Faamalosia o Lo Tatou Faatuatuaina o le Amiotonu a le Atua

“Ua ou aʻoaʻo ia te oe, . . . ina ia fai Ieova mou faatuatuaga.”—FAATAOTO 22:19.

1, 2. (a) Aisea e faaalia ai e Molimau a Ieova le faatuatuaga ia Ieova? (Faataoto 22:19) (e) O le ā e faaalia ai e manaomia e nisi tagata ona faamalosia lo latou faatuatuaina o Ieova?

UA FAAMANUIAINA Kerisiano moni i le poto saʻo e uiga ia Ieova ma ana fuafuaga. O loo foai mai pea ma le alofa e le “auauna faamaoni ma le mafaufau” ia i latou “mea e ʻai [faaleagaga] i ona itu aso.” (Mataio 24:45) O le poto ua latou maua e saunia ai mo i latou se faavae mautū e fafau aʻe ai lo latou faatuatuaina o le Atua. O lea, i le avea o se vaega, ua faaalia ai e Molimau a Ieova se faatuatuaga mataina ia Ieova ma lana amiotonu.

² Ae peitai, e foliga mai, i le tulaga o tagata taitoatasi, e iai nisi Molimau latou te ono manaomia ona faamalosia lena faatuatuaga. Ua maua e le Sosaiete mai lea taimi i lea taimi ni tusi o loo faailoa mai ai ni manatu lē mautinoa e faatatau i ni faamalamalamaga o loo avatu i ana lomiga. O nei masalosaloga atonu o se uiga faaalia i ni fetuunaiga o le malamalamaga, pe e faatatau i ni mataupu o loo aafia ai lē o loo fesili, ae maise lava i tulaga tau faalogona ootia.—Faatusatusa i le Ioane 6:60, 61.

3. O le ā e mafai ona tupu e oo lava i auauna faamaoni a Ieova, ma aisea?

³ E oo lava i auauna moni a Ieova ua latou iloa le saʻo o le Failauga 9:11: “Ua ou toe iloa foi i lalo o le la, ua le sini i le tausinioga e ua tele vavave, ua le malo i le taua e ua malosi, ua le i ai foi i e ua popoto le mea e ʻai, ua le i ai i e ua faautauta le oloa tele, ua le i ai foi i e ua atamamai le alofaina mai; a o le tausaga ma le mea e tupu ai e oo ia te i latou uma.” E ono faamaonia faapefea le moni o lenei mea i se uiga lautele atu, pe i se uiga faaleagaga? Atonu ua tatou iloa ni Kerisiano o ē sa vave ona latou faatatauina fautuaga faale-Tusi Paia, sa malolosi i le puipuia o le upu moni, sa atamamai i le faatatauina o mataupu silisili faale-Tusi Paia, ma maelega i le sailia o le poto saʻo. Peitai, ona o “le tausaga ma le mea e tupu ai,” ua iloa ai nei e nisi le faatapulaa mai o lo latou malosi ona o se faalavelave na aafia ai pe ua faasolo ina matua le soifua. Atonu ua latou tau mānatu pe faamata o le a latou ulu atu i le lalolagi fou a le Atua e aunoa ma lo latou oo i le oti.

4, 5. Aisea e leai ai se mafuaaga mo Kerisiano e mou ese atu ai lo latou faatuatuaina o le amiotonu a Ieova?

⁴ Pe a tatala e le oti le mafutaga a se Kerisiano ma lana paaga faaipoipo, e matuā matuitui le tiga o lagona o le motusia o le mafutaga. Atonu a o la faatasi o se ulugalii, sa la auauna ia Ieova mo le tele o tausaga, po o le faitau fia sefulu foi o tausaga. E iloa e le paaga o loo soifua pea faapea, o le oti e tatala ai le fusi o le faaipoipoga.a (1 Korinito 7:39) I le taimi nei, ina ia lē faavaivaia lona faatuatuaga, e tatau ai ona ia pulea lelei ona faalogona ootia.—Faatusatusa i le Mareko 16:8.

