“E Faatamaoaigaina le Tagata Limafoaʻi”

UA LEVA ona avea taulaga o se vaega tāua o le tapuaʻiga moni. Sa ofo atu e tagata Isaraelu taulaga na faia i manu, ma ua mātaulia Kerisiano i taimi uma i lo latou faia o “taulaga o viiga.” Peitaʻi, e iai isi ituaiga taulaga e fiafia i ai le finagalo o le Atua. (Epe. 13:15, 16) O nei taulaga e maua ai le olioli ma faamanuiaga, e pei ona faaalia i faaaʻoaʻoga o loo mulimuli mai.

Sa matuā naunau Hana, o se tasi o auauna faamaoni anamua, ia maua sana tama tama. Peitaʻi sa lē fanau o ia. Sa tatalo o ia ma tautō iā Ieova pe afai o le a ia fanaua se tama tama, o le a “foaʻi atu o ia iā Ieova i aso uma o lona ola.” (1 Samu. 1:10, 11) Mulimuli ane, na tō Hana ma ia fanauina ai se tama tama na faaigoa iā Samuelu. Ina ua teʻa Samuelu ma le susu, sa ave o ia e Hana i le faleʻie paia e pei ona ia tautō ai. Sa faamanuia e Ieova Hana ona o lona uiga faataulaga. Sa faamanuiaina Hana i isi fanau e toʻalima, ma na avea Samuelu o se perofeta ma tusitala o le Tusi Paia.—1 Samu. 2:21.

I le pei o Hana ma Samuelu, ua iai i Kerisiano i aso nei le faaeaga e faaaogā ai o latou ola i le auaunaga paia i Lē na faia i latou. Na folafola mai e Iesu o le a matuā tauia i tatou i so o se faataulaga e tatou te faia ina ia tapuaʻi atu ai iā Ieova.—Mare. 10:28-30.

I le uluaʻi senituri, sa lauiloa se fafine Kerisiano e igoa iā Toreka i ana ʻgaluega lelei ma le foaʻi atu o meaalofa,’ po o faataulaga na ia faia ina ia fesoasoani ai i isi. Ae e faanoanoa ona na ʻmaʻi o ia ma oti ai,’ ma na matuā faanoanoa ai le faapotopotoga atoa. Ina ua faalogo le ʻausoo o loo iai i inā Peteru, sa latou talosaga atu iā te ia ina ia alu ane. Seʻi faaata lo latou fiafia ina ua alu atu Peteru ma ia toe faatūina mai Toreka! O le uluaʻi toetū lea na faia e se aposetolo. (Galu. 9:36-41) E leʻi galo i le Atua faataulaga na faia e Toreka. (Epe. 6:10) O loo faamauina i le Afioga a le Atua le limafoaʻi o Toreka e avea o se faaaʻoaʻoga lelei mo i tatou.

Sa faataatia foʻi e le aposetolo o Paulo se faaaʻoaʻoga lelei o sē na foaʻi atu ma le agalelei lona taimi ma uaʻi atu i isi. Na tusi atu o ia i ona uso Kerisiano i Korinito e faapea: “Ua ou naunau tele e faaaogā mea uma ua iā te aʻu, ma loʻu malosi atoa ona o o outou ola.” (2 Kori. 12:15) Sa aʻoaʻoina e Paulo mai i mea na tutupu iā te ia, e lagona e se tasi le faamalieina pe a ia faia ni faataulaga mo le lelei o isi. Ae o le itu e sili ona tāua, e maua ai le faamanuia ma le finagalo malie o Ieova.—Galu. 20:24, 35.

O lea la, e fiafia le finagalo o Ieova pe a faaaogā lo tatou taimi ma le malosi ina ia faaauiluma ai manaʻoga o le Malo, ma fesoasoani ai i uso ma tuafāfine. Ae pe e iai nisi auala e mafai ona tatou lagolagoina ai le galuega talaʻi o le Malo? Ioe, e iai! E lē gata i a tatou galuega lelei, ae e mafai foʻi ona tatou faamamaluina le Atua e ala i a tatou meaalofa tauofo. Ua faaaogā na meaalofa ina ia faaoo atu ai le talaʻiga i le lalolagi aoao, e aofia ai le lagolagoina o misionare ma isi auauna faapitoa faataimi atoa. O a tatou meaalofa tauofo foʻi o loo faagaoioia ai le saunia ma le faaliliuina o lomiga ma vitiō, o galuega fesoasoani i taimi o mala faalenatura, faapea le fausiaina o Maota mo Sauniga fou. E tatou te mautinoa o le a “faatamaoaigaina le tagata limafoaʻi.” E lē gata i lea, ua tatou faamamaluina Ieova pe a faaaogā a tatou ʻoa ina ia auauna ai iā te ia.—Faata. 3:9; 11:25.

