Le Uiga Fesuisuiaʻi o le “Faa-Kerisiano”—Pe Taliaina e le Atua?

SEʻI faapea ua e faatonuina se tagata tusiata na te tusia sou ata. Ina ua māeʻa lana galuega, ua e fiafia lava; ua matuā maua lelei e le ata ou foliga. Ua faaāta i lou mafaufau le matamata atu i lou ata o lau fanau, o a latou fanau, ma fanau a a latou fanau ma le mitamita tele.

Peitaʻi, i nisi o augatupulaga na mulimuli mai, ua manatu ai se tasi o ē na tupuga mai ia te oe faapea e lē manaia le tusi o foliga faapea ua amata ona tula le ulu i le ata, ona ia faaopoopo loa lea i ai o laulu. O le isi e lē fiafia i le foliga mai o le isu, ona tago foʻi lea o ia ua sui. Ona faapena ai lava lea ona faia isi “toe faaleleiga” a o faagasolo mai pea augatupulaga, seʻia oo ai lava ina itiiti ni vaega o ou foliga o toe iloa atu i le ata. Pe ana e silafia o le mea lea o le a tupu, o ā ni ou lagona na semanū e iai? E mautinoa e te matuā toʻatamai lava.

E faanoanoa lava, ona o le tala i lenei ata, e tutusa lelei ma le tala i le vaega ua taʻua o le lotu Kerisiano. E faaalia e talafaasolopito faapea, e leʻi leva talu ona maliliu atu aposetolo o Keriso, ae amata loa ona suia le uiga aloaia o le “Faa-Kerisiano,” e pei lava ona sa valoia mai e le Tusi Paia.—Mataio 13:24-30, 37-43; Galuega 20:30.a

O le mea moni, o se tulaga talafeagai le faatatauina o mataupu silisili o le Tusi Paia i aganuu ma augatupulaga eseese. E ese mai ai le mataupu o le suia o aʻoaʻoga a le Tusi Paia ina ia faafetaui atu i mafaufauga o loo taatele nei. Peitaʻi, o le mea tonu lava lena ua tupu. Mo se faaaʻoaʻoga, seʻi manatu i suiga ua faia i nisi o mataupu tāua.

E Faifaimea Faatasi Lotu ma Faiga Malo

Na aʻoaʻo mai Iesu faapea o lana pulega, po o le Malo, o se pulega faalelagi o le a faaumatiaina, i lana taimi atofaina, pulega uma faaletagata, ona pule ai lea i le lalolagi atoa. (Tanielu 2:44; Mataio 6:9, 10) O le a lē pule mai e ala i ni faiga faapolotiki a tagata. Na fetalai Iesu: “E le mai le lalolagi nei loʻu malo.” (Ioane 17:16; 18:36) O lea, a o usiusitaʻi atu soo o Iesu i tulafono, ae sa latou taumamao ese mai faiga faapolotiki.

Ae peitaʻi, e oo ane i le taimi o le Emeperoa Roma o Konesetatino i le senituri lona fa, ua toʻatele i latou e faapea mai o Kerisiano, ua lē onosai e faatalitali mo le toe taliu mai o Keriso ma le faavaeina o le Malo o le Atua. Na faifai mālie lava ona suia o latou uiga e faatatau i faiga faapolotiki. Ua faapea mai le tusi Europe—A History: “A o leʻi oo mai i taimi o Konesetatino, sa lē taitai ona saili Kerisiano i faiga malo [faapolotiki] e avea ma auala e faalautele atu ai a latou fuafuaga ma talitonuga. Ina ua mavae atu Konesetatino, ona faifaimea loa lea o le Faa-Kerisiano ma faiga faapolotiki.” Na oo ina avea le Faa-Kerisiano lea ua toe faatulaga, ma lotu aloaia “aoao,” po o le lotu “katoliko” a le Emepaea a Roma.

Ua taʻua e le encyclopedia o le Great Ages of Man e faapea, ona o lenei faiā mafana a le Lotu ma le Faiga Malo, o lea “e oo mai i le 385 T.A., i le na o le 80 tausaga talu ona mavae atu le sauāga tele mulimuli i Kerisiano, ua amata ona faaoo e le Lotu lava ia ana faasalaga i tagata na toe faamaamulu ese mai le lotu, ma na iai foʻi i ona taʻitaʻi lotu le pule lea sa toetoe lava tutusa ma le pule sa iai i emeperoa.” Ona amata ai lea o se vaitaimi ua suia faiga faaʻoleʻole i le faia o faiga sauā e avea ma auala e faaliliu ai tagata, e faapena foʻi i tagata talaʻi lotomaulalo sa iai i le uluai senituri, ua suia i taʻitaʻi lotu o ē sa faananau atu i tofi ma le pule. (Mataio 23:9, 10; 28:19, 20) Na tusia e le alii tusitala o talafaasolopito o H. G. Wells sana faamatalaga e faatatau i “eseesega tetele i le va” o le Faa-Kerisiano o le senituri lona fa “ma le aʻoaʻoga a Iesu le Nasareta.” O nei “eseesega tetele” na oo lava ina aafia ai aʻoaʻoga faavae e faatatau i le Atua ma Keriso.

