Le Agaga o le Kirisimasi—Po o le a Iai Pea i Aso Uma o le Tausaga?

“O le viiga i le Atua i mea aupitoaluga; ma le manuia [filemu] i le lalolagi i tagata ua alofagia e ia!”—Luka 2:14.

E FAITAU miliona tagata e masani lelei i fetalaiga a agelu a le Atua, lea na folafola atu i leoleo mamoe na leoleo a latou lafu mamoe i le pō lea na fanau mai ai Iesu. I le vaitaimi lea e faapea mai ai lotu na fanau ai Iesu, e toʻatele ē e faapea mai o ni Kerisiano e faia ni taumafaiga faapitoa e faaleleia a latou amioga. E taulaʻi atu lea vaitaimi i le olioli, filemu, ma le manuia—o uiga ia na taʻua i le folafolaga a agelu—e masani ona faasino atu i le agaga o le Kirisimasi.

O ia uiga lelei e tosina mai ai tagata e lē faailogaina le Kirisimasi o se aso mālōlō faa-Kerisiano. E latou te talisapaia faalogona māfana e uunaʻia e lea aso faamanatu. E uiga atu le Kirisimasi i le mālōlō mai aʻoga po o galuega, o lea ua avea ai aso mālōlō o se avanoa lelei mo faiga mālōlōga, o se taimi e faatasi ai ma aiga ma uō, po o se taimi e fiafia ai lava i latou. Ae o le mea moni, e toʻatele tagata loto faamaoni e manatu i le Kirisimasi o se taimi faapitoa e faamamaluina ai Iesu Keriso.

Po o le ā lava le uiga o le Kirisimasi i tagata, ae e toʻatele e taʻutino mai e puupuu lava faalogona lelei e aumaia e lea vaitaimi. E vave lava ona toe foʻi tagata i a latou amioga masani. Na taʻua i se tala sa faaulutalaina, “O le Agaga o le Kirisimasi” na lomia e le Royal Bank a Kanata, e faapea: “E taumafai le toʻatele o ē faapea mai o ni ‘Kerisiano,’ e tau lava na o ni nai vaiaso i tausaga uma e faaalia ai le agalelei i isi, seʻia uma le Tausaga Fou, ona latou toe foʻi lea i lo latou tulaga manatu faapito ma le lē manatu i le lelei o isi.” Na faapea atili mai lea tusitusiga, o le mea “tonu lava e sesē” ai le agaga o le Kirisimasi, ona e lē iai pea lea agaga i tagata i “aso uma o le tausaga.”

E tusa pe e te ioe i lea manatu tāua pe leai foʻi, ae ua lāgā ai ni fesili tāua. Pe e mafai ea e tagata ona faaalia le limafoaʻi ma malamalama le tasi i le isi i se tulaga e tumau? Pe e iai se faamoemoe moni e faataunuu le folafolaga a agelu i le pō na fanau mai ai Iesu? Po o le faamoemoe ea mo se filemu moni ua na o se miti?