Pe a Feagai ma se Maʻi Tugā

“Ina ua iloa ua ou maua i le kanesa o le māmā ma le taufale, na ou mafaufau o le a ou oti. Ae ina ua uma ona vaai le fomaʻi, na ou mafaufau ʻIa, e lē o le mea lea na ou faatalitalia ae e tatau ona saʻili se auala e feagai ai ma lenei maʻi.’”—Linda, e 71 ona tausaga.

“Na ou maua i se maʻi tigāina lea e aafia ai neula o oʻu foliga. O le tigā tele o le maʻi i nisi taimi e lagona ai le mafatia. O le tele o taimi, ou te lagona le tuua toʻatasi ma oo ai lava ina mafaufau e pule i le ola.”—Elise, e 49 ona tausaga.

O se tamāloa maʻi o loo saofaʻi i le nofoa faataavalevale faatasi ma lana fanau

PE AFAI ua e aafia pe aafia foʻi se tasi e pele iā te oe i se maʻi lea e iʻu ai i le oti, e te lagona le matuā faigatā o lenā tulaga. E lē gata i lea, o le a e feagai foʻi ma faalogona lē fiafia. E ono faateteleina foʻi le fefe ma le popole i le taimi e vaai ai le fomaʻi, faigatā ona maua pe totogi le tau o se togafitiga, po o aafiaga lē lelei o fualaau. O le tigā o le mafaufau ona o le maʻi tugā e toetoe a lē mafai ona onosaia.

O fea e tatou te maua ai le fesoasoani? E toʻatele ua maua le faamāfanafanaga sili i le faalagolago i le Atua, e ala i le tatalo ma faitau i upu faamāfanafanaloto o loo i le Tusi Paia. O le isi fesoasoani, e maua mai i le faaalia o le alofa ma le lagolagosua mai o aiga ma uō.

FAUTUAGA E FESOASOANI E TE ONOSAʻI AI

Na taʻua e Robert e 58 tausaga e faapea: “O le faatuatua i le Atua o le a fesoasoani iā te oe e onosaia ai lou maʻi. Ia tatalo iā Ieova ma faailoa atu i ai ou faalogona. Ia talosaga atu iā te ia mo le agaga paia. Ia talosaga atu iā te ia e fesoasoani mai iā te oe ina ia iai se vaaiga saʻo, ma avea oe ma faalaeiauga i lou aiga, ma ia toʻafilemu pea a o e onosaia lou maʻi.”

Ua faapea atili mai Robert, “Pe a lagolagosua atu lou aiga, o se fesoasoani tele lenā i lou tulaga tau faalogona. E masani ona vili mai i aso taʻitasi ni aʻu uō ma fesili mai, ʻO ā mai oe?’ Ou te maua foʻi faamāfanafanaga mai i aʻu uō i isi atunuu. Ou te lagona ai le faafouina ma e fesoasoani ina ia aua ai neʻi oʻu faavaivai.”

Pe afai o loo e asiasi i se tagata maʻi, mātau le manatu na taʻua e Linda: “E lē taumatea e manaʻo le tagata maʻi e ola i se olaga masani e pei e leai se mea o tupu, ma e ono lē fia talanoa e uiga i lona maʻi. O lea, ia talanoa i mea e masani ona lua talanoa ai.”

O le malosi mai i le Atua ma faamāfanafanaga mai i le Tusi Paia, faapea le lagolagosua a aiga ma uō alolofa, e mafai ona faatumau ai lo tatou mautinoa e tāua le ola pea, e ui lava o loo tatou feagai ma se maʻi tugā.

O Mau o le Tusi Paia e Maua ai Fautuaga Lelei

Ia faalagolago i le Atua.

“Na ou fesili atu iā Ieova, ona tali mai lea o ia iā te aʻu, na ia laveaʻiina foʻi aʻu mai i mea uma na ou fefe ai. Na valaau atu lē ua tigāina, ona faafofogaina lea e Ieova.”—Salamo 34:4, 6.

Ua faapea mai Linda lea na taʻua muamua: “Ou te lē tatalo ʻIa ou malosi,’ ae ou te tatalo i taimi uma, ʻIa fesoasoani mai ia ou maua le lototele ma ia onosaia loʻu maʻi.’”

Ia faitau i le Afioga a le Atua ina ia maua ai le malosi.

“E lē fai mai foʻi se tasi ua nofo ai: ʻOu te maʻi.’”—Isaia 33:24.

Ia manatunatu loloto i folafolaga a le Atua mo le lumanaʻi. O le faia faapea, o le a maua ai le faamoemoe lea e aumaia ai le malosi e tumau ai.

Ia saʻili atu i ou aiga ma uō mo le lagolagosua.

“O le uō moni e alofa i taimi uma, ma o ia o se uso ua fanau mo taimi o puapuaga.”—Faataoto 17:17.

Ua fautua mai Elise lea na taʻua muamua, “Aua neʻi faaesea oe lava. Ia faataga au uō e fesoasoani iā te oe. E iai taimi e te ono lagona ai le tuua toʻatasi ma manatu ai e lē o faafofoga mai le Atua iā te oe, ae ia aua neʻi faaesea oe lava.”