MATAUPU AUTŪ
O Ai Molimau a Ieova?
“Ua tele tausaga o ma masani ma Mike. O ia o se Molimau a Ieova. Ae ou te lē malamalama e faatatau i lana lotu. O ai Ieova? Aiseā e lē faamanatu ai e Molimau a Ieova aso faamanatu? Po o auai Mike i se lotu ua vavaeese?”—Becky, Kalifonia i Amerika.
“Ina ua suʻesuʻe e lo matou tuaoi le Tusi Paia ma Molimau a Ieova, sa ou taumānatu: ʻO le ā le uiga o lea igoa Molimau a Ieova? E ese lava le igoa o lea lotu!’”—Zenon, Ontario i Kanata.
“Sa ma manatu ma loʻu toʻalua na asiasi mai Molimau a Ieova, ina ia faamanatu mai o ma faalogona nofosala ona e ma te lē o ō i se lotu. Sa ma manatu afai e lē o maua i lotu autū le mea o loo ma saʻilia, e mautinoa foʻi la e lē maua i se vaega faalotu e pei o Molimau a Ieova.”—Kent, Washington i Amerika.
“O le mea moni ou te leʻi iloa po o ai i latou ma po o ā foʻi o latou talitonuga.”—Cecilie, Esbjerg i Tenemaka.
Atonu e te vaaia Molimau a Ieova o loo talaʻi mai i lea fale i lea fale po o nofoaga faitele, tufa atu lomiga faale-Tusi Paia, ma faia talanoaga faale-Tusi Paia e aunoa ma se totogi. Atonu foʻi na e maua lenei mekasini mai i se tasi o i latou. Peitaʻi, o loo e taumānatu pea po o ai Molimau a Ieova. Atonu e tutusa ou manatu ma manatu o se tasi o i latou na taʻua i luga.
Pe afai o loo e tuufesili faapena, o fea e te ono saʻili i ai mo ni tali? E faapefea ona e iloa talitonuga moni lava o Molimau a Ieova, pe faapefea ona faatupe la latou galuega ma fale mo tapuaʻiga, ma aiseā e asiasi atu ai i lou fale ma talanoa atu iā te oe i nofoaga faitele?
Ua faapea mai Cecilie lea na taʻua muamua: “E tele ina ou faitau i le Initaneti e uiga i Molimau a Ieova. Na ou faalogo foʻi i ni tala feaveaʻi taufaaleaga e uiga iā i latou, ma iʻu ai ina ou lē fiafia i Molimau a Ieova.” Peitaʻi, na mulimuli ane talanoa saʻo Cecilie i Molimau a Ieova, ma maua ai tali faamalieloto i ana fesili.
Pe e te fia maua ni tali saʻo i au fesili e faatatau i Molimau a Ieova? E matou te faalaeiau oe e talanoa saʻo i Molimau a Ieova, o ē e lomiaina lenei mekasini, ma o i latou ia e maua tonu mai i ai tali o au fesili. (Faataoto 14:15) E matou te faamoemoe o le a fesoasoani mataupu o loo mulimuli mai, e te silafia ai po o ai i matou ma po o ā o matou talitonuga, ma e malamalama ai foʻi i le galuega o loo matou faia.