E Mafai Ona Toe Maua le Maufaatuatuaina!

E UI lava o le faateleina nei o le lē maufaatuatuaina o se faailoga lea o “aso e gata ai,” ae o le leai o se maufaatuatuaina na manino mai lava le iai i le faitau afe o tausaga ua mavae. (2 Timoteo 3:1) Na muamua lava mapuna aʻe i se nofoaga sa ono lē faatalitalia e mapuna aʻe ai—i le parataiso. Ua faapea mai le Tusi Paia e faatatau i lea nofoaga: “Ua faia foi e Ieova le Atua o le faatoaga i Etena i sasae; ona ia tuuina lea i lea mea o le tagata na na faia. Ua faatutupuina foi e Ieova le Atua i le fanua o laau uma e matagofie i le vaai, e lelei foi pe a ʻaina; ma le laau o le ola i totonu o le faatoaga, ma le laau e iloa ai le lelei ma le leaga.”—Kenese 2:8, 9.

I fuaiupu o loo sosoo mai ua maua ai le malamalamaga i le sootaga o lenei mea ma le faateleina i ona po nei o le lē maufaatuatuaina. Ua tatou faitau ai: “Ua fetalai atu foi Ieova le Atua i le tagata, o loo faapea atu, O laau uma o i le faatoaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16, 17) Pe na iai ea ia Atamu se mafuaaga e masalosalo ai i le mea na fetalai ai Ieova?

Seʻi faaauau la tatou faitau: “Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga? Ona tali atu ai lea o le fafine i le gata, O fua o laau o le faatoaga ma te aai ai lava; a o le fua o le laau o i totonu o le faatoaga na fetalai mai ai le Atua, Aua ma te aai ai, aua foi ma te papai atu i ai, neʻi ma oti. Ona fai mai lea o le gata i le fafine, Lua te le oti lava; auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga. Ona vaai atu lea o le fafine i le laau e lelei lava pe a ʻai, ma ua matagofie mai, o le laau foi e aoga e maua ai le poto, ona tago ai lea o ia i lona fua, ma ʻai ai; na ia avatu foi i lana tane faatasi ma ia, na ʻai ai foi o ia.”—Kenese 3:1-6.

I le lē amanaia o le lapataiga manino a le Atua, na faaalia ai e Atamu ma Eva lo la lē maufaatuatuaina o Ieova. Na faataitai i laʻua i le fili o le Atua, o Satani, lea na tautala ane ia Eva e ala i se gata moni. Sa lē faatuatuaina e Satani le ala e pule ai Ieova. Talu ai lenei mea, faatasi ai ma lona loto mimita ma le faamaualuga, na ia fouvale ai i le Atua ma taitaiseseina tagata e faia le mea lava lena. Na ia taaʻina i latou ia mafaufau faapea e lē tatau ona maufaatuatuaina le Atua.

O le ā le Iuga? O Faiā Faigata

Atonu e te matauina, o tagata latou te lē faatuatuaina isi e faigata lava ona latou faatumauina ni faigauo. Na tusi mai Publilius Syrus, o se tusitala Latina o le uluai senituri T.L.M., e faapea: “O le maufaatuatuaina e na o le pau lea o le fusi e fusia ai faigauo.” E ala i a la gaoioiga fouvale, na faaalia ai e Atamu ma Eva lo la lē faatuatuaina o le Atua. O lea, ua mautinoa ai le leai o se mafuaaga e faatuatuaina ai i laua e le Atua. Ona o le malepe o le maufaatuatuaina, na iu ai ina lē toe maua e uluai tagata le faauoga a le Atua. E leai se faamaoniga e taʻu mai ai faapea na toe talanoa atu Ieova ia i laua ina ua uma ona ia faamalaiaina i laua ona o le la fouvale.

Na pagatia foi le faiā i le va o Atamu ma Eva. Na lapatai Ieova ia Eva: “E te fanau mai tama ma le tiga; e uai atu lou manao i lau tane, e pule foi o ia ia te oe.” (Kenese 3:16) Ua faapea mai le Jerusalem Bible: “O le a aliitai o ia ia te oe.” Nai lo le faatinoina ma le alofa o le tulagaulu i lana avā, e pei ona sa finagalo ai le Atua, ae ua avea nei Atamu ma ona pule, e aliitai ia te ia.

Ina ua la faia le agasala, sa taumafai Atamu e tuuaʻia lana avā. I lona manatu, o le mea na faia e lana avā na māfua ai ona tuuesea i laua mai le faatoaga lelei atoatoa ae tutuli atu i se lalolagi lafulafuā, ua faasalaina e fai ma pologa i tulaga lē lelei atoatoa a o la lei toe foi atu i le efuefu. (Kenese 3:17-19) E mafai ona tatou vaai faalemafaufau atu i lenei mea o le puna lena o feteenaiga i le va o i laua. Atonu pe ua soona inainā Atamu, ma faapea atu e lē tāitai ona ia toe faalogo atu ia Eva. Atonu sa ia lagona e saʻo lona faapea atu ia Eva, ‘E amata atu i le taimi nei, o aʻu le pule!’ Ae o Eva foi ia i se isi itu, atonu ua vaai atu ua lē taulau ona faatino e Atamu lana tiute tauave o le ulu o le aiga, ona māfua ai lea ona ia lē toe maufaatuatuaina Atamu. Po o le ā lava le tulaga na iai, ae o le faaalia o le lē maufaatuatuaina o le Atua, na lē toe maua ai e tagata le latou faauoga ma ia ma faaleagaina ai a latou lava faiā o le tasi i le isi.

