu ese, o iina loa na faatoʻā agavaa ai o ia e filifili e faia le mea sa ia manao e fai i le taimi muamua. Ae i lea taimi, sa mafai ona ia maufaatuatuaina le lagolago ane a Ieova auā o lea ua faia nei mea i le auala a Ieova, ma i le taimi ua talafeagai ma Lana faasologa.—Esoto 2:11–3:10.

²¹ Tatou te ono fesiliga i tatou lava taitoatasi: ‘Po o iai ea nisi taimi o oʻu fia muamua ai i fuafuaga a Ieova ma toeaina ua tofia i le faapotopotoga, i loʻu taumafai e faavavevave pe faia mea i laʻu lava auala? Nai lo le manatu faapea e lē o amanaia maia aʻu i nisi o faaeaga, po o oʻu lotomalie ea e talia le taimi lenei o loo toleniina ai aʻu?’ O le mea moni lava, po ua tatou aʻoaʻoina ea se lesona tāua mai ia Mose?

22. E ui lava ua lē maua se faaeaga sili, ae na faapeī lagona o Mose e faatatau ia Ieova?

²² E lē gata i lea, e mafai ona tatou aʻoaʻoina se isi lesona mai ia Mose. Ua taʻu mai e le Numera 20:7-13 ia i tatou se mea sese na ia faia, lea na matuā matuia le iuga na oo ai ia te ia. Na aveesea ai mai ia te ia le faaeaga o lona taitaia atu o le fanauga a Isaraelu i le Nuu Folafolaina. Pe na ia tali atu ai ea la faapea sa lē saʻo le faaiuga a Ieova i lea mataupu? Pe na ia alu ese loa i se isi mea, ua lē toe fia tautala ona ua leaga tele le faiga o ia e le Atua? Pe na lē toe faatuatuaina ai ea e Mose le amiotonu a Ieova? E mafai ona tatou maua le tali i upu na tautala atu ai Mose lava ia ia Isaraelu a o latalata i lona oti. E faatatau ia Ieova, na faapea atu Mose: “E sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio saʻo lava ia.” (Teuteronome 32:4) E mautinoa sa tausia pea e Mose lona maufaatuatuaina o Ieova seia oo lava i lona oti. Ae faapefea i tatou? Po o tatou taitoatasi ea ma uia laasaga e faamalosia ai lo tatou maufaatuatuaina o Ieova ma lana amiotonu? E mafai faapefea ona tatou faia lena mea? Seʻi o tatou vaai.

O le a Faapefea Ona E Tali?

◻ O ā mafuaaga sa iai i le fanauga a Isaraelu mo le faatuatua atu ia Ieova?

◻ E tusa ai ma le maufaatuatuaina, o le ā e mafai ona tatou aʻoaʻoina mai ia Aperaamo?

◻ Aisea e tatau ai ona tatou alofia le faaluafesasi i filifiliga a Ieova?

[Ata i le itulau 13]

O le maufaatuatuaina o Ieova e aofia ai le faaaloalo atu ia i latou o loo taimua i le faapotopotoga