⁵ Maeu le atamai o le manatu i le maliu o se paaga, po o se matua, po o se tasi o le fanau, po o se uo mamae Kerisiano, o se avanoa lea e faaalia ai le maufaatuatuaina o le amiotonu a Ieova! E tusa lava po o tatou faavauvau ona ua maliu sē e pele, e mafai ona tatou faatuatuaina faapea, e lē amioletonu Ieova. E mafai ona ia i tatou le faatuatuaga faapea o i latou uma o ē maua le ola e faavavau—pe ala i le faasaoolaina atu pe ala i le toe tutū—o le a maua le fiafia. Ua faapea mai le faisalamo e uiga i le Atua: “O loo e faamafola lou aao, ma faamaoona le manao o mea ola uma lava. E amiotonu Ieova i ona ala uma; o loo alofa ia i ana mea uma lava na faia. E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni. E faia e ia le mea e manao i ai o e matatau ia te ia; e faafofoga foi o ia i la latou alaga atu, ma faaolaina i latou.”—Salamo 145:16-19.

Pe a Iai Lagona ua Soona Pagatia Fua

6, 7. (a) Aisea atonu ua suia ai nei le malamalamaga o nisi Molimau o ē na pagatia i aso ua mavae? (e) Aisea e lē tatau ai ona tatou manatu faapea e amioletonu Ieova ona o lona faataga o na mafatiaga i aso ua mavae?

⁶ I aso ua mavae, na pagatia ai nisi Molimau ona o lo latou teena o le auai i se gaoioiga atonu o lea ua faataga nei e o latou loto fuatiaifo e fai. Mo se faaaoaoga, atonu o sa latou filifiliga lea i le tele o tausaga ua mavae e tusa ai o nisi o auaunaga faalemalo i le lautele. I le taimi nei atonu ua manatu ai se uso, ua mafai e tusa ai ma lona loto fuatiaifo ona ia faatino lena auaunaga e aunoa ma le solia ai o lana solitu faa-Kerisiano e tusa ai o le faiga o mea o iai nei.

⁷ Pe sa amioletonu ea Ieova i le faataga o ia e pagatia ona o le teena o le mea lea atonu ua ia faia nei e aunoa ma ni āuga e oo i ai? O le toatele o ē na tutupu ai lena mea o le a lē manatu faapena. Nai lo lea, ua latou fiafia ona sa latou maua ai se avanoa e faailoa atu ai i le lautele ma le manino faapea, sa latou maumauai e mausalī i le mataupu o le pule silisiliese aoao. (Faatusatusa i le Iopu 27:5.) O le ā se mafuaaga e mafai ona iai i se tasi e ono toe salamō ai i lona mulimuli atu i lona loto fuatiaifo ma faia se tulaga mausalī mo Ieova? E ala i le sapasapaia faamaoni o mataupu silisili faa-Kerisiano e pei ona latou malamalama i ai pe ala i le tali atu i uunaiga a le loto fuatiaifo, ua latou faamaonia ai se faauooga ma Ieova. E mautinoa lava, e atamai ona alofia se laasaga o le a faalavelavea ai le loto fuatiaifo o se tasi po o le ono faatausuai ai o isi. E mafai i lenei itu ona tatou mafaufau ai i le faaaoaoga sa faataatia e le aposetolo o Paulo.—1 Korinito 8:12, 13; 10:31-33.

8. Aisea ua leai ai se mafuaaga mo Kerisiano Iutaia, o ē na tausisia muamua le Tulafono, e latou te fesiligia ai le amiotonu a Ieova?

