Ia Pipii Atu i le Faatiokarate

“O Ieova o lo tatou faamasino ia, o Ieova o lo tatou fai tulafono, o Ieova o lo tatou tupu.”—ISAIA 33:22.

1. Aisea ua avea ai le mataupu tau i faiga malo o se popolega i le tele o tagata?

UA AVEA le mataupu tau i faiga malo o se popolega tele i tagata uma. O se faiga malo lelei e aumaia ai le filemu ma le manuia. Ua taʻua e le Tusi Paia: “E faatumauina le nuu e le tupu i le faamasinoga.” (Faataoto 29:4) Ae i le isi itu, o se faiga malo e leaga e māfua mai ai le lē faamasinotonu, faiga piopio, ma faiga e omia ai tagata. “A pule ē amio leaga, ua mapuitiga le nuu.” (Faataoto 29:2) A o faagasolo le talafaasolopito, ua taumafai tagata e faataitaia le tele o ituaiga o faiga malo, ae o se mea e faanoanoa ai, ua masani ona latou “mapuitiga” ona o faiga sauā mai o latou taʻitaʻi. (Failauga 8:9) Po o le a iai ea se faiga malo e taulau i le aumaia o le faamalieina tumau i ona tagatānuu?

2. Aisea ua avea ai le “faatiokarate” o se faaupuga fetaui e faamatala ai le faiga malo a Isaraelu anamua?

² Na taʻua e le tusitala o talafaasolopito, o Josephus, se faiga malo e tutasi lava ina ua ia tusi: “O nisi tagata ua latou tuu atu le pule faapolotiki i malo ia e pulea e se tupu, o isi ua faalagolago i malo e pulea e se vaega toaitiiti o ni tagata, a o isi foi ua faalagolago i ni faiga malo e faia aʻe i tagata lautele. Peitai, e aunoa ma se tasi o nei faiga malo na faanaunau i ai lē [Mose] na aumaia ia i tatou le tulafono, peitai na ia tuuina atu i ana tulafono faavae le ituaiga o faatulagaga lea—pe afai e faaaogā i ai se faaupuga e lē masani ai—e mafai ona taʻua o le ‘faatiokarate,’ o le tuu atu lea o le pule silisiliese ma le aiā uma i aao o le Atua.” (Against Apion, II, 164-165) E tusa ai o se faamatalaga a le lomifefiloi o le Concise Oxford Dictionary, o le faatiokarate o lona uiga “o se ituaiga o faiga malo e pulea mai e le Atua.” E lē o iai lea upu i le Tusi Paia, ae o loo faamatalaina lelei ai le faiga malo a Isaraelu anamua. E ui sa oo ina iai se tupu vaaia o le fanauga a Isaraelu, ae o lo latou pule moni lava o Ieova. Na faapea mai le perofeta Isaraelu o Isaia: “O Ieova o lo tatou faamasino ia, o Ieova o lo tatou fai tulafono, o Ieova o lo tatou tupu.”—Isaia 33:22.

O le ā le Faatiokarate Moni?

3, 4. (a) O le ā le faatiokarate moni? (e) I se aso ua lē o toe mamao, o ā faamanuiaga o le a aumaia e le faatiokarate i le fanau uma a tagata?

³ Talu mai le taimi na fafau ai e Josephus le upu, e tele sosaiete o tagata ua faamatalaina faapea o ni faiga faatiokarate. O nisi o na sosaiete ua aliali mai ai pulega faaituau, le maelega lē tatau, le pepelo, ma le pule sauā. Po o ni faiga faatiokarate moni ea na? E leai pe a fua i le uiga na faaaogā ai e Josephus le upu. O le faafitauli, talu ai ua soona tala tele i tua le uiga o le upu “faatiokarate.” Ua faamatala e le tusi World Book Encyclopedia le upu faapea “o se ituaiga o faiga malo lea e pulea ai le setete e se ositaulaga po o ni ositaulaga, ma ua iai i tagata uma o le faiva faaositaulaga le aiā i mataupu lautele ma mataupu faalelotu.” Peitai, o le faatiokarate moni, e lē pulea e ositaulaga. O le mea moni lava o le Atua e pulea, o se faiga malo a Lē na Foafoaina le vateatea aoao, o Ieova le Atua.