Le Toe Faafoligaina o le Atua

Na aʻoaʻo atu e Keriso ma ona soo e faapea e na o le ‘toatasi le Atua o le Tamā ia,’ ma ua faamaʻoti mai i lona suafa totino o Ieova lea e 7,000 taimi o loo aliali mai ai i uluai manusikulipi o le Tusi Paia. (1 Korinito 8:6; Salamo 83:18) Na foafoaina Iesu e le Atua; o ia “o le ulumatua o foafoaga taʻitasi,” o le faamatalaga lea a le faaliliuga faa-Katoliko o le Tusi Paia, Douay Version mo le Kolose 1:15. O lea, i lona avea o sē na foafoaina, na taʻu saʻo mai ai e Iesu: “E sili loʻu Tama ia te au.”—Ioane 14:28.

Peitaʻi e oo mai i le senituri lona tolu, ua iai ni taʻitaʻi lotu sa malolosi a latou taaʻiga, sa matuā pele ia i latou le aʻoaʻoga o le tasitolu a le faifilosofia faapaupau mai Eleni o Palato, o i latou ia na amata ona latou toe faafoliga maia le Atua ina ia fetaui i ai le talitonuga faa-Tasitolu. I senituri na sosoo mai, sa faasilisilia ai ma le lē tatau e lenei aʻoaʻoga Iesu ina ia faatutusa atu ia Ieova ma taʻua le agaga paia o le Atua, po o le malosi galue, o se peresona.

E tusa ai o le faaaogāina e le lotu o le talitonuga faapaupau o le Tolutasi, ua faapea mai le New Catholic Encyclopedia: “O le talitonuga i le ‘tasi le Atua i Peresona e tolu’ sa leʻi mausalī lelei ona faavae, e mautinoa lava sa leʻi fesootaʻi lelei atu i le olaga faa-Kerisiano ma lona faatuatua, a o leʻi oo mai i le iʻuga o le senituri lona fa. Peitaʻi e mautinoa lava o le aʻoaʻoga faavae lenei sa taʻua muamua faapea o le aʻoaʻoga faa-Tasitolu. I Tamā Faaaposetolo sa iai, e augapiu ma se mafaufauga sa iai mo lena ituaiga o aʻoaʻoga.”

E faapena foʻi se faamatalaga a le Encyclopedia Americana e faapea: “Sa leʻi atagia mai ma le saʻo aʻiaʻi i le aʻoaʻoga o le Tasitolu i le lona fa o senituri, le aʻoaʻoga a uluaʻi Kerisiano e faatatau i le tulaga moni o le Atua; na i lo lea, sa atagia mai le see ese mai lenei aʻoaʻoga.” E taʻua e le Oxford Companion to the Bible le Tasitolu o se tasi o talitonuga mai le tele o “talitonuga faavae na fafau aʻe i se taimi mulimuli ane.” Peitaʻi, sa lē na o le Tasitolu se aʻoaʻoga faapaupau na taliaina ma faaaogā e le lotu.

Le Toe Faatulagaina o le Solu

Ua taatele le talitonuga i aso nei faapea, ua iai i tagata se solu e lē mafai ona oti, lea e ola pea pe a oti le tino. Ae pe e te silafia ea o lenei aʻoaʻoga a lotu o se mea foʻi na faaopoopo mulimuli ane i ai? Na faamautinoa mai e Iesu le upu moni a le Tusi Paia e faapea, o ē maliliu “latou te le iloa se mea,” o lona uiga, o loo momoe i latou. (Failauga 9:5; Ioane 11:11-13) O le a toe faafoisia mai le ola e ala i le toetū—‘se toe tū aʻe i luga’ mai le tulaga sa moe ai i le oti. (Ioane 5:28, 29) Pe ana fai e iai se solu e lē mafai ona oti, semanū e lē manaʻomia e lena solu se toetū, auā e lē manaʻomia le oti pe afai o loo i le tulaga o le lē mafai ona oti.