⁸ Ina ia faafiafia le finagalo o Ieova, sa manaomia ona usitaia e tagata Iutaia Tulafono e Sefulu faapea ma le tusa ma le 600 o isi tulafono faaopoopo eseese. Mulimuli ane, e tusa ai ma le faatulagaga faa-Kerisiano, sa lē toe manaomia ai ona usitaia nei tulafono ina ia mafai ai ona auauna atu ia Ieova, sa lē manaomia e oo lava i tagata Iutaia faaletino. O tulafono sa lē toe saisaitia ai e aofia ai tulafono e faatatau i le peritomeina, le tausia o le Sapati, le ofoina o taulaga i manu, ma le tausia o nisi o faasasaaga i meaʻai. (1 Korinito 7:19; 10:25; Kolose 2:16, 17; Eperu 10:1, 11-14) O tagata Iutaia—e aofia ai aposetolo—o ē na avea ma Kerisiano sa tuusaunoa i latou mai le avega tauave o le tausia o tulafono na sa manaomia ona latou usitaia a o latou iai i le feagaiga o le Tulafono. Pe na latou faitio ea faapea sa amioletonu le faatulagaga a le Atua i lona muai tāpā mai ia i latou o ni mea o lea ua lē toe manaomia? E leai, nai lo lena, sa latou olioli ona ua faalauteleina lo latou malamalamaga i fuafuaga a Ieova.—Galuega 16:4, 5.

9. O le ā le mea moni e uiga i nisi Molimau, ae aisea ua leai ai se pogai latou te faanoanoa ai?

⁹ I ona po nei, e iai nisi Molimau sa matuā maumaututū lava i o latou manatu i mea latou te fai ma mea latou te lē faia. Ona o lena mafuaaga, na sili atu ai lo latou pagatia nai lo isi. Mulimuli ane, o le faateleina o le malamalama na fesoasoani ia i latou e faalautele ai o latou manatu i mataupu. Ae peitai e leai se pogai latou te faanoanoa ai ona o a latou gaoioiga sa faia i le taimi muamua e tusa ai ma o latou loto fuatiaifo, e ui lava o na mea atonu na faaopoopo mai ai nisi pagatia. O le mea moni e faamālō atu ona o lo latou faaalia o le lotomalie e pagatia talu ai le faamaoni atu ia Ieova, ina ia “faia foi le mea nei ona o le tala lelei.” E faamanuia e Ieova lena ituaiga o tuutoina atu i le Atua. (1 Korinito 9:23; Eperu 6:10) Na tusi ma le poto le aposetolo o Peteru: “Afai tou te onosai pe a tigaina outou a o amio lelei, o le mea lava lea e mālie i le Atua.”—1 Peteru 2:20.

Aʻoaʻoina se Lesona Mai ia Iona

10, 11. Na faaalia faapefea e Iona le leai o sona maufaatuatuaina o Ieova (a) ina ua tuuina i ai le tofiga e alu atu i Nineva? (e) ina ua lē faaumatiaina e le Atua tagata Nineva?

¹⁰ Ina ua faatonu e alu atu i Nineva, sa faaalia e Iona le leai o sona talisapaia o le maufaatuatuaina o ia e Ieova. Ina ua mavae se mea matautia na tupu ona o lona musu e usiusitai, ona toe sagatonu lea o le mafaufau o Iona, sa ia iloa lana mea sese, ma ia talia ai lona tofiga i nuu ese, ma lapataia loa tagata Nineva e faatatau i le faaumatiaga ua lalata ane. Ae teʻi ua tupu se mea sa lei faatalitalia: Talu ai uiga salamō o tagata Nineva, na filifili ai Ieova o le a lē faaumatiaina i latou.—Iona 1:1–3:10.

¹¹ O le ā se manatu i ai o Iona? I le matuā lē malie lava, na ia tatalo faitio atu ai i le Atua. E tusa o le faauigaga lenei o lona tiga: ‘E saʻo lava laʻu mate o le tulaga lenei o le a oo i ai. O le mafuaaga lea na ou lē manao ai e sau i Nineva i le taimi muamua. Lenei la, ua uma le tele o mea na oo ia te au, e aofia ai le matuā fefe ma le maasiasi i le foloina e se iʻa telē, ua uma foi laʻu galuega mamafa o le lapataia o tagata Nineva e faatatau i le faaumatiaga ua lalata mai, ae seʻi vaai la i le iuga ua iai! Ua matuā maimau atoa aʻu galuega ma loʻu mafatia na iai! Na sili ai pe ana ou oti!’—Iona 4:1-3.

