Aiseā e Suʻesuʻe ai le Tusi Paia?

Pe sa e fesili ifo iā te oe lava i fesili e pei ona taʻua i luga? Pe afai o lea, e lē na o oe o loo tuufesili ai. E toʻatele tagata i le lalolagi aoao o loo tuufesili foʻi i fesili tāua e faatatau i le olaga. Pe e mafai ona e mauaina ni tali?

E faitau miliona tagata e tali mai “ioe,” ona ua maua i le Tusi Paia tali faamalieloto i a latou fesili. Pe e te fia iloa tali mai i le Tusi Paia? E mafai ona e maua e ala i se polokalame o talanoaga faale-Tusi Paia, e faia e Molimau a Ieova e aunoa ma se totogi.a

Pe a oo ina suʻesuʻe le Tusi Paia, e faapea mai nisi: “Ou te pisi tele.” “Ou te lē manaʻo e iai ni oʻu tiute tauave.” “E faigatā tele.” Peitaʻi, o isi e latou te talia fiafia le avanoa e aʻoaʻoina ai aʻoaʻoga a le Tusi Paia. Seʻi iloilo ni nai faaaʻoaʻoga:

• “Sa ou auai i le lotu Katoliko ma le Porotesano. Sa ou ulu i le malumalu o se lotu Initia ua taʻua o le Sikh, se monaseri o le lotu Puta, ma suʻesuʻe i mataupu faalelotu i se iunivesite. Peitaʻi, e leʻi maua ai ni tali i le tele o aʻu fesili e uiga i le Atua. Mulimuli ane, na asiasi mai se Molimau a Ieova i loʻu fale, ma o loʻu maofa i ana tali e faavae mai i le Tusi Paia na ou malie ai loa e fai saʻu suʻesuʻega faale-Tusi Paia.”​—Gill, Egelani.

• “Sa tele aʻu fesili e faatatau i le olaga, ae ou te leʻi malie i tali na taʻu mai e la matou faifeʻau. Peitaʻi, e na o le Tusi Paia lava na faaaogā e se Molimau a Ieova e tali ai aʻu fesili. Ina ua fesili mai pe ou te fia aʻoaʻoina atili nisi mea, sa ou talia ma le fiafia.”​—Koffi, Benin.

• “Sa ou fia iloa le tulaga o ē ua maliliu. Na ou talitonu e mafai e tagata ua feoti ona faaleagaina ē o loo feola, peitaʻi sa ou fia iloa po o le ā le manatu o le Tusi Paia. O lea na ou suʻesuʻeina ai loa le Tusi Paia ma saʻu uō o se Molimau a Ieova.”​—José, Pasili.

• “Sa ou taumafai e faitau le Tusi Paia, peitaʻi ou te leʻi malamalama i ai. Mulimuli ane na asiasi mai se Molimau a Ieova ma faamatala mai ma le manino ni valoaga o le Tusi Paia. Sa ou fia iloa po o ā nisi mea e mafai ona ou aʻoaʻoina.”​—Dennize, Mekisikō.

• “Sa ou taumānatu po o manatu mamafa moni mai le Atua iā te aʻu. O lea na ou filifili ai e tatalo i le Atua o loo taʻua i le Tusi Paia. I le aso na sosoo ai, na asiasi mai se Molimau a Ieova i loʻu fale, ma na ou talia se suʻesuʻega faale-Tusi Paia.”​—Anju, Nepale.

O nei mea na tutupu ua faamanatu mai ai fetalaiga a Iesu o loo i le Mataio 5:3: “E fiafia o ē e naunau i mea faaleagaga.” Ioe, e iai i tagata le manaʻoga e fia iloa mea faaleagaga. E na o le Atua e mafai ona faamalieina lenā manaʻoga, e ala mai i lana Afioga le Tusi Paia.

O ā mea e aofia ai i se suʻesuʻega faale-Tusi Paia? O ā aogā e te maua mai ai? O le a tali nei fesili i le mataupu o loo sosoo mai.