AUALA UA FILIFILI E NISI E FOAʻI AI MEAALOFA MO LE GALUEGA I LE LALOLAGI AOAO

E pei o aso o le aposetolo o Paulo, e “tuu ese” pe faaagaga e le toʻatele se vaega tupe e lafo i pusa a faapotopotoga o loo faailogaina, “Galuega i le Lalolagi Aoao.” (1 Kori. 16:2) E lafo atu e faapotopotoga i masina taʻitasi nei tupe i le ofisa o le lālā o loo vaavaaia o latou atunuu. E mafai foʻi ona lafo saʻo lau foaʻi, i se faalapotopotoga faaletulafono o loo faaaogāina e Molimau a Ieova i lou atunuu. Ina ia iloa le faalapotopotoga faaletulafono autū o loo faaaogāina e Molimau a Ieova i lou atunuu, faamolemole faafesootaʻi le ofisa o le lālā o loo vaavaaia le atunuu. E mafai ona maua le tuatusi o le ofisa o le lālā i luga o le www.jw.org. O loo mulimuli mai foaʻi e mafai ona e lafoina tuusaʻo, e fua i tulaga i lou atunuu.

O FOAʻI E LEAI NI TUUTUUGA

Foaʻi e ala i faletupe, o debit card, po o credit card. I nisi lālā e faaaogā ai le upega tafaʻilagi o le jw.org po o se isi tuatusi aloaʻia.
Foaʻi tautupe, filifili, tautaliga, taulima, po o isi oloa tāua a le tagata lava ia. Ia faaaofia ai ma se tusi e faailoa atu ai, o na mea ua foaʻi atu e aunoa ma ni tuutuuga.

O FOAʻI E IAI TUUTUUGA

Foaʻi tautupe ma le tuutuuga e toe faafoʻi lenā foaʻi i lē e ana le tupe, pe a ia talosagaina.
Ia faaaofia ai ma se tusi e faailoa atu ai e iai tuutuuga o le foaʻi.

FUAFUAGA O FOAʻI FAAMEAALOFA

E lē gata i foaʻi tautupe ma isi foaʻi faameaalofa, ae e iai isi auala e faia ai foaʻi mo le galuega o le Malo i le lalolagi aoao. O loo lisiina mai na auala i le pito i lalo. Po o le ā lava le auala e te filifili e faaaogā, faamolemole faafesootaʻi muamua le ofisa o le lālā o loo vaavaaia lo outou atunuu, ina ia iloa ai auala o loo faaaogāina e lou atunuu. Talu ai e eseese tuutuuga faaletulafono ma tulafono o lafoga a atunuu, e tāua ai ona saʻili le fesoasoani a ni lōia ma tagata faufautua e faatatau i lafoga, a o leʻi filifili po o lē fea le auala sili e faia ai lau foaʻi.

Inisiua ma Tupe Maua pe a Litaea: O le inisiua o le ola o se tasi, o le teugātupe na faaagaga mo le taimi e litaea ai, ma tupe e maua pe a litaea po o le penisione, o le a lotomalie se tasi e foaʻi mo le faalapotopotoga o loo faaaogāina e Molimau a Ieova.

Teugātupe i le Faletupe: O teugātupe i le faletupe e mafai ona totogi atu pe a maliu, i se faalapotopotoga o loo faaaogāina e Molimau a Ieova, ma ia faia e tusa ma aiāiga a faletupe o le atunuu.

Tupe Faafaigaluega (Stocks) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i se faalapotopotoga o loo faaaogāina e Molimau a Ieova po o le tuu faamavaega e totogi atu pe a maliu lē o faia le foaʻi.

Fanua ma Fale: E mafai ona foaʻi tuusaʻo ou fanua ma fale, i se faalapotopotoga o loo faaaogā e Molimau a Ieova, pe tuu e nofo ai pea lē e ana le fale seʻia oo ina maliu, ona faatoʻā maua lea e le lālā.

Uili ma Mavaega: E mafai ona foaʻi atu meatotino po o se vaega tupe i se faalapotopotoga o loo faaaogāina e Molimau a Ieova, e ala i se uili ua faia e tusa ai ma le tulafono. Pe mauaina foʻi e lenei faalapotopotoga le taui o se teugātupe ua tuu faamavaega. O le faia faapea, e mafai ona faaitiitia ai lafoga e totogi.

E pei ona faailoa mai i le faaupuga “fuafuaga o foaʻi faameaalofa,” o nei foaʻi e manaʻomia ona fuafua lelei e lē e ana le foaʻi. Ina ia fesoasoani i ē o loo fia faia ni meaalofa tauofo i le galuega a Molimau a Ieova i le lalolagi aoao, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Ua saunia i le polosiua faamatalaga i auala eseese e faia ai foaʻi faameaalofa i le taimi lenei, ma pe a maliu lē e ana le foaʻi. Atonu e lē o faamatalaga uma i le polosiua e aogā i lou tulaga, ona o tulafono o lafoga po o nisi o tulafono i le atunuu o loo e nofo ai. O nei auala ua mafai ai e le toʻatele ona lagolagoina fuafuaga a Molimau a Ieova i le lalolagi aoao, ma maua ai foʻi le fesoasoani i le faaitiitia o lafoga e totogi. Atonu e mafai ona e talosagaina se kopi o lenei polosiua mai le failautusi o lau faapotopotoga, pe afai e maua i le atunuu o loo e nofo ai.

Mo nisi faamatalaga, oomi le vaega “Make a Donation to Our Worldwide Work” o loo i le pito i lalo o so o se itulau o le jw.org/sm, pe faafesootaʻi le ofisa o le lālā.