12. O le ā e mafai ona tatou aʻoaʻoina mai le mea na tupu ia Iona?

¹² Pe na iai ea se mafuaaga tatau mo Iona e faitio ai? Pe sa amioletonu Ieova i lona faasalafa atu o lona alofa mutimutivale i tagata faimea sese ua salamō? O le mea moni, sa tatau ona olioli Iona; e faitau fia sefulu afe tagata ia o le a faasao mai le faaumatiaga! (Iona 4:11) Peitai o ona uiga lē faaaloalo, ma le faitio na faaalia ai sa ia lei faatuatuaina atoatoa le amiotonu o Ieova. Sa mātele lona mafaufau mo ia lava ae itiiti mo isi. Seʻi o tatou aʻoaʻoina se lesona mai ia Iona, e ala i le lē faasilia o o tatou lava manaoga ma o tatou faalogona. Ia tatou talitonu mautinoa, o le usiusitai atu ia Ieova, e ala i le usitaia o taiala o loo aumaia e ala mai i lana faalapotopotoga ma talia ana faaiuga, o le mea tonu lea e tatau ona fai. Ua tatou talitonu mautinoa, o le a ‘manuia ai e ua matatau i le Atua moni.’—Failauga 8:12.

O le Taimi Lenei e Faamalosia ai lo Tatou Faatuatuaga!

13. E mafai faapefea e i tatou uma ona faamalosia lo tatou faatuatuaina o Ieova?

¹³ O le faamalosia o lo tatou faatuatuaina o Ieova o se ala atamai. (Faataoto 3:5-8) O le mea moni, e tatau ona iai ma nisi mea tatou te faia nai lo le tau ina tatalo faapea e fesoasoani mai Ieova ia i tatou ina ia faamalosia atili lo tatou faatuatuaga. O le faatuatuaga e tuputupu aʻe e faavae i le poto saʻo, o lea e tatau ai ona avea o se vaega o la tatou faasologa i aso taitasi le faia o a tatou suesuega totino faale-Tusi Paia, le faitauina o le Tusi Paia ma lomiga faale-Tusi Paia. O le auai e lē aunoa i sauniga faa-Kerisiano e tāua tele, e pei foi o sauniuniga lelei ma ni sao e faia i se tele e mafai ai. O le faia ma masani le tufa atu o upu moni o le Tusi Paia i isi, i le foiaina ma le faautauta o ni teteega, e faalolotoina ai foi lo tatou maufaatuatuaina o Ieova ma lana Afioga. Ona atili ai lea ona tatou mafuta ma ia i se faavae faifai pea i aso taitasi.

14. Aisea ua lē o toe mamao ai ona manaomia lea i tagata o le Atua ona faaalia lo latou faatuatuaina o Ieova i se uiga e sili atu nai lo o se isi lava taimi?

¹⁴ I le lumanai ua lē o toe mamao, o le a oo faafuasei mai ai le taimi sili o le puapuaga lea sa lei taia muamua ai lava le fanau a tagata. (Mataio 24:21) Pe a oo mai, o le a matuā sili atu nai lo i se isi lava taimi, ona manaomia i auauna a le Atua le faaalia o lo latou faatuatuaina o le amiotonu a Ieova ma taiala ua saunia mai e lana faalapotopotoga. I se uiga faafaatusa, o le a latou usiusitai ai ma maufaatuatuaina le poloaiga a le Atua: “Ina o mai ia, loʻu nuu e; ina ulu atu ia i o outou afeafe, ma pupuni o outou faitotoa; ia outou lalafi e pei se emo ona puupuu, seia mavae atu le toasa.” (Isaia 26:20) O lea ua latou ulu atu i le siomaga malupuipuia o le silia i le 85,000 faapotopotoga i atunuu e 232. Po o ā lava nisi mea atonu e toe faaopoopo mai i le faatonuga ina ia “ulu atu ia i o outou afeafe,” e mafai ona tatou faatuatuaina o le a fesoasoani mai Ieova ia i tatou ina ia faatino na faatonuga.