⁴ I se aso ua lē o toe mamao, ona iai lea o le lalolagi atoa i lalo o le pulega faatiokarate, ma e maeu se faamanuiaga o le a iai! “E ia te i latou [le fanau a tagata] le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:3, 4) E leai se pulega faaositaulaga a ni tagata lē lelei atoatoa e mafai ona aumaia lena fiafiaga. E na o le pule a le Atua e mafai ai. O lea, e lē taumafai Kerisiano moni e faatino le faatiokarate e ala i ni faiga faapolotiki. Latou te faatalitali ma le onosai i le Atua na te faavaeina le faatiokarate i le lalolagi aoao i lana lava taimi ma i lana lava auala.—Tanielu 2:44.

5. O fea o loo faagaoioia ai le faatiokarate moni i aso nei, ma o ā fesili ua lāgā e faatatau i ai?

⁵ Peitai, i le taimi nei, o loo faagaoioia ai se faatiokarate moni. I fea? Ia i latou o loo loto malilie e gauai i le pule a le Atua ma felagolagomai faatasi e faia lona finagalo. O na tagata faamaoni ua aoaoina o se “nuu” faaleagaga i le lalolagi aoao i lona ‘laueleele’ faaleagaga. O i latou o ē o loo totoe o “le Isaraelu [a] le Atua” faatasi ai ma le silia i le lima ma le ʻafa miliona o a latou aumea Kerisiano. (Isaia 66:8; Kalatia 6:16) E gauai i latou nei ia Iesu Keriso, le Tupu faalelagi ua faapaleina e Ieova le Atua, “le Tupu o le vavau.” (1 Timoteo 1:17; Faaaliga 11:15) I le ā le itu ua faatiokarate ai lenei faalapotopotoga? O le ā le manatu o ona tagata i le pule a faiga malo a le lalolagi? Ma ua faapefea ona tausisia le mataupu silisili o le faatiokarate e tagata o loo faatinoina le pulega i totonu o lo latou nuu faaleagaga?

Se Faalapotopotoga Faatiokarate

6. E mafai faapefea i se faalapotopotoga vaaia faaletagata ona pulea mai e le Atua?

⁶ E mafai faapefea i se faalapotopotoga faaletagata ona pulea mai e Ieova, o lē o loo afio i le lagi lē vaaia? (Salamo 103:19) E mafai auā e mulimuli atu i latou o loo auaufaatasi ai, i le fautuaga faagaeeina: “Ia e faatuatua ia Ieova ma lou loto atoa; a e aua le faalagolago i lou lava atamai.” (Faataoto 2:6; 3:5) Latou te faatagaina le Atua e puleaina i latou a o latou usitaia “le tulafono a Keriso” ma faatatauina mataupu silisili faagaeeina a le Tusi Paia i o latou olaga i aso faisoo. (Kalatia 6:2; 1 Korinito 9:21; 2 Timoteo 3:16; tagai i le Mataio 5:22, 28, 39; 6:24, 33; 7:12, 21.) Ina ia faia lenei mea, e tatau ona avea i latou ma tagata aʻoga o le Tusi Paia. (Salamo 1:1-3) I le pei o tagata Perea “amio lelei” o aso anamua, latou te lē mulimuli atu i ni tagata, ae saili atu pea i le Tusi Paia mo le faamautinoaina o mea o loo latou aʻoaʻoina. (Galuega 17:10, 11; Salamo 119:33-36) Latou te tatalo e pei o le faisalamo: “Ia e aʻoaʻo mai ia te au i le faautauta lelei ma le poto; auā ua ou faamaoni i au poloaiga.”—Salamo 119:66.

7. O le ā le faasologa o tulaga tau i le taitaiga i totonu o le pulega faatiokarate?

⁷ I faalapotopotoga taitasi, e tatau ona iai nisi e faatinoina le pule pe saunia taiala. Ua faapena foi Molimau a Ieova, ma o loo latou usitaia le faatulagaga tau pule lea na faataatia mai e le aposetolo o Paulo: “O le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.” (1 Korinito 11:3) I le ogatusa ma lenei mea, ua na o tane agavaa e auauna o ni toeaina i faapotopotoga. Ma e ui lava o Iesu—“le ulu o tane taitoatasi”—o loo i le lagi, ae o loo iai pea i le lalolagi “i latou ua totoe” o ona uso faauuina, o loo iai le faamoemoe e pule faatasi ma ia i le lagi. (Faaaliga 12:17; 20:6) O i latou nei o loo faia aʻe ai le vaega tuufaatasi o le “auauna faamaoni ma le mafaufau.” E faaalia e Kerisiano lo latou gauai ia Iesu, ma lē ua avea ma ulu o Iesu, o Ieova lea, e ala i le talia o le taitaiga a lena “auauna.” (Mataio 24:45-47; 25:40) I lenei auala, ua maopoopo lelei ai le faatiokarate. “O le Atua, e le o le Atua ia o le faasoesa [“lē maopoopo,” NW], a o le filemu.”—1 Korinito 14:33.