O Ai e Mafai Ona Tatou Faatuatuaina?

E lē o tagata uma ua tatau i ai lo tatou maufaatuatuaina, e pei ona faataitai mai e le faaaoaoga a Atamu ma Eva. E mafai faapefea ona tatou iloa po o ai e tatau i ai pe e lē tatau i ai lo tatou maufaatuatuaina?

Ua fautua mai le Salamo 146:3 ia i tatou: “Aua tou te faatuatua i alii, po o le fanau a tagata, e le o i ai se olataga.” Ma i le Ieremia 17:5-7, tatou te faitau ai: “Ia malaia le tagata e faatuatua i tagata, ma ua fai tagata mona lima a ua liliu ese lona loto ia Ieova.” Ae i le isi itu, “amuia le tagata o lē faatuatua ia Ieova, o le ua fai Ieova mona faatuatuaga.”

Ua ioeina, e lē sese i taimi uma le tuu atu o le faatuatuaga i tagata. Na pau le manatu o loo faatulai mai e na mau e faapea, e lē tāitai ona iai se mea e suia le maufaatuatuaina o le Atua, peitai o le tuu atu o le faatuatuaga i tagata lē lelei atoatoa e iai taimi e mafai ona iu ai i tulaga faigata. Mo se faaaoaoga, o tagata o loo faatuatua atu i isi tagata mo le ausiaina o mea e na o le Atua e mafaia—le saunia mai o le olataga ma le aumaia o le filemu atoatoa ma le saogalemu—ua iu atu i le lē fiafia.—Salamo 46:9; 1 Tesalonia 5:3.

O le mea moni, e na o le pau le mafuaaga o le a talafeagai ai ona maufaatuatuaina tagata ma faalapotopotoga a tagata pe afai latou te gaoioi e ogatusa ma fuafuaga a le Atua ma faaalia mai mataupu silisili faale-Atua. O lea, pe afai tatou te fia faagaee isi ina ia latou maufaatuatuaina i tatou, e tatau ona tatou tautala i le upu moni, ia faamaoni ma faatuatuaina. (Faataoto 12:19; Efeso 4:25; Eperu 13:18) Seʻi vaganā ua tatou amioai e ogatusa ma mataupu silisili o le Tusi Paia, ona saʻo lea o le faatuatuaina o i tatou e isi ma avea ai ma puna o le fefaamalosiaiga ma fefaalaeiauaiga.

Le Toe Mauaina o le Maufaatuatuaina

Ua iai i Molimau a Ieova se faavae mausalī latou te maufaatuatuaina ai le Atua ma faalaeiauina isi ia faia foi faapea. O Ieova e faamaoni ma alofa faamaoni, o lē e mafai ona faatuatuaina i taimi uma e na te faia ai mea na ia fetalaia, auā “e le mafai ona pepelo . . . le Atua.” O se maufaatuatuaina e tuu atu i le Atua o le alofa e lē tāitai ona oo i ni tiga.—Eperu 6:18; Salamo 94:14; Isaia 46:9-11; 1 Ioane 4:8.

O tagata ua autasi i lo latou maufaatuatuaina o Ieova ma ola e tusa ai o ana mataupu silisili ua uunaia malosi i latou e faaalia le maufaatuatuaina e le tasi o le isi. A o iai i se lalolagi o loo pagatia i le faateleina o le lē maufaatuatuaina, e maeu se olioli i le mauaina o ni tagata o ē e maufaatuatuaina! Seʻi manatu i se eseesega na semanū e iai le lalolagi pe ana mafai ona tatou faatuatuaina atoatoa mea e fai mai ai pe faia e so o se tasi! O le tulaga lena o le a iai i le lalolagi fou o loo fotuai mai lea na folafola e le Atua. E lē tāitai ona toe iai se faateleina o le lē maufaatuatuaina!

Pe e te fia soifua ai ea la? Afai o lea, ua valaauliaina oe e Molimau a Ieova ina ia faamalosia lou maufaatuatuaina o le Atua ma ana folafolaga e ala i lou aʻoaʻoina atili e uiga i mea o loo ia faafinagaloina mo le olaga. O le suesueina o le Tusi Paia e maua ai faamaoniga faapea o loo soifua le Atua, o loo naunau mai o ia mo le lelei o tagata, ma ua lē o toe mamao ona ia gaoioi lea e faasaʻoina faafitauli o le lalolagi e ala mai i lona Malo. E faitau miliona tagata ua latou iloa e tatau ona latou maufaatuatuaina le Atua ma lana Afioga, le Tusi Paia. O le a fiafia Molimau a Ieova e faataitai atu ia te oe le auaunaga lautele, o se suesuega faale-Tusi Paia o loo latou ofo fua atu e aunoa ma se totogi. Po o le tusi atu foi i ē o lomiaina lenei mekasini mo ni faamatalaga atili.

[Faamatalaga faaopoopo i le itulau 5]

O le lē faatuatuaina o le Atua e iu ai i faiā faaletagata ua faaleagaina

[Faamatalaga faaopoopo i le itulau 6]

E na o le pau le mafuaaga e tatau ai ona maufaatuatuaina tagata pe afai latou te gaoioi e ogatusa ma mataupu silisili faale-Atua