MATAUPU AUTŪ | PE E MANATU MAMAFA MAI LE ATUA IĀ TE OE?
E Fesoasoani Mai le Atua iā te Oe
“E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu.”—IOANE 6:44.
LE MĀFUAAGA E LĒ MAUTONU AI NISI: E toʻatele e talitonu i le Atua ae e latou te lagona le mamao mai iā te ia. Ua faapea mai Christina o se fafine mapolotu i Aialani e faapea: “Ou te mafaufau i le Atua ua na o sē na foafoaina mea uma, ae ou te lē iloa o ia ma ou te lē vavalalata foʻi iā te ia.”
LE AʻOAʻOGA A LE TUSI PAIA: Pe a tatou lagona le tuua toʻatasi, ia mautinoa e lē tuulafoaʻia i tatou e le Atua. Na faataʻitaʻia e Iesu le manatu mamafa mai o le Atua iā i tatou i le auala lenei: “Afai e iai ni mamoe e selau a se tagata ma ua sē le tasi, pe na te lē tuua ea le iva sefulu iva i le mauga, ae alu atu e saʻili mai le tasi ua sē?” O le ā le lesona? “E faapena foʻi loʻu Tamā o i le lagi, e lē finagalo e faaumatia se tasi o i latou nei e faatauvaa.”—Mataio 18:12-14.
O i “latou nei e faatauvaa ” e matuā tautele i le Atua. E faapefea ona saʻili e le Atua se tasi ua sē? E tusa ai ma le manatu o le Tusi Paia o loo taʻua i luga, e tosina mai e Ieova i latou iā te ia.
O ai i aso nei o loo asiasi atu i aiga ma nofoaga faitele e faailoa atu le feʻau o loo i le Tusi Paia e faatatau i le Atua?
Seʻi o tatou iloiloina le auala na tausolomua ai le Atua e tosina mai tagata faamaoni taʻitoʻatasi. I le senituri muamua T.A., na auina atu ai e le Atua Filipo e faafetaiaʻi le eunuka Aitiope, ina ia faamatala atu i ai le uiga o le valoaga o le Tusi Paia lea na ia faitauina. (Galuega 8:26-39) Mulimuli ane, na taʻitaʻiina atu e le Atua Peteru i le fale o le taʻitaʻiʻau e suafa iā Konelio i Roma, o lē na tatalo ma naunau e fia tapuaʻi i le Atua. (Galuega 10:1-48) Na taʻitaʻiina atu foʻi e le Atua Paulo ma ana aumea i tua o le pā o Filipi i autafa o se vaitafe. O i inā na feiloaʻi atu ai o ia i se fafine e suafa iā Litia o sē e “tapuaʻi i le Atua” ma na “tatalaina e Ieova lona loto.”—Galuega 16:9-15.
E tusa ai ma tulaga eseese o i latou o loo taʻua i luga, na faamautinoa e Ieova o i latou uma e saʻili atu iā te ia e latou te maua le avanoa e iloa ai o ia. O ai i aso nei o loo asiasi atu i aiga ma nofoaga faitele e faailoa atu le feʻau o loo i le Tusi Paia e faatatau i le Atua? E toʻatele e faapea mai o “Molimau a Ieova.” Ae fesili ifo iā te oe, ʻPe faamata o faaaogā e le Atua i latou nei e fesoasoani mai iā te aʻu?’ E matou te talosaga atu iā te oe ia tatalo atu i le Atua, ina ia e talia lana fesoasoani e tosina atu oe iā te ia.a
a Mo nisi faamatalaga atili, maimoa i le ata vitiō Aiseā e Suʻesuʻe ai le Tusi Paia? o loo i ai i le tuatusi www.jw.org/sm.