8. Ua faapefea ona lagolagoina e toeaina Kerisiano le mataupu silisili o le faatiokarate?

⁸ E lagolagoina e toeaina Kerisiano le mataupu silisili o le faatiokarate auā ua latou iloa e iai lo tatou tiute tauave ia Ieova i le auala e faatinoina ai le pule faatapulaaina ua ia i latou. (Eperu 13:17) Ma i le faia o faaiuga, latou te faalagolago atu ai i le atamai o le Atua, ae lē o so latou lava poto. O le itu lenei ua latou mulimuli ai i le faaaoaoga a Iesu. O ia o le tagata e silisili ona atamai i tagata uma na soifua mai. (Mataio 12:42) Ae ui lava i lea, na ia fetalai atu i tagata Iutaia: “E le mafai e le Atalii ona fai o se mea, na o ia lava; a o mea na te vaai atu i le Tamā o faia.” (Ioane 5:19) O loo iai foi i toeaina le uiga lea sa iai i le tupu o Tavita. Na ia faatinoina se pulega tele i le faatiokarate. Peitai, sa ia manao e mulimuli i le ala a Ieova, ae lē o lona lava ala. Na ia tatalo: “Ieova e, ia e aʻoaʻo mai ia te au i lou ala, ma taʻitaʻi ia te au i le ala laulelei.”—Salamo 27:11.

9. E tusa ai o faamoemoe ma faaeaga eseese o le auaunaga i le pulega faatiokarate, o le ā le vaaiga paleni ua iai i Kerisiano tuuina atu?

⁹ Ua fesiligia e nisi pe faamata o se mea fetaui le faatinoina o le pule i totonu o le faapotopotoga e na o tane agavaa, po o le faamata foi o se mea fetaui le iai i nisi Kerisiano o le faamoemoe faalelagi a o isi le faamoemoe faalelalolagi. (Salamo 37:29; Filipi 3:20) Peitai o Kerisiano tuuina atu, ua latou talisapaia o faatulagaga nei ua uma ona faatulaga mai i le Afioga a le Atua. O ni faatulagaga e faatiokarate. Pe afai e fesiligia, e masani lava e fesiligia e i latou o ē lē iloa mataupu silisili o le Tusi Paia. E lē gata i lea, ua iloa e Kerisiano, e tutusa uma tane ma fafine i le silafaga a Ieova, i le tulaga o le faaolataga. (Kalatia 3:28) Mo Kerisiano moni, o le avea ma tagata tapuai a Lē Pule Silisiliese i le aoao o mea o se faaeaga e sili ona maualuga, ma ua latou fiafia ai e galulue i le po o lē fea lava vaega ua faatulaga e Ieova mo i latou. (Salamo 31:23; 84:10; 1 Korinito 12:12, 13, 18) E lē gata i lea, o le ola e faavavau, pe i le lagi po o luga i le lalolagi parataiso, o se faamoemoe ua matuā ofoofogia lava.

10. (a) O le ā le uiga lelei na faaalia e Ionatana? (e) E faapefea ona faaalia e Kerisiano i aso nei le uiga lena sa ia Ionatana?

¹⁰ O lea, ua faapei ai Molimau a Ieova o Ionatana, le atalii sa mataʻu i le Atua, o le tupu o Saulo. E mautinoa sa ono avea Ionatana o se tupu e sili ona lelei. Peitai, ona o le lē faamaoni o Saulo, na filifilia ai e Ieova Tavita e avea ma tupu lona lua o Isaraelu. Pe na matauʻa ea Ionatana i lenei mea? E leai. Sa oo ina avea o ia o se uo lelei a Tavita ma na ia puipuia foi Tavita mai ia Saulo. (1 Samuelu 18:1; 20:1-42) I se uiga talitutusa, o ē o loo iai le faamoemoe faalelalolagi latou te lē lotovale i ē ua iai le faamoemoe faalelagi. Ma e lē lotovale foi Kerisiano moni ia i latou o loo faatinoina le pule faatiokarate i totonu o le faapotopotoga. Nai lo lea, latou te “matuā mānatua i latou ma le alofa,” i le amanaiaina o a latou galuega mamafa mo le lelei o o latou uso ma tuafāfine faaleagaga.—1 Tesalonia 5:12, 13.

