Ia Mataʻala e Ofo Lomiga Faale-Tusi Paia
1 Maeu lo tatou faafetai mo lomiga faale-Tusi Paia ua saunia pea e Ieova e ala i lana faalapotopotoga! E tāua tele ia i tatou nei meaʻai faaleagaga. Pe a maua mai se lomiga fou, tatou te naunau fiafia e sueina ona itulau. Ma, a o tatou faitauina ma le faaeteete, ua tatou maua ai se malamalamaga. E tuputupu aʻe ai lo tatou sapaitalia o Ieova ma ana fuafuaga.
2 O aogā totino ua tatou aeaeina e uunaia i tatou e fetufaai ma isi mea lelei ua tatou aʻoaʻoina. (Mata. 24:14) Tatou te lē manofo i le fia faaoʻo atu o lomiga a le Sosaiete i lima o tagata i le tele e mafai ai. O lea foi e mafai ai ona latou aʻoaʻoina upu moni ua iai i nei lomiga aanoa faale-Tusi Paia. Afai tatou te sauniuni lelei ma mataʻala ia taulamua e taulima le ofo tusi ua iai, atonu e mafai ai ona tatou fesoasoani i isi tagata loto faamaoni e liliu ia Ieova ma auai ma i tatou i lana auaunaga.
MAI I LEA FALE MA LEA FALE
3 I a Ianuari ma Fepuari o le a tatou ofoina tusi e lua Le Manuia Moni ma le Saogalemu—Mai le a le Puna? ma le Agaga Paia—Le Malosi i Tua o le Faiga Fou o Loo Sau! mo se meaalofa paʻū e $1.00 (US50c). Afai tatou te fetaiai ma tagata o ē tautala faa-Peretania, ua ia i tatou le matalasi o tusi e taʻi 192-itulau i se meaalofa e $1.00 (US50c) i le tasi. E aofia i tusi e tatau ona ofo so o se tusi e 192-itulau na lomia i tua atu o le 1980 vagana le Aiga Fiafia, Great Teacher, This Life, Upu Moni, ma le Youth.
4 I nisi taimi tatou te asiasi atu ai o loo pisi moni lava tagata. I lalo o na aiaiga, atonu tatou te mananao ai e tau ina ofo le tusi e pei ona fautuaina i le faaaʻoaʻoga lona lua i le itulau e 20 o le tusi Reasoning. Pe tatou te faamatalaina foi i a tatou lava upu se mea e tali tutusa ma le faaaʻoaʻoga lona tolu i lena itulau, faaalia ai le sapaitalia o tulaga o lē ona le fale ma fai atu i se auala faatauanau: “Ae talu ai e leai sou taimi e talanoa ai nei, ma te fautuaina ia e talia nei mekasini e lua i se meaalofa e 80s (US50c) ma tago e faitau pe a avanoa. O le a ē olioli ai e aʻoaʻo faatatau i le folafolaga a le Atua o se mea fou.” O nei upuoʻo e faaalia ai le magafagafa mo aiaiga o lē ona le fale, ma i le taimi lava e tasi, ua aaoina ai le lomiga.
5 O le ā e mafai ona fai pe a ua maeʻa ona iai i se tagata le lomiga o loo tatou ofoina? Aiseā e lē faatatauina ai le mataupu silisili o loo maua i le 1 Korinito 3:6-9? O lena ua maeʻa ona toto le fatu. Ia faaaogā tatau le avanoa e faasūsū ai e ala i le avatu o se molimau atili i le tagata. Pe atonu tatou te fai atu faapea: “Ua ou fiafia tele ona o lena ua uma ona iai sau kopi o lenei lomiga. E lē taumatea sa e olioli i lona faitauina. Afai e mafai, ou te fiafia e faasino atu pe mafai faapefea ona e maua nisi aogā se tele mai lenei tusi. O le a faaaluina ai na o ni nai minute.” Ona faataʻitaʻi lea pe faapefea ona tatou suesueina le Tusi Paia faatasi ma le fesoasoani a le lomiga. E lē suia ai la tatou fuafuaga i le faitotoa pe a ua maeʻa ona iai se tusi a lē ona le fale. Ia manatua, o lo tatou sini autu o le ‘faia o soʻo.’—Mata. 28:19.
MOLIMAU LE FUAFUAINA
6 E tatau foi ona tatou mataʻala i le tele o avanoa atonu tatou te maua e aaoina ai tusi i se molimau lē fuafuaina. Mafaufau i auala e molimau ai i tagata asiasi, tauaiga, uo i galuega, uo i aʻoga, tagata tatou te fetaiai i faatauga, ma i latou tatou te fetaiai i le va o fale po faitotoa a o tatou auai i le auaunaga i le fanua. Fuafua mamao, ia iai ni lomiga e ofo i na faatasiga pe a mafai ai. E masani, e lē faigata le aveina o se tasi po o le sili atu o ni lomiga laiti ma i tatou. E tele ni lelei e mafai ona faataunuuina e ala i le molimau lē fuafuaina.—1 Pete. 3:15.
7 Ua lufilufi mai ma le agalelei i tatou e le faalapotopotoga a Ieova i lomiga e tausia ai pea lo tatou malolosi faaleagaga ma ia fesoasoani ia i tatou i le faasalalauina o le tala lelei. O le mataʻala i avanoa e ofoina ai lomiga faale-Tusi Paia o le a fesoasoani ia i tatou e faaneenee i le suafa o Ieova.—Sala. 34:3