Na oo lava ina faataʻitaʻia mai e Iesu le aʻoaʻoga faale-Tusi Paia o le toetū e ala i lona toe faatutū aʻe o tagata mai le oti. Mo se faaaʻoaʻoga, o Lasalo, o lē na oti mo aso e fa. Ina ua toe faatū aʻe o ia e Iesu, sa alu aʻe i fafo Lasalo mai le tuugamau o se tagata ua ola, o loo mānavanava. E leai se solu e lē mafai ona oti na toe foʻi mai le parataiso faalelagi ma toe faaofi ifo i le tino o Lasalo ina ua toe ala aʻe o ia mai le oti. Pe ana fai o le tulaga lena na iai, semanū la e lē faia fua e Iesu se gaoioiga lelei mo ia, i le toe faatūina mai!—Ioane 11:39, 43, 44.

O le ā la le puna o le aʻoaʻoga e uiga i le solu e lē mafai ona oti? Ua faapea mai le Westminster Dictionary of Christian Theology o lea manatu, “e tele ina amata mai le filosofia faa-Eleni na i lo le amata mai se faaaliga faale-Tusi Paia.” Ua faamatala mai e le Jewish Encyclopedia e faapea: “O le talitonuga faapea e faaauau pea ona ola le solu pe a oti le tino, o se mataupu o filosofia po o ni masalosaloga faalelotu na i lo se mataupu o le faatuatua, ma e aunoa ma se vaega o Tusitusiga Paia o loo aʻoaʻoina ai lena mataupu.”

O le mea masani lava, o le isi mea sesē e faasolo atu i le isi mea sesē, ma o le tulaga moni lena ua iai le aʻoaʻoga i le solu e lē mafai ona oti. O iinā na amata mai ai le manatu faapaupau o le faapuapuagatia e faavavau i se afi i seoli.b Peitaʻi, e manino lava le faamatalaga a le Tusi Paia, “o le oti, o le totogi lea o le agasala”—e lē o le faapuapuagatia e faavavau. (Roma 6:23) O lea, i le faamatalaina o le toetū, ua taʻua ai i le King James Version: “Ua avae foʻi e le sami e na oti sa i ai, ua avae foʻi e le oti ma seoli e na oti sa i ai.” E faapena foʻi le Tusi Paia o le Douay o loo faapea mai “ua avaʻe e le sami . . . ma le oti ma seoli o latou tagata oti.” Ioe, pe a faafaigofie le manatu, o i latou o loo i seoli ua feoti, o loo ‘momoe,’ e pei ona fetalai ai Iesu.—Faaaliga 20:13.

Pe e te talitonu moni ea o le aʻoaʻoga i le faatamaʻiaga e faavavau i seoli e ono tataʻi mai ai tagata i le Atua? E matuā leai lava. O se manatu e teʻena e tagata e faimea tonu ma alolofa! Peitaʻi, o loo aʻoaʻo e le Tusi Paia faapea, “o le Atua, o le alofa lava ia” ma o le faasauā, e oo lava i le faasauā i manu, o se gaoioiga e matuā teena e ia.—1 Ioane 4:8; Faataoto 12:10; Ieremia 7:31; Iona 4:11.

Le Toe Fesuiaʻia o le “Ata” i Ona Po Nei

O loo faaauau mai pea i aso nei le toe fesuiaʻia o le Atua ma le Faa-Kerisiano. Talu ai nei lava na faamatala mai ai e se polofesa i mataupu faalelotu, le feteenaʻiga i totonu o lana lotu Porotesano e faapea o se feteenaʻiga “i le va o le pule a le Tusi Paia ma talitonuga faavae, ma le pule o mafaufauga fatu a tagata, faapea i le va o le faamaoni atu o le lotu i le taʻitaʻiga a Keriso, ma le faaofi atu ma le suia o le Faa-Kerisiano ina ia faamalieina ai lagona o le toʻatele o tagata. O le mataupu tāua la o loo finauina o lenei: O ai na te filifilia aʻoaʻoga a le lotu . . . Po o le Tusi Paia ea po o manatu o loo sili ona malolosi i aso nei?”

E faanoanoa lava, ona “o manatu o loo sili ona malolosi i aso nei” e foliga mai o loo tele ina taaʻina ai tagata. Mo se faataʻitaʻiga, ua lē o toe po se lilo i le tele o lotu ua suia o latou talitonuga i mataupu eseese ina ia foliga mai ai o loo latou agaʻigaʻi pea i luma ma le faauliulitō i o latou talitonuga. Aemaise lava i mataupu o amioga tatau, ua fai lava sina faatalalē ai o lotu, e pei ona taʻua i le mataupu amata. Peitaʻi, e manino le faamatalaga a le Tusi Paia e faapea o le faitaaga, le mulilua, ma le tauātane o ni agasala matuiā i le silafaga a le Atua, ma o i latou e faia na agasala “e le fai mo latou tofi le malo o le Atua.”—1 Korinito 6:9, 10; Mataio 5:27-32; Roma 1:26, 27.