Le Vaaiga Faatiokarate i Pule Faalelalolagi

11. O le ā le vaaiga e tatau ona iai i Kerisiano o loo gauai atu i pulega faatiokarate e faatatau i faipule silisili faalelalolagi?

¹¹ Pe afai o loo i lalo Molimau a Ieova i se pulega faatiokarate, le pulega a le Atua, e faapefea la sa latou vaaiga i pule faaleatunuu? Na fetalai Iesu faapea o ona soo o le a “le so le lalolagi” i latou. (Ioane 17:16) Peitai, e amanaia e Kerisiano lo latou nofo aitalafu ia “Kaisara,” po o faiga malo a le lalolagi. Na fetalai Iesu faapea “o mea a Kaisara, ia [latou] avatu ia Kaisara; a o mea a le Atua ia avatu ia i le Atua.” (Mataio 22:21) E tusa ai ma le Tusi Paia, o faiga malo a tagata ua (“tu i o latou tulaga faatatau o iai nei ona o le Atua.” NW) O Ieova, le Puna o pule uma, ua ia faataga faiga malo ina ia iai, ma na te faatalitalia na faiga malo ia latou faia mea lelei mo tagata o loo latou puleaina. Pe a latou faia faapena, ona avea lea o i latou ma “auauna . . . a le Atua.” Ua usitai Kerisiano i le faiga malo a le atunuu o loo latou nonofo ai “ona o [o latou] loto fuatia ifo.” (Roma 13:1-7) O le mea moni, pe afai e tāpā mai e le faiga malo se mea e feteenai ma le tulafono a le Atua, e tatau la i Kerisiano ona “anaana i le Atua i lo [latou] anaana i tagata.”—Galuega 5:29.

12. Pe a sauāina Kerisiano e faipule silisili, o le faaaoaoga a ai latou te mulimuli atu i ai?

¹² Ae faapefea pe a sauāina Kerisiano moni e faipule silisili faalemalo? Ona latou mulimuli lea i le faaaoaoga a uluai Kerisiano, o ē na onosaia ni vaitaimi o sauaga ogaoga. (Galuega 8:1; 13:50) O nei tofotofoga o le faatuatua e lē faapea sa lei faatalitalia, auā sa valoia e Iesu o le a oo mai. (Mataio 5:10-12; Mareko 4:17) Peitai, sa lei taui ma sui na uluai Kerisiano i ē na sauāina i latou; sa lei vāivai ai foi lo latou faatuatua i na omiga. Na i lo lea, sa latou mulimuli atu i le faaaoaoga a Iesu: “O le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu.” (1 Peteru 2:21-23) Ioe, sa manumalo mataupu silisili faa-Kerisiano i lagona ita na uunaia e Satani.—Roma 12:21.

13. Ua faapefea ona tali atu Molimau a Ieova i sauāga ma faiga taufaaleaga o loo faasagasaga mai ia i latou?

¹³ O le tulaga foi lena i aso nei. A o faagasolo lenei senituri, ua matuā mafatia ai Molimau a Ieova i taʻitaʻi sauā—e pei lava ona sa valoia mai e Iesu. (Mataio 24:9, 13) I nisi atunuu, ua faasalalau atu ai ni pepelo ma ni tuuaʻiga sese e i latou o loo taumafai e uunaia faipule silisili e tetee i nei Kerisiano faamaoni. Peitai, e ui lava i lena “taʻuleagaina,” ae o loo faaauau pea e Molimau ona faailoa atu i latou o ni faifeau a le Atua, e ala i a latou amio lelei. (2 Korinito 6:4, 8) Pe afai e mafai, latou te tuuina atu la latou mataupu i sui o malo ma luma o faamasinoga a le atunuu, ina ia faaali atu ai lo latou mamā mai le faia o se mea sese. Latou te faaaogā so o se avanoa ua latou maua e puipuia ai faalauaitele le tala lelei. (Filipi 1:7) Ae pe afai ua latou faia mea uma latou te mafaia e tusa ai ma le tulafono, ona latou tuu atu lea o mataupu i aao o Ieova. (Salamo 5:8-12; Faataoto 20:22) Pe afai e manaomia, ona latou pei lea o uluai Kerisiano, e lē fefefe e faatigaina ona o le amiotonu.—1 Peteru 3:14-17; 4:12-14, 16.