15. Ua faapefea ona faamamafaina le mataupu o le maufaatuatuaina a o faagasolo le 1998, ma aisea ua tonu ai le faia faapea?

¹⁵ E manaomia tele ona faamalosia i le taimi nei lo tatou faatuatuaga. Pe a tatou lē faatuatuaina o tatou uso Kerisiano, le faalapotopotoga a Ieova, ae maise ai, o Ieova lava ia, o le a faafaigata foi la le faasaoina. E maeu ai la le talafeagai a o faagasolo le 1998, ona toe faamanatu atu pea i Molimau a Ieova i le lalolagi aoao, upu o la latou mau o le tausaga, e faapea “e faaolaina i latou uma o e valaau i le suafa o le Alii [Ieova]”! (Roma 10:13) O iina, e tatau ona tuu pea i ai lo tatou faatuatuaga. Pe afai tatou te iloaina e oo lava i sina tamai faailoga o le lē mautinoa i lenei faatuatuaga, e tatau ona tatou taumafai nei loa e toe faasaʻo, ioe, i le asō.

O le a Amiotonu le Faamasinoga a Ieova

16. O le ā e mafai ona tupu i le faatuatuaga pe a lē atiina ae, ma e mafai faapefea ona tatou puipuia lenei mea mai le ono tupu?

¹⁶ I le Eperu 3:14, ua lapataia ai Kerisiano faauuina: “E mafuta faatasi o i tatou ma Keriso, pe afai tatou te taofi mau lava i lo tatou muai faatuatua e oo i le gataaga.” E tusa ai ma le mataupu silisili, o nei upu e faatatau atu foi i Kerisiano o ē o loo iai le faamoemoe faalelalolagi. E mafai ona toe mou ese atu le uluai faatuatuaga sa iai pe a lē atiina ae. Maeu le tāua tele o lo tatou faaauau ona sailia le poto saʻo, ona faamalosia ai lea o le faavae o loo fafau aʻe ai lo tatou faatuatuaga!

17. Aisea e mafai ai ona tatou faatuatuaina, o le a faamasino ma le tonu Iesu e tusa ai o le mataupu i le faasaoina?

¹⁷ Ua lē o toe umi ona iloiloina lea e Keriso nuu uma ina ia mafai ona ia ‘tuueseeseina o i latou, e pei o le leoleo mamoe ona tuueseeseina o mamoe ma ʻoti.’ (Mataio 25:31-33) E mafai ona tatou faatuatuaina o le a amiotonu Keriso i le faamasinoina po o ai e tatau i ai le faasaoina. Ua tuuina atu e Ieova ia te ia le atamai, le poto, ma isi uiga talafeagai ina ia “faamasinoina ai le lalolagi ma le tonu.” (Galuega 17:30, 31) Tau ina ia pei lo tatou talitonuga mautinoa o lea sa ia Aperaamo, o lē na faapea mai: “Ia mamao lava ia te oe [Ieova] ona e faia faapea e fasioti i e amiotonu faatasi ma e amio leaga; ma ona faagatusa e amiotonu ma e amio leaga, ia mamao lava lea ia te oe. O le na te faamasinoina le lalolagi uma, e le faia ea e ia le faamasinoga tonu?”—Kenese 18:25.