E tusia e le aposetolo o Paulo upu o taʻua i luga, ae o le taimi lea o loo sasao faaafi ituaiga uma o amioga leaga i se lalolagi na siʻomia ai o ia ua taaʻina i faiga faa-Eleni ma faa-Roma. Sa ono manatu ifo Paulo: ‘E saʻo, na susunuina e le Atua Sotoma ma Komoro ona o a latou agasala matuiā faaleituaiga, peitaʻi o mea na sa tutupu i le 2,000 tausaga ua mavae! E mautinoa lava e lē faatatau maia i lenei vaitaimi o le malamalama.’ Peitaʻi ane, sa leʻi feliuliuaʻi Paulo i sona manatu; na ia matuā teʻena le faaleagaina o upu moni a le Tusi Paia.—Kalatia 5:19-23.

Tagaʻi i le “Ata” Muamua

I le fetalai atu i taʻitaʻi lotu Iutaia i ona vaitaimi, sa taʻua ai e Iesu faapea, o la latou tapuaʻiga sa ‘tapuai fua ona o lo latou fai ma mataupu, poloaiga a tagata.’ (Mataio 15:9) O le mea lava lea e tasi na faia e na taʻitaʻi lotu i le Tulafono a Ieova lea na auala mai ia Mose, e pei foʻi ona sa faia ma o loo faia pea e taʻitaʻi lotu o Kerisinetoma, i aʻoaʻoga a Keriso—ua latou faapipisi atu le “vali” o uputuu ma valia ai upu moni tauatua. Peitaʻi na matuā tafi mamā ese e Iesu mea sesē uma mo se lelei o tagata lotofaamaoni. (Mareko 7:7-13) Sa tautala Iesu i le upu moni, e tusa lava pe sa talileleia pe leai. Sa avea pea le Afioga a le Atua ma ona pule.—Ioane 17:17.

Maʻeu se eseesega ua taʻu mai e Iesu e faatatau i le toʻatele o ē ua faapea mai o Kerisiano! O le mea moni lava, na muaʻi valoia e le Tusi Paia faapea: “O le a tuʻinanau atu tagata ina ia maua mai mea fou ma aoaoina . . . e fai ma aʻoaʻo e tusa i o latou lava manaʻoga; ona sosoo lea, na i lo le faalogo i le upu moni, o le a latou liliu atu i tala faafagogo.” (2 Timoteo 4:3, 4, The Jerusalem Bible) O nei “tala faafagogo,” o nisi o ia ua uma ona tatou talanoaina, e matuā faaleagaina ai lava faaleagaga, peitaʻi o upu moni o le Afioga a le Atua e ati aʻe ai, ma taʻitaʻia ai i le ola e faavavau. O le upu moni lenei o loo faalaeiauina oe e Molimau a Ieova ina ia e iloiloina.—Ioane 4:24; 8:32; 17:3.

[Faamatalaga pito i lalo]

[Pusa/Ata i le itulau 7]

Le Amataga Mai o le Igoa Kerisiano

A itiiti mai po o le sefulu tausaga talu ona mavae le maliu o Iesu, ae o loo lauiloa pea ona soo o nisi o le “le Ala.” (Galuega 9:2; 19:9, 23; 22:4) Aiseā? Talu ai o o latou olaga sa faaautū i latou faatuatua atu ia Iesu Keriso, o ia “le ala, ma le upu moni, ma le ola.” (Ioane 14:6) Ona oo mai lea i se vaitaimi ua mavae le 44 T.A., i Anetioka i Suria, ‘na ulaui igoa ai [soo o Iesu] o Kerisiano e ala i se taʻitaʻiga tauatua.’ (Galuega 11:26, NW) Na vave ona taliaina lenei igoa, e oo lava i tagata sa i tofiga aloaʻia i le lautele. (Galuega 26:28) Sa leʻi suia e le igoa fou le olaga faa-Kerisiano, lea sa faaauau pea ona faataʻitaʻi atu i le soifuaga o Kersio.—1 Peteru 2:21.

[Ata i le itulau 7]

E ala i la latou faiva i le lautele, ua faasino atu ai e Molimau a Ieova tagata i le Afioga a le Atua, le Tusi Paia

[Faamatalaga i Ata i le itulau 4]

Lona tolu mai le itu agavale: United Nations/Photo by Saw Lwin