Ia Faamuamua le Viiga o le Atua

14, 15. (a) O le ā e silisili ia i latou o loo lagolagoina le mataupu silisili o le faatiokarate? (e) O le ā le mea na tupu na faataatia ai e Solomona se faaaoaoga lelei o le lotomaulalo i lona tulaga i le avatua o le taitaiga?

¹⁴ Ina ua aʻoaʻo e Iesu ona soo e tatalo, o le mea muamua lava na ia taʻua o le faapaiaina o le suafa o Ieova. (Mataio 6:9) I le ogatusa ma lenei mea, ua sailia ai e i latou o loo ola i le pulega faatiokarate le viiga o le Atua, ae lē o o latou lava viiga. (Salamo 29:1, 2) Ua taʻu mai e le Tusi Paia faapea i le uluai senituri, sa avea ai lenei mataupu o se mea e faasalaveia ai nisi o ē na latou mumusu e mulimuli atu ia Iesu talu ai sa “sili lo latou manao i le viiga mai tagata,” sa latou mananao e viiviia mai i latou e tagata. (Ioane 12:42, 43) O le mea moni, e manaomia ai le lotomaulalo ina ia faamuamua Ieova i le olaga o se tasi nai lo lona lava fia tāua.

¹⁵ Sa faaalia e Solomona se uiga lelei i lenei itu. Seʻi faatusatusa ana upu i le taimi na faapaia ai le malumalu sili ona matagofie na ia fausia, ma upu a Nepukanesa e faatatau i ona fale tetele na fausia. I le faamaualuga faaviivii, na mitai mai ai Nepukanesa e faapea: “E le o Papelonia tele ea lenei, na aʻu faia i loʻu malosi tele lava, e fai ma fale o le malo, ia viia ai foi loʻu mamalu?” (Tanielu 4:30) Ae i se faaeseesega, sa lotomaulalo Solomona ma na te lei faamamafaina se mea ua ia faataunuuina, i le faapea mai: “Pe moni ea e afio le Atua ma tagata i le lalolagi? Faauta, o le lagi ma le lagi o lagi e le ofi ai oe; e le atili ai ea ona ē le ofi i lenei fale ua ou faia?” (2 Nofoaiga a Tupu 6:14, 15, 18; Salamo 127:1) Sa lei faaneeneeina e Solomona ia lava. Sa ia iloa ua na o ia o se sui o Ieova, ma na tusi mai: “A sau le faamaualuga, ona sau ai lea o le mā; a o i ai le poto i e faamaulalo.”—Faataoto 11:2.

16. Ua faamaonia faapefea o toeaina o se faamanuiaga moni i lo latou lē viiviia o i latou lava?

¹⁶ Ua faapena foi i toeaina Kerisiano ona latou faaneenee atu ia Ieova, ae lē o i latou lava. Ua latou mulimuli i le fautuaga a Peteru: “Afai e auauna se tasi, ia tusa ma le malosi ua foaiina mai e le Atua, ina ia viia le Atua i mea uma lava, ona o Iesu Keriso.” (1 Peteru 4:11) Sa lei faamatalaina e le aposetolo o Paulo le “faiva o le epikopo [“ovasia,” NW]” faapea o se tulaga tāua e lauiloa ai, peitai o se “galuega lelei.” (1 Timoteo 3:1) Ua tofia toeaina e auauna, ae lē ia pule. O i latou o faiaʻoga ma leoleo i le lafu mamoe a le Atua. (Galuega 20:28; Iakopo 3:1) O toeaina lotomaulalo, ma faataulagaina i latou lava, o se faamanuiaga moni i le faapotopotoga. (1 Peteru 5:2, 3) “Ia faapelepeleina e outou e ua faapea,” ma ia faafetaia Ieova ona ua saunia mai le toatele o toeaina agavaa latou te sapasapaia le faatiokarate i nei “aso e gata ai.”—Filipi 2:29; 2 Timoteo 3:1.