18. Aisea e lē tatau ai ona tatou soona popole i mea atonu tatou te lē o iloaina i le taimi nei?

¹⁸ I le faatuatuaina atoatoa o le amiotonu a Ieova, e lē manaomia ai ona tatou popole e saili ni tali i fesili e pei o le: ‘O le a faapefea ona faamasinoina pepe ma tamaiti laiti? Faamata o le a iai se vaega toatele o tagata e oo mai lava Amaketo e lei oo atu i ai le tala lelei? Ae faapefea tagata o ē e lē atoatoa o latou mafaufau? Ae faapefea . . . ?’ Ioe, i le taimi nei atonu tatou te lē iloa le auala o le a foia ai e Ieova nei mataupu. Peitai, o le a ia foiaina lava, i se auala amiotonu ma le alofa mutimutivale. E lē tatau lava ona tatou masalosalo i lena mea. O le mea moni, tatou te ono maofa ma fiafia e vaavaai atu a o ia foiaina nei mea i se auala atonu e lei tau i ai o tatou mafaufau.—Faatusatusa i le Iopu 42:3; Salamo 78:11-16; 136:4-9; Mataio 15:31; Luka 2:47.

19, 20. (a) Aisea e lē sese ai le fesiligia o ni fesili talafeagai? (e) O afea o le a aumaia ai e Ieova tali manaomia?

¹⁹ E lē o faasā mai e le faalapotopotoga a Ieova fesili e faia ma le faamaoni, ma o fesili talafeagai, e pei ona tuuaʻia sese ai e nisi tagata tetee. (1 Peteru 1:10-12) Peitai, o loo fautua mai le Tusi Paia ina ia tatou alofia fesili valea, pei e masalosalo. (Tito 3:9) O le fesiligia o fesili talafeagai ma le saili atu i le Afioga a le Atua ma lomiga faa-Kerisiano ina ia maua ai ni tali faale-Tusi Paia, e mafai ona faateleina ai lo tatou poto saʻo ma faamalosia ai lo tatou faatuatuaga ia Ieova. O loo mulimuli atu le faalapotopotoga i le faaaoaoga a Iesu. Sa lei faia atu sona manatu i fesili sa lei oo mai le taimi talafeagai mo le taliina. Na ia faamalamalama atu: “Ua totoe ia te au mea e tele e fai atu ai ia te outou, a e tou te le mafaia ona talia i nei ona po.” (Ioane 16:12) Na ia taʻutino foi faapea e iai nisi mea e oo lava ia te ia sa ia lē iloa le tali i lena taimi.—Mataio 24:36.

²⁰ O loo tele pea mea e ao ona faaalia mai e Ieova. Maeu le atamai o le faatalitali atu ia te ia, i le faatuatua faapea o le taimi mo le faaalia mai o ana fuafuaga o le a saʻo lelei mo le faamalieina o manaoga o lena taimi tatau. Tatou te faatuatuaina faapea e taunuu loa le taimi atofaina a Ieova, ona tatou olioli ai lea i le mauaina o se malamalamaga faaopoopo i ona ala. Ioe, o le a tauia i tatou, i le iloa o loo tatou faaalia le matuā maufaatuatuaina o Ieova ma le faalapotopotoga o loo ia faaaogaina. Ua faamautinoa mai e le Faataoto 14:26 ia i tatou e faapea: “O le mataʻu ia Ieova, o i ai le faatuatuaga malosi; o i ai foi le malu mo lana fanau.”

[Faaopoopoga i lalo]

O le ā Sou Manatu?

◻ Aisea e lē atamai ai le faataga o faalogona ootia e faavaivaia ai lo tatou maufaatuatuaina o Ieova?

◻ O le ā e mafai ona tatou aʻoaʻoina mai le mea na tupu ia Iona?

◻ Aisea e tāua tele ai le suesueina o le Tusi Paia ma le auai i sauniga?

[Ata i le itulau 16]

E tusa lava po o tatou faavauvau ona ua maliu sē e pele, e mafai ona tatou faatuatuaina faapea, e amiotonu Ieova

[Ata i le itulau 18]

Po o e mautinoa ea o tuu atu lou faatuatuaga ia Ieova?