‘Ia Faaaʻoaʻo i le Atua’

17. I ā auala ua faataitai atu ai i le Atua i latou o ē o loo i le pulega faatiokarate?

¹⁷ Na faalaeiau le aposetolo o Paulo: “Ia faaaʻoaʻo outou i le Atua, faapei o le fanau pele.” (Efeso 5:1) Ua taumafai i latou o ē gauai atu i le pulega faatiokarate ina ia faapei o le Atua i se tele e mafai ai i le tulaga o ni tagata lē lelei atoatoa. Mo se faaaoaoga, fai mai le Tusi Paia e uiga ia Ieova: “O le Papa, e sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio saʻo lava ia.” (Teuteronome 32:3, 4) Ina ia faataitai i le Atua i lenei vala, e saili ai e Kerisiano le faamaoni, le amiotonu, ma se uiga paleni o le faamasinotonu. (Mika 6:8; 1 Tesalonia 3:6; 1 Ioane 3:7) Latou te alofia mea e tele o loo taliaina e le lalolagi, e pei o amioga lē mamā, le losilosi, ma le matapeapea. (Efeso 5:5) Talu ai e mulimuli auauna a Ieova i tapulaa a le Atua ae lē o tapulaa a tagata, ua avea ai lana faalapotopotoga o se faalapotopotoga e faatiokarate, e mamā, ma lelei.

18. O le ā le uiga sili o le Atua, ma ua faapefea ona faaatagia mai e Kerisiano lenei uiga?

¹⁸ O le uiga sili o Ieova le Atua o le alofa. Ua faapea mai le aposetolo o Ioane, “o le Atua, o le alofa lava ia.” (1 Ioane 4:8) Talu ai o le faatiokarate e uiga i le pulea mai e le Atua, o lona uiga la ua pulea e le alofa. Na fetalai Iesu: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Ua faaalia e le faalapotopotoga faatiokarate se alofa mataina i nei aso faigata o aso e gata ai. A o faagasolo fevesiaiga i le va o ituaiga i Aferika, sa faaalia e Molimau a Ieova le alofa i tagata uma, e tusa lava po o le ā le ituaiga e iai. I le taimi o taua i le atunuu na taʻua muamua o Yugoslavia, sa fesoasoani ai Molimau a Ieova mai vaipanoa uma, o le tasi i le isi, a o isi vaega faalotu sa latou saosaolaumea i le mea na taʻua o le tafiesea o se ituaiga e ala i le fasiotia. I le tulaga o le tagata lava ia, e taumafai ai Molimau a Ieova e usitaia le fautuaga a Paulo: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu faaleaga, atoa ma le loto leaga uma lava. A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.”—Efeso 4:31, 32.

19. O ā faamanuiaga e maua mai i le taimi nei ma i le lumanai e i latou e gauai atu i le faatiokarate?

¹⁹ O i latou e gauai i le faatiokarate o loo olioli i faamanuiaga sili. Ua latou maua le filemu ma le Atua ma o latou uso Kerisiano. (Eperu 12:14; Iakopo 3:17) Ua ia i latou se fuafuaga i le olaga. (Failauga 12:13) Ua latou maua se saogalemu faaleagaga ma se faamoemoe mautinoa mo le lumanai. (Salamo 59:9) O le mea moni, ua latou olioli i se muai faaāta mai o mea o le a iai pe a oo ina pulea tagata uma e le pulega faatiokarate. Ona faapea mai lea o le Tusi Paia, “latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.” (Isaia 11:9) Maeu se taimi faamamaluina o le a iai! Tau ina ia tatou faamautinoa uma so tatou nofoaga i lena Parataiso i le lumanai, e ala i le pipii mau atu nei i le faatiokarate.

Pe Mafai Ona E Faamatala?

◻ O le ā le faatiokarate moni ma o fea o loo maua ai i aso nei?

◻ Ua faapefea ona gauai atu tagata i le pulega faatiokarate i o latou olaga?

◻ O ā auala ua sailia ai e i latou uma o loo i le faatiokarate le viiga o le Atua nai lo so latou lava viiga?

◻ O ā nisi o uiga faale-Atua ua faataitaia e i latou o loo lagolagoina le faatiokarate?

[Ata i le itulau 17]

Sa faamuamua e Solomona le viiga o le Atua na i lo sona viiga